A Yielu za pʋɔ yiel-vla vla 8 - A SƐB-SÕW

¹ Bʋ̃ʋ pãa ɩ fʋ bɛ ɩ a ɩ̃ yɛ-dɛb, na ƴɛnɩ a ɩ̃ mã bɩr a! Ɩ̃ nãá mɩ́ tuori fʋ nɩ a yẽw nyɔw fʋ weri, ɛ́ a nɩbɛ k'ʋʋ mɩ́ yere mɛ̃ ɩ.

² Ɩ̃ nãá mɩ́ tɛr fʋ na kpɛ n a ɩ̃ mã zie, ɛ́ fʋ nãá mɩ́ zanɩ nɩ mɛ̃ nɩ a nɔ̃wfʋ. Ɩ̃ nãá tɩ ƴãw na fʋ nyũ divɛ̃ na nyùur vla a, nɩ a ɩ̃ girenadɩ tɩ-wɔmɛ kʋ̃ɔ.

³ A ʋ gʋba nũu kɔw nɩ a ɩ̃ zu, ɛ́ a ʋ dʋrʋ nũu kãkori mɛ̃.

⁴ «Zerizalɛm pɔwsɩrali i, ɩ̃ zɛlɛ nyɩ nɩ yãayãa, nyɩ ta sɩ̃w a ɩ̃ nɔ̃wfʋ ɛ, nyɩ ta dam ʋ, ʋʋ bɛ sàw sɛr ɛ!»

A pɔwsɩrali

⁵ Ãa n'ɩ a pɔw ŋa na yi a wɛja-kpalɛ pʋɔ waar, ʋlɛ nɩ a ʋ nɩ-nɔna weri taa a? Ɩ̃ sɩ̃wnɛ fʋ nɩ a mãdɩragɔɔr tɩɛ pile, a be a fʋ mã na ŋmãa a fʋ sɩɛ a, a be ʋ na dɔw fʋ a.

A nɔ̃wfʋ kpɛmɛ na mɛ̃ a kũu a A pɔwsɩrale

⁶ Dɔwlɩ mɛ̃ a fʋ socir zu mɛ̃ ŋmaarʋ-bʋ̃-ƴãwna a, mɛ̃ ŋmaarʋ-bʋ̃-ƴãwna a fʋ kpãkpãw zu a. Bʋ̃ʋ n'ʋ vɛ̃, a nɔ̃wfʋ kpɛmɛ na mɛ̃ a kũu a, a nɔ̃wfʋ-nyuur bɛ tɛr tʋ̃ɔ́fʋ mɛ̃ a kpɩmɛ tẽw a ɩ, ʋ ɩ n vũu-zɛl na dɩrɛ a, ʋ mɩ́ siw na mɛ̃ a saa a.

⁷ A kʋ̃ɔ-bɛrɛ za kʋ̃ɔ kʋ̃ tʋ̃ɔ́ a nɔ̃wfʋ vũu kpiiri ɛ, ɛ́ a mamɛ kʋ̃ɔnɩ za kʋ̃ tʋ̃ɔ́ ʋ lim ɛ. Nɩr ɩ mɛ̃ ʋ de nɩ a ʋ yir na-bome za tɛw nɩ a nɔ̃wfʋ a, a lab'a bɛ na la ʋ bɛr.

A yɛ-dɛbr

⁸ Tɩ tɛr'ɩ yeepuul-bile na cãà bɛ yi bɩrɛ sɛr a. Tɩ na ɩ ʋ nɩ ŋmɩn a ʋlɩ bibir bɛ nãà wa ƴɛ̀rɛ a ʋ sɩr kulu ƴɛ̀rʋ a?

⁹ Ʋlɛ tɩ ɩ dacĩ-kpɛ̃ɛ a, tɩ nãá mɛ n salm-pla dacĩ-vɛɛ vɛɛ dɔwlɩ a ʋ zu. Ʋlɛ tɩ ɩ dɩ̃dɔr a, tɩ nãá pàw ʋ na nɩ sɛɛdɩr dàar pan nɩr na kʋ̃ tʋ̃ɔ́ yuo a.

A pɔwsɩrale

¹⁰ A mãa a, ɩ̃ ɩ n dacĩ-kpɛ̃ɛ, ɛ́ a ɩ̃ bɩrɛ ɩ a yir-cõcowli. A lɛ pʋɔ a, a ʋl zie a, ɩ̃ ɩ n a nɩr nɛ na ƴãwnɛ ʋ a nʋ̃ɔ̀ a.

A pɔlbile

¹¹ Salomɔ̃ tɛr'ɩ divɛ̃ tɩɩr púo Baal-Hamon, ɛ́ de ʋ kʋ̀ nɩbɛ bɛ gùre. A fɛr'a kɛ́ ŋa za mɩ́ kʋ̀ ʋ salm-pla libi-ɓɛlɛ túr ɛ́ pɔr a wɔmɛ.

¹² Salomɔ̃ ɔ, fʋ na tʋ̃ɔ́ na tɛr a salm-pla libi-ɓɛlɛ túr, ɛcɛ nyɛ̃ salm-pla libie kɔbr ayi a divɛ̃ tɩɩr púo gùrbɛ ƴãw. Ɛcɛ a ɩ̃ divɛ̃ tɩɩr púo a, mãa mɩŋa n'ʋ na gùre ʋ.

¹³ Fʋ̃ʋ na be a zaadɛ̃ pʋɔ a, a fʋ taabɛ ƴãw nɩ tobr kɛ́ bɛ bɛr wo b. Ɛcɛ mãa zie n'a a fɛr kɛ́ fʋ yel à ŋá:

¹⁴ «Ɩ̃ nɩ-nɔna a, yi zaa a ka fɔ̃w fɔ̃w! Zɔrɛ mɛ̃ mɔlʋ bɩɩ mɛ̃ wal-bile a, tɩ do a tan na nyùur vla a zu!»