Yele-za-pɛr-tib 11 - A SƐB-SÕW

A Babɛl tẽw yir-cõcowla

¹ A nɩbɛ za tɩ ƴɛ̀rɛ nɩ ƴɛ̀r-pɛ-been ɛ́ a ƴɛ̀r-bie tɩ ɩ been.

² Zɩ̃ k'aa nɩsaalbɛ na tɩ cere a saa-pɛrɩ́ lowr a, bɛ tɩ nyɛ̃ nɩ zi-tɩ̃tal Mezopotami tẽw, zɩ̃ a be.

³ Bɛ tɩ yel'ɩ à ŋá kʋ̀ taa: «Alɛ! Nyɩ ɩ tɩ ŋma birkiri nyʋ̃ɔ́.» Bɛ tɩ de nɩ a birkiri a ɩ kʋsɛbɛ, ɛ́ a gudurɔ̃ ɩ a birkiri cará tanɛ.

⁴ Al pùorí bɛ yel: «Alɛ! Nyɩ ɩ tɩ mɛ tẽ-kpɛ̃ɛ nɩ yir-cõcowla a nyʋɔr na na do tɩ tɔ a salom a. Lɛ n'a tɩ na tɛr yúor, ɛ́ bɛ bɛ diw tɩ yaarɩ a tẽw za zu ɛ.»

⁵ A Sore tɩ yi n a salom zu siw k'ʋʋ tɩ nyɛ̃ a tẽ-kpɛ̃ɛ nɩ a yir-cõcowla a nɩsaalbɛ na mɩɛr a.

⁶ Al pùorí ʋ tɩɛr ʋ pʋɔ: «Nyɛ̃, nɩ-bʋʋr-been nɛbɛ, ƴɛ̀rɛ ƴɛ̀r-pɛ-been, ɛ́ nyɛ̃ a tome bɛ na tĩ tone a! Ƴɛrɛŋa a, bom za kʋ̃ tʋ̃ɔ́ piw bɛ sɔ́r a lɛ bɛ na tɩ́ɛrɛ kɛ́ bɛ ɩ a ƴãw ɛ.

⁷ Alɛ! Tɩ siw tɩ ŋmɛ a bɛ ƴɛ̀rʋ nyaw taa bɛ ta cãà wone taa ƴɛ̀rʋ ɛ.»

⁸ A Sore tɩ diw bɛ nɩ a be yaarɩ a tẽw zu ziir za, bɛ bɛr a tẽ-kpɛ̃ɛ mɛb.

⁹ Alɛ n'a so bɛ por a tẽw yúor kɛ́ Babɛl. Bʋ̃ʋ n'ʋ vɛ̃, be n'a a Sore tɩ dam a tẽw za ƴɛ̀rʋ nyaw taa, ɛ́ a be n'a ʋ tɩ diw a nɩsaalbɛ yaarɩ a tẽw zu ziir za.

A sãàkʋm-kore yée, a na tĩ a Sɛ́m ɛ́ tɩ tɔ a Abraham a

¹⁰ A Sɛ́m bʋʋrɛ n'ɩ bɛ ŋa. A Sɛ́m tɩ tɛr'ɩ yome kʋba (100) a lɛn daar ʋ na dɔw Arpakisadɩ a, a kʋ̃ɔ-paalʋ-kpɛ̃ɛ pùorí yome ayi sob.

¹¹ Ʋ na wa dɔw a Arpakisadɩ baar'a, ʋ tɩ cãà na maalɩ yome kɔbr anũu (500), dɔw bidɛbr nɩ pɔwyaar.

¹² A Arpakisadɩ tɩ tɛr'ɩ yome lɩz'a ayi ŋmãa anũu a lɛn daar ʋ na dɔw Sela a.

¹³ Ʋ na wa dɔw a Sela baar'a, ʋ cãà na maalɩ yome kɔbr anaar dɔwlɩ yome ata (403), dɔw bidɛbr nɩ pɔwyaar.

¹⁴ A Sela tɩ tɛr'ɩ yome lɩzɛr'ɩ pie a lɛn daar ʋ na dɔw Ebɛɛr a.

¹⁵ Ʋ na wa dɔw a Ebɛɛr baar'a, ʋ cãà na maalɩ yome kɔbr anaar dɔwlɩ yome ata (403), dɔw bidɛbr nɩ pɔwyaar.

¹⁶ A Ebɛɛr tɩ tɛr'ɩ yome lɩzɛr'ɩ pie nɩ anaar ɛ́ dɔw Pelɛgɩ.

¹⁷ Ʋ na wa dɔw a Pelɛgɩ baar'a, ʋ cãà na maalɩ yome kɔbr anaar dɔwlɩ yome lɩzɛr'ɩ pie (430), dɔw bidɛbr nɩ pɔwyaar.

¹⁸ A Pelɛgɩ tɩ tɛr'ɩ yome lɩzɛr'ɩ pie ɛ́ dɔw Erewu.

¹⁹ Ʋ na wa dɔw a Erewu baar'a, ʋ cãà na maalɩ yome kɔbr ayi dɔwlɩ yome piwaɩ (209), dɔw bidɛbr nɩ pɔwyaar.

²⁰ A Erewu tɩ tɛr'ɩ yome lɩzɛr'ɩ pie nɩ ayi ɛ́ dɔw Serugɩ.

²¹ Ʋ na wa dɔw a Serugɩ baar'a, ʋ cãà na maalɩ yome kɔbr ayi dɔwlɩ yome ayopõi (207), dɔw bidɛbr nɩ pɔwyaar.

²² A Serugɩ tɩ tɛr'ɩ yome lɩzɛr'ɩ pie ɛ́ dɔw Nahɔɔr.

²³ Ʋ na wa dɔw a Nahɔɔr baar'a, ʋ cãà na maalɩ yome kɔbr ayi (200), dɔw bidɛbr nɩ pɔwyaar.

²⁴ A Nahɔɔr tɩ tɛr'ɩ yome lɩzɛr'ɩ piwaɩ ɛ́ dɔw Tera.

²⁵ Ʋ na wa dɔw a Tera baar'a, ʋ cãà na maalɩ yome lɩz'a ayʋɔb for bir (119), dɔw bidɛbr nɩ pɔwyaar.

²⁶ A Tera tɩ tɛr'ɩ yome lɩz'a ata nɩ pie ɛ́ dɔw Abram, Nahɔɔr nɩ Haran.

²⁷ A Tera bʋʋrɛ n'ɩ bɛ ŋa: Tera dɔw nɩ Abram, Nahɔɔr nɩ Haran. Haran dɔw Lɔtɩ,

²⁸ ɛ́ de niwn kpi a ʋ sãà Tera ƴãw, a ʋ tẽ-dɔwra Uur na be a Kalde tẽw a pʋɔ.

²⁹ A Abram nɩ a Nahɔɔr tɩ de nɩ pɔwbɛ: a Abram pɔw tɩ dɩ na kɛ́ Saraɩ, ɛ́ a Nahɔɔr pɔw dɩ kɛ́ Mɩlka na ɩ Haran pɔwyaa a. A Haran mɩ̀ cãà tɩ n'ɩ a Ɩsɩka sãà.

³⁰ A Saraɩ bɛ tɩ tɛr bie ɩ, pɔw ãan tɩ n'ʋ.

³¹ A Tera tɩ tɛr'ɩ a ʋ bidɛb Abram nɩ a ʋ yãw Lɔtɩ na ɩ a Haran bidɛb a. Ʋ mɩ̀ tɩ tɛr'ɩ a ʋ bie-pɔw Saraɩ na ɩ a Abram pɔw a. Ʋ tɩ tɛr bɛ na yi n a Uur na be a Kalde tẽw a, k'ʋʋ cen nɩ Kanãa tẽw. Bɛ tɩ cen na tɩ ta Haran kpɩɛr a be.

³² A Tera tɩ maal'ɩ yome kɔbr ayi dɔwlɩ yome anũu (205), ɛ́ kpi a Haran.