A Yielu za pʋɔ yiel-vla vla 7 - A SƐB-SÕW

A pɔwbɛ nɩ a pɔwsɩrali

¹ Sulamitɩ ɩ, lɛb wa, lɛb wa! Lɛb wa, tɩ tʋ̃ɔ́ jɩ́r fʋ kaa. Bʋ̃ʋ n'ʋ so nyɩ jɩ́rɛ a Sulamitɩ na ƴawr bɩnɛ nɩbɛ na bʋ́r ziir ayi ƴawr a pʋɔ?

A pɔlbile

² Nãà pɔwyaa a, nyɛ̃ a fʋ gbɛ́ɛ na vɩɛl a fʋ nafawr pʋɔ a! A fʋ sɩɛ ŋmɛ̃ na mɛ̃ kɔkɔrɩ́ bãw bʋ̃-vɩɛlɩ bãw-maalɛ na maalɩ a.

³ A fʋ nyũo ŋmɛ̃ na mɛ̃ koli-nyúura a, be bɛ na bɛ dãw bɔ divɛ̃ na nyùur vla a gù a. A fʋ púor ɩ na mɛ̃ ble bie bɛ na gbõ taa lisɩ va-puuru viiri koli a.

⁴ A fʋ bɩrɛ a za ayi ɩ na mɛ̃ bʋli ayi a, mɛ̃ mɔlʋ yɩbr ayi a.

⁵ A fʋ nyũu ŋmɛ̃ na mɛ̃ wɔb nyɩmɛ Yir-cõcowla a. A fʋ mimie ɩ na mɛ̃ a Hesibon gbãtaɩ na be a tẽ-kpɛ̃ɛ ŋa yib zie a. A fʋ nyʋɔr vɩɛl'a mɛ̃ a Libã tẽw Yir-cõcowla na gù a zie tori a Damasɩ tẽw a.

⁶ A fʋ zu dʋɔ nɩ dẽdẽ mɛ̃ a Karmɛl tãw a. A fʋ zukɔbr-vɔlavɔla nyɩwrɛ na mɛ̃ pɛn-zɩɛ a, a fʋ zukɔbɛ na pal pal a lɩr'ɩ nãà tɛr.

⁷ Pɔ̀lʋ bɛ na fʋ pɔl ɛ, vɩɛlʋ bɛ na fʋ vɩɛl ɛ, ɩ̃ nɔ̃wfʋ ʋ! Fʋ̃ʋ ɩ̃ nʋ̃ɔ̀ ɔ!

⁸ Fʋ kɛrɩ nɩ farata mɛ̃ kpãkparmɛ tɩɛ a, ɛ́ a fʋ bɩrɛ ɩ a wɔmɛ.

⁹ Ɩ̃ yel'a: «A fɛr'a k'ɩ̃ɩ do a kpãkparmɛ tɩɛ tɩ pɔr a ʋ wɔmɛ!» A fʋ bɩrɛ, a ɩ mɛ̃ divɛ̃ tɩ-wɔ̃-cãacule a a ɩ̃ zie, ɛ́ a fʋ nʋɔr nyũu ɩ mɛ̃ tɩ-wɔmɛ nyũu a!

¹⁰ A fʋ nʋɔr, ʋ nʋmɛ mɛ̃ divɛ̃-nʋ̃ɔ̀ a! Ʋ̃ʋ, divɛ̃-nʋ̃ɔ̀ bɛ na bin a ɩ̃ nɩ-nɔna ƴãw, ʋʋ gbɔlɛ a gʋ̃ɔ-gúrbɛ nɔgbãbie zu a.

A pɔwsɩrale

¹¹ A ɩ̃ nɩ-nɔna so m, ɛ́ mãa n'ʋ ʋ bɔbr.

A nɔ̃wfʋ nʋ̃ɔ̀ A pɔwsɩrale

¹² Ɩ̃ nɩ-nɔna a, wa tɩ yi, tɩ cen tɩ gã a tẽw pʋɔ.

¹³ Biɓaar-pip, tɩ na cen nɩ a divɛ̃ tɩɩr póru pʋɔ. Tɩ na tɩ nyɛ̃ na, a pùre na bɩɩ, a puuru yɩɩrɩ na bɩɩ, a girenadɩ tɩɩr pu na bɩɩ? A be a, ɩ̃ na tɩ wul fʋ nɩ a ɩ̃ nɔ̃wfʋ.

¹⁴ A mãdɩragɔɔr wɔmɛ nyũu yire na. A tɩ dɩ̃dɔrɩ́ a, tɩ tɛr'ɩ a tɩ-wɔm-bʋʋrɛ za na nʋmɛ nʋmɛ a, a paalɛ nɩ a kore. Ɩ̃ nɩ-nɔna a, ɩ̃ bin a nɩ a fʋ ƴãw.