Yele-za-pɛr-tib 12 - A SƐB-SÕW

A SÃÀKƲM-KORE YELE 12:1—50:26 Naaŋmɩn bʋɔl'ɩ a Abram

ABRAHAM

¹ A Sore tɩ yel'ɩ a Abram: «Bɛr a fʋ tẽw, a fʋ nɩbɛ nɩ a fʋ sãà yir, ɛ́ cen a tẽw ʋl ɩ̃ na na wul fʋ a.

² Ɩ̃ na ɩ na fʋ yɛ̀r ɩ nɩ-bʋʋrɛ na ta nɩ-bʋʋrɛ a. Ɩ̃ na maalɩ fʋ na, ɛ́ ɩ a fʋ yúor ʋ yi. Fʋ na ɩ n maalʋ a nɩbɛ zie.

³ Ɩ̃ na mɩ́ maal'ɩ a bɛlɩ dem na ƴɛ̀rɛ nɔ-vla ƴãwn fʋ a, ɛ́ ŋmɛ ƴãw a bɛlɩ dem na ŋmɩɛr ƴãwn fʋ a. Ɩ̃ na maal'ɩ a tẽw zu nɩ-bʋʋrɛ za a fʋ zũú.»

⁴ A Abram tɩ cen na mɛ̃ a lɛ a Sore na yel kʋ̀ ʋ a. A Lɔtɩ tɩ páw ʋ na cen. A Abram tɩ tɛr'ɩ yome lɩz'a anaar ŋmãa anũu a lɛn daar ʋ na tɩ bɛr a Haran tẽw a.

⁵ A Abram tɩ tɛr'ɩ a ʋ pɔw Saraɩ nɩ a ʋ yɛb bidɛb Lɔtɩ. Bɛ tɩ de nɩ a bɛ bʋ̃-tɛrɩ za nɩ a gbãgbaar bɛ na da a Haran a, lo n a Kanãa tẽw sɔ́r. Bɛ tɩ ta n a Kanãa tẽw.

A Abram ta n a Kanãa, al pùorí ʋ cen Eziptɩ

⁶ A Abram tɩ kpɛ na tɔl a tẽw pʋɔ tɩ ta a zie ʋl bɛ na bʋɔlɛ Sɩsɛm a, a Moore sɛn tɩɛ pɛr. — A Kanãa tẽw dem tɩ kpɩɛr'ɩ a tẽw a lɛn daar. —

⁷ A Sore tɩ ɩ na a Abram nyɛ̃ ʋ, ʋʋ yel ʋ: «A fʋ bʋʋrɛ nɛbɛ ɩ̃ na kʋ̀ a tẽw ŋa.» A Abram tɩ mɛ n bàwr-maal-kuur a Sore ƴãw, a be a Sore na tɩ ɩ ʋ nyɛ̃ ʋ a.

⁸ Ʋ tɩ yi n a be, ɛ́ kpɛ a tan vuo pʋɔ, a Betɛl saa-pɛrɩ́. Ʋ tɩ maal'ɩ a ʋ pɛn-sɛw a Betɛl nɩ a Aɩ cara pʋɔ, a Betɛl be a mʋ̃tɔ̃w-kpɛb-lowr, ɛ́ a Aɩ be a saa-pɛrɩ́. Ʋ tɩ mɛ n bàwr-maal-kuur ƴen sob a be, ɛ́ puori a Naaŋmɩn bʋɔl'ʋ kɛ́ “Sore”.

⁹ Al pùorí, a Abram tɩ cere na ɛ́ tɛwr zɩnɛ, tu n a Negɛɛvʋ lowr.

¹⁰ Kɔ̃ tɩ lo n a tẽw pʋɔ, a Abram siw Eziptɩ k'ʋʋ tɩ be a be sɛr. A kɔ̃ tɩ sɩrɩ na kpɛ faa.

¹¹ A Abram na tɩ kpɩɛr a Eziptɩ tẽw pʋɔ a, ʋ yel'ɩ a ʋ pɔw Saraɩ: «Nyɛ̃, ɩ̃ bãwnɩ a na fʋ na pɔl a.

¹² A Eziptɩ tẽw dem wa nyɛ b a, bɛ na yel'a kɛ́ fʋ ɩ n a ɩ̃ pɔw, ɛ́ bɛ na kʋ m'a, ɛ́ bɛr fʋ fʋ cãà vʋʋrɛ.

¹³ A lɛ pʋɔ a, yel bɛ kɛ́ fʋ ɩ n ɩ̃ yeepuule, bɛ tʋ̃ɔ́ tɛr mɛ̃ vla a fʋ ƴãw ɩ̃ tʋ̃ɔ́ cãà vʋʋrɛ a fʋ zũú.»

¹⁴ A Abram na tɩ sɩrɩ ta a Eziptɩ tẽw a, a tẽw dem tɩ nyɛ̃ na k'aa ʋ pɔw pɔ̀l'ɩ yaga za.

¹⁵ A Faarawɔ̃ sojarɩ nɩ-bɛrɛ bɛ mɩnɛ tɩ nyɛ̃ ʋ na, ɛ́ manɩ ʋ na pɔl a kʋ̀ a bɛ zu-sob. Lɛ n'a bɛ tɩ tɛr a pɔw cen nɩ a nãà yir.

¹⁶ A ʋ ƴãw n'a a Faarawɔ̃ tɩ tɛr a Abram vla. Ʋ tɩ kʋ̀ ʋ nɩ píir nɩ bʋʋr nɩ nĩi, tõ-tõ-bi-dɛbr nɩ tõ-tõ-bi-pɔwbɛ, bòn-daar nɩ bòn-nyan de nɩ nyɔ̃wmɩ.

¹⁷ Ɛcɛ a Sore tɩ ɩ na bʋ̃-faar faar páw a Faarawɔ̃ nɩ a ʋ yir dem, a Abram pɔw Saraɩ ƴãw.

¹⁸ A Faarawɔ̃ tɩ bʋɔl'ɩ a Abram wa yel ʋ: «Bʋ̃ʋ n'ɩ à ŋá fʋ na ɩ m a? Bʋ̃ʋ n'ʋ so fʋ bɛ yel kʋ̀ m k'ʋʋ ɩ n a fʋ pɔw?

¹⁹ Bʋnʋ ƴãw n'a fʋ yel mɛ̃ kɛ́ fʋ yeepuule n'ʋ, ƴãw ɩ̃ de ʋ, ʋ ɩ a ɩ̃ pɔw? Ƴɛrɛŋa a, nyɛ̃ a fʋ pɔw, de ʋ tɔl cen nɩ!»

²⁰ A Faarawɔ̃ tɩ ƴãw nɩ nʋɔr kʋ̀ a ʋ tõ-tõ-biir kɛ́ bɛ tɛr a Abram yi n a ʋ tẽw pʋɔ, lãwnɩ a ʋ pɔw nɩ a ʋ bʋ̃-tɛrɩ za.