A Yielu za pʋɔ yiel-vla vla 1 - A SƐB-SÕW

¹ A yielu za pʋɔ yiel-vla vla. Ʋ pʋɔ nɩ a Salomɔ̃ sɛbr pʋɔ.

A nɩbɛ ayi na nɔnɛ taa a ƴɛ̀r-sɔw-taa A pɔwsɩrale

² Weri mɛ̃, weri mɛ̃ wɛ! Bʋ̃ʋ n'ʋ vɛ̃, a gbaalʋ fʋ na gbaalɛ mɛ̃ a nʋmɛ na zuo divɛ̃,

³ zuo a fʋ kãá-nyũu. A nɩbɛ nɔnɛ fʋ na mɛ̃ parfɛ̃ na vɩɛl vɩɛl a, alɛ n'a so a pɔwsɩrali kpiir lore a fʋ ƴãw.

⁴ Nyɔw mɛ̃ nũú, vɩrɛ mɛ̃ tɩ lãw zɔrɛ. Ɩ̃ nãà a, tɛr mɛ̃ kpɛ n a fʋ di-gana pʋɔ. Ɩ kɛ̀ nʋ̃ɔ̀ nɩ cɩlʋ tɛr tɩ za ayi yaga za. Tɩ yiele a fʋ gbaalʋ na nʋmɛ zuo divɛ̃ a. A pɔwsɩrali tɛr'ɩ yel-mɩŋa bɛ na kpiir lore a fʋ ƴãw a.

⁵ Zerizalɛm pɔwsɩrali i, sɔbʋ n'a ɩ̃ sɔb, ɛcɛ ɩ̃ pɔ̀l'a mɛ̃ a wɛja-kpalɛ pʋɔ nɩ-yʋɔrɩ pɛnɛ-sɛwr a, mɛ̃ a pɛn-yawlɩ vɩɛlɩ vɩɛlɩ a. Zerizalɛm pɔwsɩrali i,

⁶ nyɩ ta cɛlɛ a ɩ̃ ƴã-gã-sɛbla zie ɩ, a mʋ̃tɔ̃w n'ʋ sɛ̃ m. A ɩ̃ yɛ-dɛbr nyɛ̃ nɩ mɛ̃ nɩ suur, bɛ ƴãw mɛ̃ na ɩ̃ gùre divɛ̃ tɩɩr póru, ɛcɛ a mãa divɛ̃ tɩɩr púo a, ɩ̃ bɛ gù ɛ.

⁷ Fʋ̃ʋ ɩ̃ na nɔnɛ a, yel kʋ̀ m, nyɩnɛ n'a fʋ mɩ́ àr'ɩ a fʋ dʋn? Nyɩnɛ n'a fʋ mɩ́ dùo a a mʋ̃tɔ̃-tuo? A lɛ pʋɔ a, ɩ̃ kʋ̃ ɩ mɛ̃ ɩ̃ zɔrɛ na cɔlɛ a ziir za, a fʋ taabɛ dʋn zie ɩ.

A dʋ̃-cɩ̃ɩnbɛ

⁸ Fʋ̃ʋ na pɔl zuo a pɔwbɛ za a, fʋ̃ʋ bɛ wa bãw a, fʋ̃ʋ yi tuur a píir gbɛ́ɛ, ɛ́ kpa a fʋ bʋli pɩɛl'ɩ a dʋ̃-cɩ̃ɩnbɛ kpɛb ziir.

A pɔlbile

⁹ Ɩ̃ sɛn ɩ, ɩ̃ dier fʋ na manɛ nɩ a wur-vla ʋl na mɩ́ tawr a Eziptɩ tẽw nãà torko a.

¹⁰ A fʋ tokpã-gbɛ̃gbɛlɛ ɩ n a fʋ kɔrɛ vɩɛlʋ lɛb bãw sãá, ɛ́ a fʋ kɔkɔrɩ́ lɛgɛ ɩ a fʋ nyũu vɩɛlʋ sãá.

A dʋ̃-cɩ̃ɩnbɛ

¹¹ Tɩ na maal'ɩ salm-zɩɛ tokpã-gbɛ̃gbɛlɛ na ƴãw salm-pla kpãakpule a kʋ̀ b.

A pɔwsɩrale

¹² A ɩ̃ nãà na mɩ́ dɩrɛ a, a ɩ̃ náàr parfɛ̃ nyũu mɩ́ nyu na pàw a zie.

¹³ A ɩ̃ nɩ-nɔna ɩ n a ɩ̃ zie mɛ̃ mɩ́ɩ̀r na ƴãw vʋɔle pʋɔ be a ɩ̃ bɩrɛ cara pʋɔ a tɩ̃ɩsɔw a.

¹⁴ A ɩ̃ nɩ-nɔna ɩ n a ɩ̃ zie mɛ̃ hene puuru, na be Ɛɩn-Gedi divɛ̃ tɩɩr pʋɔ a.

A pɔlbile

¹⁵ Nyɛ̃ fʋ na pɔl a, ɩ̃ sɛn ɩ, nyɛ̃ fʋ na pɔl a! A fʋ mimie vɩɛl'a mɛ̃ naŋmamɛ a.

A pɔwsɩrale

¹⁶ A fʋ̃ʋ mɩ̀ a, ɩ̃ nɩ-nɔna a, fʋ pɔ̀l'a, fʋ sɩrɩ na pɔl! A mɔ̃-ɓaar'ɩ a tɩ bʋ̃-gana.

¹⁷ A sɛɛdɩr tɩɩr'a ɩ a tɩ yir wɛwr, ɛ́ a sɩpɩrɛ tɩɩr ɩ a tɩ dacine.