Títɩ̀ 2 - A SƐB-SÕW

A wulu na tu yel-mɩŋa a

¹ Ɛ́ a fʋ̃ʋ a, wule a nɩbɛ a lɛ na tu a wul-vla a.

² Yel a dɛb-nyamɛ kɛ́ bɛ mɩ́ nyɔw bɛ tʋɔra a dɩb nɩ a nyub pʋɔ, kɛ́ bɛ ƴãwnɛ bɛ tʋɔra, kɛ́ bɛ bãw yã, ɛ́ tɛr naaŋmɩn-sàw-deb na vɩɛl a, nɩ nɔ̃wfʋ nɩ kanyir.

³ Lɛ mɩ̀ n'a, yel kʋ̀ a pɔw-nyamɛ kɛ́ bɛ vʋʋrɛ mɛ̃ nɩ-son a. Bɛ ta ɩ gɛgɛrɩ ɛ, ɛ́ ta ɩ dã-nyúurbɛ ɩ. Kɛ́ bɛ wule a vla,

⁴ lɛ n'a bɛ na wul a pɔw-pɔ́lɛ́ bɛ nɔnɛ a bɛ sɩrbɛ nɩ a bɛ bibiir,

⁵ bɛ bãw yã, ɛ́ ta tɛr pɩ̃ɔ ɩ-ɩrɩ ɛ, bɛ ɩ nɩ-vɩɛlɩ ɛ́ ƴãw fãw kaarɛ a bɛ yir zie, sàwr a bɛ sɩrbɛ nʋɔr, kɛ̀ nɩr za ta tʋ a Naaŋmɩn ƴɛ̀rʋ zʋm ɛ.

⁶ Mɩ̀ kpaalɛ a pɔ́lɛ́ kɛ́ bɛ bãw yã

⁷ a yele za pʋɔ. Ɛ́ a fʋ̃ʋ tɔr za a, ɩ a nɩbɛ cɔwrɛ fʋ a fʋ ɩ-vɩɛlɩ zũú: a fʋ wulu, ʋ vɩɛl ɛ́ sɛw taa nɩ.

⁸ A fʋ ƴɛ̀rʋ, a vɩɛl, nɩr ta tʋ̃ɔ́ nyɛ̃ yel-faa a pʋɔ ɩ, lɛ n'a a dɔ̃ sob na nyɛ̃ vĩ, ʋ na kʋ̃ nyɛ̃ yel-faa kãw za ƴɛ̀rʋ ƴɛ̀r a tɩ ƴãw a.

⁹ A gbãgbaar, bɛ sàwr a bɛ nɩ-bɛrɛ nɛ́ɛ a yele za pʋɔ. Bɛ ɩrɛ nʋ̃ɔ̀ kpɩɛr a bɛ nɩ-bɛrɛ: bɛ ta ƴɛ̀rɛ lɩɛrɛ nɩ bɛ ɩ,

¹⁰ bɛ ta zure bɛ bom kãw za ɩ. Bɛ ɩrɛ vla kʋralɛ taa lɛbr pùor towtow ɛ, lɛ n'a bɛ na tɛr ƴãwfʋ a Naaŋmɩn tɩ Faarɛ wulu ƴãw a yele za pʋɔ.

¹¹ Bʋ̃ʋ n'ʋ vɛ̃, Naaŋmɩn ɩ n a ʋ maalʋ na ɩ a nɩsaalbɛ za faafʋ yib zie a, ʋ sãá.

¹² Ʋ wule tɩ na kɛ́ tɩ zawrɩ a ɩ-faar nɩ a tẽw ŋa zu yel-bɔbrɩ bɛr, tʋ̃ɔ́ bãw yã, ɛ́ ɩ nɩ-mɩn na tɛr Naaŋmɩn ƴãwfʋ a, vʋʋrɛ nɩ a dɩ̃a zie ŋa pʋɔ,

¹³ gùre nɩ a bibi-vla tɩ na tɩɛrɛ a. A bibi-vla ʋl a tɩ Naaŋmɩn-kpɛ̃ɛ nɩ a tɩ Faarɛ Yeezu Kɩrɩta yúor-vɩɛlʋ-danʋ nãà wa sãá a.

¹⁴ Ʋ de nɩ ʋ tʋɔra tɩr a tɩɩm ƴãw, k'ʋʋ faa tɩ a faalʋ za pʋɔ, ɛ́ ɩ tɩ lɩɛbɩ nɩ-bʋʋrɛ na vɩɛl ɛ́ ʋl yõ so a, nɩ-bʋʋrɛ na tʋlɛ a ɩ-vɩɛlɩ maalʋ ƴãw a.

¹⁵ À ŋá n'a a sɛw kɛ́ fʋ ƴɛ̀rɛ, kɛ́ fʋ kpaalɛ bɛ, ɛ́ kpãanɛ bɛ nɩ fãw. Nɩr za taa wa nyɛ̃ fʋ ɩ pʋrɩ ɛ.