Sɛb-sõw yielu 96 - A SƐB-SÕW

Sɛb-sõw yielu 96 (95) sob Yiel-paala a Sore na waar a ƴãw

¹ Nyɩ yieli yiel-paala danɩ nɩ a Sore, tẽ-daa nɩbɛ za a, nyɩ yiele danɛ nɩ a Sore.

² Nyɩ yiele danɛ nɩ a Sore, nyɩ íre a ʋ yúor. Nyɩ hiere yere a ʋ faafʋ bibir za na vɩɛrɛ a.

³ Nyɩ manɛ a ʋ yúor-vɩɛlʋ-danʋ a nɩ-bʋʋr-yoru sɔgɔ, nyɩ manɛ a ʋ nɔ-ɓã-yel-maalɩ a nɩ-bʋʋrɛ za sɔgɔ.

⁴ A Sore sɩrɩ na ɩ kpɛ̃ɛ ɛ́ sɛwnɩ kɛ́ bɛ danɛ ʋ, bɛ́ zɔrɛ ʋ, ʋ na gãw a ŋmɩmɛ za a.

⁵ A nɩ-bʋʋr-yoru ŋmɩmɛ ɩ n bʋ̃-zawlɛ, ɛcɛ a Sore n'ʋ maalɩ a salom.

⁶ Vɩɛlʋ nɩ cãà n'a be a ʋ niŋé, kpɛnʋ nɩ dɛpaalʋ n'a be a ʋ yir pʋɔ.

⁷ Tẽw zu nɩ-bʋʋrɛ ɛ, nyɩ bãwnɩ a Sore yúor-vɩɛlʋ-danʋ nɩ a ʋ kpɛnʋ,

⁸ nyɩ íre a ʋ yúor-vɩɛlʋ-danʋ, nyɩ wa n a nyɩ de-kʋ̀b bome, nyɩ kpɛ a ʋ yir davʋrɩ pʋɔ.

⁹ Nyɩ mɩ́ gbĩ dume gũu tɩ tɔ a tẽw a Sore niŋé, a lɛn daar ʋ na mɩ́ wul a ʋ sonu a, tẽ-daa za nɩbɛ ɛ, nyɩ màwr a ʋ niŋé.

¹⁰ Nyɩ yel kʋ̀ a nɩ-bʋʋrɛ za: «A Sore ɩ n nãà, a na ɩ lɛ a, a tẽ-daa kpɛmɛ na àr, ʋ bɛ dam damnʋ ɛ. A Sore mɩ́ dɩ n a ƴɛ̀rʋ nɩ mɩnʋ kʋ̀ a nɩ-bʋʋrɛ.»

¹¹ A salom, ʋ cɩlɛ, ɛ́ a tẽw cɩlɛ ƴawr'ɩ, a kʋ̃ɔ-kpɛ̃ɛ, ʋ damnɛ, nɩ a bome al za na paalɩ ʋ a.

¹² A wɩ̀ɛ, ʋ cɩlɛ, lãwnɩ a bome za na be a pʋɔ a. A tuwr tɩɩr za, a cáarɛ nʋ̃ɔ̀ cáarʋ

¹³ a Sore niŋé, ʋ na waar a ƴãw, ʋ waar'a, k'ʋʋ wa dɩ n a tẽw ƴɛ̀rʋ, ʋ na dɩ n nɩ a tẽ-daa a ƴɛ̀rʋ nɩ mɩnʋ, ɛ́ dɩ n a nɩ-bʋʋrɛ a ƴɛ̀rʋ a tu yel-mɩŋa.