Yele-za-pɛr-tib 10 - A SƐB-SÕW

A nɩ-bʋʋrɛ bʋʋrɛ na be a tẽw zu a

¹ A Kʋ̃ɔ-paalʋ-kpɛ̃ɛ pùorí a, a Nowe bidɛbr Sɛ́m, Kam nɩ Zafɛtɩ tɩ dɔw nɩ bibiir. Nyɛ̃ a Nowe bidɛbr bʋʋrɛ yée.

² Zafɛtɩ bidɛbr'ɩ bɛ ŋa: Gomɛɛr, Magɔgɩ, Madaɩ, Yavan, Tubal, Mesɛkɩ nɩ Tɩrasɩ.

³ Gomɛɛr bidɛbr'ɩ bɛ ŋa: Asɩkenaazɩ, Ɩrɩfatɩ nɩ Togarma.

⁴ Yavan bidɛbr'ɩ bɛ ŋa: Elisa, Tarsisɩ, Kitim nɩ Orodanim.

⁵ Bɛl zie n'a a nɩbɛ tĩ bʋ́r yaarɩ kpɩɛr a kʋ̃ɔ-kpɛ̃ɛ-sɔgɔ-ten pʋɔ. Ŋa za tɩ kpɩɛr'ɩ a ʋ tẽw, tu n a ƴɛ̀r-pɛ-bʋʋrɛ ʋ na ƴɛ̀rɛ a, ɛ́ kpɩɛr nɩ-bʋʋrɛ kãw pʋɔ tu n a ʋ dɔwlʋ.

⁶ Kam bidɛbr'ɩ bɛ ŋa: Kusɩ, Mɩsɩrayim, Putɩ nɩ Kanãa.

⁷ Kusɩ bidɛbr'ɩ bɛ ŋa: Seva, Hawila, Savita, Araema nɩ Saviteka. A Araema bidɛbr: Saba nɩ Dedan.

⁸ Kusɩ mɩ̀ tɩ n'ɩ a Nemirodi sãà. A Nemirodi n'ʋ tɩ ɩ a dɛb-gãdaa dãw-niwn sob a tẽw zu.

⁹ A Nemirodi tɩ ɩ n nabawl-kara a Sore zie. Alɛ so bɛ mɩ́ yel kɛ́: «Nabawl-kara a Sore zie mɛ̃ Nemirodi a.»

¹⁰ A ʋ naalʋ-tẽw tẽ-bɛrɛ n'ɩ á ŋá: Babɛl, Ɛrɛkɩ, Akadɩ nɩ Kaline na be a Mezopotami tẽw a.

¹¹ A Nemirodi tɩ yi n a tẽw ŋa pʋɔ cen Asiiri tɩ ŋmãa Nɩnɩɩvʋ, Erehovɔtɩ-Ɩɩr, Kala

¹² nɩ Eresɛn na be a Nɩnɩɩvʋ nɩ a Kala tẽ-kpɛ̃ɛ cara pʋɔ a.

¹³ Mɩsɩrayim tɩ n'ɩ a Ludɩ, Eyinam, Lehavʋ, Nafituwa,

¹⁴ Patʋrɔsɩ, Kasilua nɩ Kafɩtɔɔr ten dem sãàkʋm-kʋra. A Kasilua tẽw dem pʋɔ n'a a Filisɩtɛ̃ mɩnɛ yi.

¹⁵ Kanãa tɩ dɔw nɩ Sɩdɔ̃, a ʋ bi-dãw, ɛ́ dɔw Hɛtɩ.

¹⁶ A Hɛtɩ tɩ n'ɩ a Zebizitɩ, a Amoritɩ, a Gɩrgasitɩ

¹⁷ a Hivitɩ, a Arkitɩ, a Sinitɩ,

¹⁸ a Avaditɩ, a Semaritɩ nɩ a Hamatitɩ mɩnɛ sãàkʋm-kʋra. A pùorí a, a Kanãa tẽw dem yie dɔwlʋ tɩ bʋ́r'a yaarɩ a ziir za,

¹⁹ ɛ́ a bɛ tẽw tɩ tĩ Sɩdɔ̃ ɛ́ cen Geraar lowr tɩ tɔ Gaza, ɛ́ mɩ̀ lɛb cen Sodɔm, Gomɔɔr, Adima nɩ Sevoyim lowr tɩ tɔ Lesa.

²⁰ A Kam bidɛbr'ɩ a bɛ ŋa na bʋ́r bʋ́r tu n a bɛ dɔwlʋ nɩ a bɛ ƴɛ̀rʋ a, a bɛ ten pʋɔ nɩ a bɛ bʋʋrɛ pʋɔ a.

²¹ A Sɛ́m na ɩ a Zafɛtɩ kpɛ̃ɛ a mɩ̀ tɩ dɔw nɩ bidɛbr. Ʋlɛ n'ɩ a Ebɛɛr nɩ a ʋ bʋʋrɛ sãàkʋm-kʋra.

²² Sɛ́m bidɛbr'ɩ bɛ ŋa: Elam, Asuur, Arpakisadɩ, Ludɩ nɩ Aram.

²³ A Aram bidɛbr'ɩ bɛ ŋa: Usɩ, Hul, Getɛɛr nɩ Masɩ.

²⁴ Arpakisadɩ tɩ dɔw nɩ Sela, ɛ̀ Sela dɔw Ebɛɛr.

²⁵ A Ebɛɛr tɩ dɔw nɩ bidɛbr ayi: a dãw-niwn sob dɩ kɛ́ Pelɛgɩ, a pɛr lɛ kɛ́: “Bʋ́rʋ”. Bʋ̃ʋ n'ʋ vɛ̃, a ʋ daar'a a tẽw zu nɩbɛ tɩ bʋ́r bʋ́r. A ʋ yɛb tɩ dɩ na kɛ́ Yɔkɩtan.

²⁶ Yɔkɩtan tɩ dɔw nɩ Almodadɩ, Selɛfʋ, Hasarmawɛtɩ, Yera,

²⁷ Hadoram, Uzal, Dikɩla,

²⁸ Oval, Avimayɛl, Saba,

²⁹ Ofɩɩr, Hawila, Yovavʋ. A Yɔkɩtan bidɛbr'ɩ a bɛ ŋa za.

³⁰ A bɛ kpɛb zie tɩ be n Mesa nɩ a Sefaar tan vuo na be a saa-pɛrɩ́ a cará.

³¹ A Sɛ́m bidɛbr'ɩ a bɛ ŋa na bʋ́r bʋ́r tu n a bɛ dɔwlʋ nɩ a bɛ ƴɛ̀rʋ a, a bɛ ten pʋɔ nɩ a bɛ bʋʋrɛ pʋɔ a.

³² A Nowe bidɛbr dɔwlʋ n'ɩ à à ŋá na tu a lɛ a dɔwfʋ na dɔw tu taa a, nɩ a nɩ-bʋʋrɛ bʋʋrɛ a. A nɩ-bʋʋrɛ za na yaarɩ be a tẽw zu a kʋ̃ɔ-paalʋ-kpɛ̃ɛ pùorí a, bɛl zie n'a bɛ yi.