Yele-za-pɛr-tib 16 - A SƐB-SÕW

A Ɩsɩmayɛl dɔwfʋ yele

¹ A Abram pɔw Saraɩ bɛ tɩ dɔw bie kʋ̀ ʋ ɛ. Ɛcɛ ʋ tɩ tɛr'ɩ tõ-tõ-bi-pɔw na ɩ Eziptɩ tẽw nɩr a yúor dɩ kɛ́ Agaar a.

² A Saraɩ tɩ yel'ɩ a Abram: «Fʋ nyɛ̃ a na, a Sore bɛ sàw ɩ̃ tɛr bie ɩ. Páw a ɩ̃ tõ-tõ-bi-pɔw, kapaw ʋ na dɔw nɩ bie kʋ̀ m.» A Abram tɩ sàw nɩ a lɛ a Saraɩ na yel a.

³ Yome pie tɩ n'ɩ a lɛ a Abram na kpɩɛr a Kanãa tẽw a. Lɛ n'a a Abram pɔw Saraɩ tɩ de a ʋ tõ-tõ-bi-pɔw Agaar na ɩ Eziptɩ tẽw nɩr a, kʋ̀ a ʋ sɩr Abram k'ʋʋ ɩ pɔw.

⁴ A Abram tɩ páw nɩ a Agaar ʋ tɛr pʋɔ. A Agaar na wa nyɛ̃ ʋ tɛr a pʋɔ a, ʋ bɛ tɩ búwr a ʋ pɔw-nɩ-kpɛ̃ɛ ɩ.

⁵ Lɛ n'a a Saraɩ tɩ yel a Abram: «Fʋ̃ʋ n'ʋ so a zʋm bɛ na tʋ m a. Mãa mɩŋa n'ʋ de a ɩ̃ tõ-tõ-bi-pɔw kʋ̀ b, ɛcɛ ʋ na dɛ wa nyɛ̃ ʋ tɛr a pʋɔ a, ɩ̃ bɛ cãà ɩ nɩr a ʋ zie ɩ. A Sore, ʋ bãw a yel ŋa, fʋ̃ʋ nɩ a mãa cara pʋɔ!»

⁶ A Abram tɩ sɔw nɩ a Saraɩ: «Fʋ tõ-tõ-bi-pɔw n'ʋ, fʋ̃ʋ so ʋ, ɩrɛ ʋ lɛ za fʋ na bɔbr a!» Lɛ n'a a Saraɩ tɩ dɔwrɩ a Agaar ʋ tɩ zɔ kpɛ a wɛja-kpalɛ pʋɔ.

⁷ A Sore malkɩ tɩ nyɛ̃ ʋ nɩ a bule ʋl na be a Súùr sɔ́r zu a pɛr,

⁸ sowr'ʋ: «Saraɩ tõ-tõ-bi-pɔw Agaar i, nyɩnɛ n'a fʋ yi waar, ɛ́ nyɩnɛ n'a fʋ cere?» Ʋ sɔw: «A ɩ̃ pɔw-nɩ-kpɛ̃ɛ Saraɩ n'ʋ ɩ̃ zɔrɛ dɛrɛ.»

⁹ A Sore malkɩ yel ʋ: «Lɛb cen a fʋ pɔw-nɩ-kpɛ̃ɛ zie, ɛ́ tɩ sàwr a ʋ nʋɔr.»

¹⁰ A Sore malkɩ tɩ yel ʋ na: «Ɩ̃ na kʋ̀ b'ɩ bʋʋrɛ bɛ yãwmɛ bɛ tɛr sɔ́rʋ ɛ.»

¹¹ A Sore malkɩ tɩ cãà na lɛb yel ʋ: «Fʋ tɛr'ɩ pʋɔ, ɛ́ na dɔw dɛble. Fʋ na por'ɩ a ʋ yúor Ɩsɩmayɛl, bʋ̃ʋ n'ʋ vɛ̃, a Sore wõ n a kpɩɛrʋ cɛl fʋ na ŋmɛ a.

¹² A fʋ bidɛb na ɩ na mɛ̃ bõw gaara a! Ʋ na zɛbr'ɩ nɩ a nɩbɛ za, ɛ́ a nɩbɛ za zɛbr'ɩ ʋ. Ʋ na ɩ n ʋ yõ a ʋ yɛbr za niŋé.»

¹³ A Agaar tɩ sowre nɩ ʋ tʋɔra à ŋá: «Ɩ̃ sɩrɩ na nyɛ̃ a Sob nɛ na nyɛrɛ mɛ̃ a bɩɩ?» Ɛ́ tɩ por yúor ŋa a Sore na tɩ ƴɛ̀r a ʋ zie a: “Fʋ ɩ n Naaŋmɩn na nyɛrɛ mɛ̃ a.”

¹⁴ Alɛ so bɛ bʋɔlɛ a bule na be a Kadɛsɩ nɩ a Berɛdɩ cara pʋɔ a kɛ́ Lahaɩ-Ʋrɔɩ bule, bɩɩ a Sob-nɛ-na-vʋʋrɛ-a na nyɛrɛ mɛ̃ a bule.

¹⁵ A Agaar tɩ dɔw nɩ dɛble kʋ̀ a Abram, ʋ por a ʋ yúor Ɩsɩmayɛl.

¹⁶ A Abram tɩ tɛr'ɩ yome lɩz'a anaar'ɩ ayʋɔb a lɛn daar a Agaar na dɔw a Ɩsɩmayɛl kʋ̀ ʋ a.