Títɩ̀ 1 - A SƐB-SÕW

A Pol puore nɩ a Títɩ̀

¹ Mãa Pol, na ɩ Naaŋmɩn tõ-tõ-bie nɩ Yeezu Kɩrɩta nɩ-tona a, bɛ ƴãw na k'ɩ̃ɩ ɩ a Naaŋmɩn nɩ-kaa-íri tɛr naaŋmɩn-sàw-deb ɛ́ bãw a yel-mɩŋa na tu a Naaŋmɩn ƴãwfʋ a,

² kɛ́ bɛ tɩɛrɛ a nyɔ-vʋʋrʋ na be kʋralɛ a. A Naaŋmɩn na bɛ ŋmarɛ ziri a tɩ ƴãw nɩ nʋɔr k'ʋʋ na kʋ̀ bɛ nɩ a nyɔ-vʋʋrʋ ŋa, ɛ́ a dɩta-pɛ-yome za wa bãw be.

³ A daar na wa ta a, ʋ ɩ n a ʋ ƴɛ̀rʋ sãá hieru ʋ na tõ m k'ɩ̃ɩ hiere a pʋɔ, mɛ̃ a lɛ a Naaŋmɩn tɩ Faarɛ na ƴãw a nʋɔr a.

⁴ Mãa n'ʋ kʋ̀rɛ fʋ a sɛb-tʋɔla ŋa, Títɩ̀ i, fʋ̃ʋ na ɩ ɩ̃ bie tɔr za a naaŋmɩn-sàw-deb tɩ na lãw a pʋɔ a. A Naaŋmɩn Sãà nɩ a tɩ Faarɛ Kɩrɩta Yeezu, bɛ kʋ̀ b maalʋ nɩ ƴã-ɓaarʋ.

A Títɩ̀ tõ-nʋɔr a Kɩrɛtɩ tẽw

⁵ Mãa wa bɛr fʋ a Kɩrɛtɩ a, ɩ̃ bɔbr'a kɛ́ fʋ baa cɔbrɩ a yele a be, ɛ́ zɩɩlɩ nɩ-kore tẽ-kpɛ̃ɛ za pʋɔ, mɛ̃ a lɛ ɩ̃ na wul fʋ a.

⁶ A fɛr'a kɛ́ bɛ za been been ta tɛr sãwna bɛ yere ɩ, bɛ kul pɔw beƴeni, tɛr bibiir na tɛr naaŋmɩn-sàw-deb, ɛ́ nɩr kʋ̃ tʋ̃ɔ́ yel kɛ́ bɛ bɛ ɩrɛ vla, bɩɩ bɛ ɩ n bɛ-wonbɛ a.

⁷ Bʋ̃ʋ n'ʋ vɛ̃, a fɛr'a k'aa Lãw-yir-kaarɛ ta tɛr sãwna bɛ yere ɩ, ʋ na kaarɛ a Naaŋmɩn yele zie a ƴãw: ʋ ta ɩrɛ pɔ̀lʋ ɛ, ta ɩ suur sob ɛ, ʋ ta ɩ dã-nyúure nɩ nɔ-haa-bɔbrɛ ɩ, ʋ ta ɩrɛ nyãnyu-ɩb ɛ.

⁸ A fɛr'a k'ʋʋ nɔnɛ a sãanbɛ nyɔwfʋ, ʋ nɔnɛ a vla, ʋ bãw yã, ɛ́ ɩ nɩ-mɩŋa nɩ nɩ-sõw, bãw ʋ tʋɔra tɛrʋ.

⁹ A fɛr'a k'ʋʋ tu a ƴɛ̀rʋ na sɛwnɩ sàw deb a pùor sɩza, mɛ̃ a lɛ a wulu na bin a. À ŋá n'a ʋ na tʋ̃ɔ́ kpaalɛ a nɩbɛ a wul-vla pʋɔ, ɛ́ wule a bɛ tulu a bɛlɩ dem na ŋmɩɛr a ʋ ƴɛ̀rʋ lɔbr a.

¹⁰ Bɛ-wonbɛ sɩrɩ bɛ dɩ vuo ɩ, baa zuo a za a Zifʋ mɩnɛ bɛl na lɩɛbɩ a kɩrɩta-nɩbɛ a pʋɔ. Bɛ nɔnɛ nɩ ƴɛ̀r-zawlɛ tule nɩ a nɩbɛ.

¹¹ A fɛr'a kɛ́ fʋ ɩ bɛ pàw a bɛ nɛ́ɛ, bʋ̃ʋ n'ʋ vɛ̃, yir-ɓile nɩbɛ tɩɛrʋ n'a bɛ damnɛ nyawr taa, bɛ na mɩ́ wule lɛ a na bɛ sɛw kɛ́ bɛ wule a, ɛ́ a ɩ nyãnyu-tɛra ƴãw a.

¹² A bɛ pʋɔ a, bɛl mɩŋa ƴɛ̀r-manɛ kãw tɩ yel'a: «A Kɩrɛtɩ tẽw nɩbɛ a, zir-ŋmarbɛ nɛbɛ kʋralɛ, wɛ-dʋ̃-faar nɛbɛ, ƴã-to dem na mɩ́ gù dɩb tɛwr'a!»

¹³ Ɛ́ yel-mɩŋa n'ɩ à à ŋá ʋ na yel a. Alɛ so, kpãa bɛ sɩza bɛ tʋ̃ɔ́ tɛr naaŋmɩn-sàw-deb na tori a,

¹⁴ ɛ́ ta tuur a Zifʋ mɩnɛ suolu pùor, nɩ nɩsaalbɛ na gùr pùor cɔw a yel-mɩŋa a nɛ-ƴãwnɩ ɛ.

¹⁵ Bom za vɩɛl'ɩ parpar bɛlɩ dem na vɩɛl parpar a zie. Ɛcɛ bɛlɩ dem dɛwr na mar, ɛ́ bɛ bɛ tɛr sàw-deb a, bom za bɛ vɩɛl parpar a bɛ zie ɩ, a bɛ yã nɩ a bɛ tɩɛrʋ nɩ̃ɛ na mar dɛwr.

¹⁶ Bɛ mɩ́ yel'a kɛ́ bɛ bãw nɩ a Naaŋmɩn, ɛcɛ a bɛ ɩ-ɩrɩ wule kɛ́ lɛ bɛ n'a ɩ. Bɛ kpɛ n faa bɛ pɩɛl ɛ, zu-kpɛn dem na kʋ̃ tʋ̃ɔ́ yel-vla kãw za maalɩ a nɛbɛ.