Sofoni 1 - A SƐB-SÕW

¹ A vuo ʋl pʋɔ a Amɔ̃ bidɛb Zozɩasɩ na tɩ ɩ a Zuda tẽw nãà a, a Sore tɩ ƴɛ̀r'ɩ a ʋ ƴɛ̀rʋ kʋ̀ Sofoni. A Sofoni tɩ ɩ n Kusi bidɛb, a Kusi mɩŋa ɩ Gedalɩa bidɛb, a Gedalɩa ɩ Amarɩa bidɛb, ɛ́ a Amarɩa ɩ Ezekɩasɩ bidɛb.

A Sore na ìr'ɩ a tẽ-daa za ƴãw

² A Sore yere na: «Ɩ̃ na kʋ n bʋ̃-vʋʋra za pàw pɛr a tẽw zu.

³ Ɩ̃ na kʋ n a nɩsaalbɛ nɩ a dʋn pàw pɛr, a saa-zu lili nɩ a zʋ́mɛ́, ɩ̃ na kʋ n a nɩ-faar nɩ a bɛ tõ-faar na ɩrɛ a nɩbɛ bɛ lore a. Ɩ̃ na kʋ n a nɩsaalbɛ za pàw pɛr a tẽw zu.»

A Sore na ìr'ɩ a Zuda nɩ a Zerizalɛm ƴãw

⁴ «Ɩ̃ na ìr'ɩ a Zerizalɛm nɩbɛ ƴãw, nɩ a Zuda nɩbɛ za ƴãw. Ɩ̃ na ɩ na a Báàl puoru ɩ-ɩrɩ al na cãà be a, a bɔr a ka, tɩ lãw nɩ a ŋmɩn ŋa bàwr-maalbɛ yúor.

⁵ Ɩ̃ na kʋ n a bɛlɩ dem na mɩ́ do a garʋ́ tɩ lo vɔblɩ muru ŋmar-bie niŋé a, a bɛlɩ dem na ƴãwnɛ a, ɛ́ mɩ́ pɔ n a ɩ̃ yúor ɛ́ lɛb pɔ n a ŋmɩn Mɩlkɔm yúor a.

⁶ Ɩ̃ na kʋ n a bɛlɩ dem na mɩ́ gùr pùor cɔw a mãa Sore, ɛ́ bɛ mɩ́ bɔbr mɛ̃, ɛ́ bɛ sowre mɛ̃ bom a.»

⁷ Nyɩ ŋmãa vʋʋrʋ a Sore Naaŋmɩn niŋé, bʋ̃ʋ n'ʋ vɛ̃, a bibir ʋl ʋ na na ìr a nɩbɛ ƴãw a pɩɛl'a! A Sore cɔbr'ɩ bàwr, ʋ so n a nɩbɛ ʋ na bʋɔlɩ a dɛwr bɛr baarɩ.

⁸ A Sore yere na: «A bàwr ŋa maalʋ bibir a, ɩ̃ na dɔwr'ɩ a nɩ-bɛrɛ, a nãà bidɛbr nɩ a bɛlɩ dem za na suur nɩ-bʋʋr-yoru suuru a.

⁹ A ʋlɩ bibir nɛ a, ɩ̃ na dɔwr'ɩ a bɛlɩ dem na mɩ́ vár gãw a Ŋmɩn-yir-kpɛ̃ɛ dɩ̃dɔr mɛ̃ a tɩbɛ dem a, a bɛlɩ dem za na mɩ́ paalɩ a bɛ nɩ-kpɛ̃ɛ yir nɩ na-bome bɛ na ɩ nyãnyu-ɩb nɩ po-to-fãw-ɩb páw a.

¹⁰ A Sore yere na, a ʋlɩ bibir nɛ, a Zerizalɛm a, bɛ na wõ n cɛlsɩ a Zʋ́mɛ́ dɩ̃dɔrɩ́, ùoru na ùore nɩ a Tẽ-kpɛ̃ɛ-paala pʋɔ ɛ́ a tãli ɩ gɔmɛ tɛwr.

¹¹ Nyɩ ùore, nyɩɩm Bɔw pʋɔ dem i, bʋ̃ʋ n'ʋ vɛ̃, a bʋ̃-kʋ̀ɔrbɛ za na kpi na, bɛ na kʋ n a yɛ-yɛrbɛ za pàw pɛr.

¹² A ʋlɩ daar nɛ a, ɩ̃ na tɔ̃w nɩ vũu bɔ n a Zerizalɛm tẽw za pʋɔ. Ɩ̃ na ìr'ɩ a nɩbɛ bɛl bom za na bɛ damnɛ a ƴãw, bɛl na ɩ mɛ̃ dãa na tewli gã a dã-pɛr zu a. Bɛ yere nɩ à ŋá: “A Sore kʋ̃ tʋ̃ɔ́ ɩ bom za ɩ, a vla n'a bɩɩ a faa n'a a!”

¹³ A na ɩ à ŋá a, bɛ na za n a bɛ na-bome ɛ́ ŋmɛr a bɛ yie bɛr. Bɛ mɩɛr'ɩ yie ɛ́ kʋ̃ kpɛ a ɩ, bɛ kʋɔr'ɩ divɛ̃ tɩɩr póru ɛ́ kʋ̃ nyũ a divɛ̃ ɩ.»

A Sore bibir

¹⁴ A Sore bibi-kpɛ̃ɛ pɩɛl'a, ʋ pɩɛl'a, ʋ páwr'a tarɛ, a ʋ vɩɛfʋ na ɩ n cɛlsɩ lawlawlaw! A gãdaar tɛɛ za na bʋɔlɛ na kɛ́ bɛ wa faa bɛ.

¹⁵ A bibir ŋa na ɩ n suur bibir, kpɩɛrʋ nɩ pʋl-vʋ̃ɔ bibir, da-lɔbrʋ nɩ sãw-bɛrʋ bibir. Ʋ na ɩ n lige, liw-varkpara bibir, zũzuwe nɩ ulu bibir.

¹⁶ A ʋlɩ bibir a, bɛ na wone nɩ a sojarɩ bɛ pɛblɛ a wɩ́ɛ, ɛ́ ŋmɩɛr a zɛbr cɛlsɩ a tẽ-kpɛn kpɛn ƴãw nɩ a ten á ŋá yir-cõcowli ƴãw.

¹⁷ A Sore yere na: «Ɩ̃ na ƴãw nɩ a nɩsaalbɛ kpɩɛrʋ pʋɔ, bɛ na bɔblɛ na mɛ̃ zɔn a, bɛ na maalɩ yel-bier sãw mɛ̃ a zũú. A bɛ zɩ̃ɩ na cir'a pàw a ziir za, mɛ̃ uuru a, ɛ́ a bɛ kũuni pʋ̃ɔ́ mɛ̃ sagɛ a.»

¹⁸ A bɛ salm-pla nɩ a bɛ salm-zɩɛ kʋ̃ tʋ̃ɔ́ faa bɛ a Sore suur bibir ɛ. A ʋ suur vũu na dɩ n a tẽw za. A na sɩrɩ na ɩrɛ dɛ̃bɩ̃ɛ yaga: ʋ na kʋ n a tẽw zu nɩbɛ za pàw pɛr.