Sɛb-sõw yielu 94 - A SƐB-SÕW

Sɛb-sõw yielu 94 (93) sob Naaŋmɩn, yel-faa san-yarɛ

¹ Fʋ̃ʋ Naaŋmɩn na mɩ́ yáa a yel-faa san a, Sore e, Naaŋmɩn na mɩ́ yáa a yel-faa san a, wul fʋ tʋɔra!

² Tẽ-daa ƴɛ̀r-dɩrɛ ɛ, ìr, ya a pɔ̀lʋ dem a bɛ ɩ-ɩrɩ san.

³ Sore e, a nɩ-faar cɩlɛ na, na tɩ ta n debor? Debor daar'a bɛ na cɩlɛ tɩ ta?

⁴ Bɛ mɩ́ tɛr'ɩ pɔ̀l-ƴɛ̀rʋ, ƴɛ̀rɛ nyɔka-ƴɛ̀rʋ, bɛ mɩ́ pɔrɛ na, a nɩbɛ bɛ ŋa za na ɩrɛ faa a.

⁵ Sore e, bɛ ɩrɛ na a kpɩɛr a fʋ nɩ-bʋʋrɛ, bɛ dɔwrɛ nɩ a nɩbɛ fʋ na so a.

⁶ Bɛ mɩ́ kʋ n a pɔw-kʋɔr nɩ a nʋʋra zawla, bɛ mɩ́ kʋ n a bi-kpebe.

⁷ Ɛ́ mɩ́ yere: «A Sore bɛ nyɛrɛ bom za ɩ, a Zakɔb Naaŋmɩn bɛ cɛlɛ be ɩ.»

⁸ Nyɩ wone, nyɩɩm na gem tɩ maal zuo a! Dãbole bɛ ŋa, debor'a nyɩ na bãw a yã?

⁹ A Sore na ƴãw a nɩsaal a tobr a bɛ wone bɩɩ? Ʋl na maal a mimie ƴãw ʋ a, bɛ nyɛrɛ bɩɩ?

¹⁰ Ʋl na kpãa nɩ-bʋʋr-yoru a, bɛ ƴãwnɛ dɔwrʋ bɩɩ? A Sore na mɩ́ kʋ̀ a nɩsaalbɛ a bãwfʋ a,

¹¹ ʋ bãw nɩ a bɛ za pʋ-tɩɛrʋ: tɩɛr-zawlɛ n'a!

¹² Sore e, zu-nʋ̃ɔ̀ sob'ɩ a sob nɛ fʋ na mɩ́ kpãa a, a fʋ wulu na mɩ́ ɩ k'ʋ zanɩ yã a.

¹³ Ʋ na tʋ̃ɔ́ na mɩ́ zɩ̃ zoom a bibi-faar bibir, ɛ́ gùre bɛ wa tɩ tuw bɔw a nɩ-faar ƴãw.

¹⁴ Bʋ̃ʋ n'ʋ vɛ̃, a Sore bɛ bɛrɛ a ʋ nɩ-bʋʋrɛ ɩ, ʋ bɛ zawrɛ a nɩbɛ ʋ na so a bɛrɛ ɩ.

¹⁵ A ƴɛ̀rʋ na mɩ́ lɛb'a dɩ a tu a yel-mɩŋa, ɛ́ a soci-dẽdẽ dem za na mɩ́ sàw na.

¹⁶ Ãa n'ʋ na ìr ƴɛ̀r faa mɛ̃ a nɩ-faar bɛ ŋa nuru pʋɔ? Ãa n'ʋ na kpɛ m, ɛ́ bɛr a yel-fa-maalbɛ bɛ ŋa?

¹⁷ A Sore bɛ tɩ sõw mɛ̃ a, ɩ̃ kʋ̃ʋ yaa kɛ́ ta a gbili tẽw ɛ.

¹⁸ Mãa wa yere kɛ́: «Ɩ̃ lore na», Sore e, a fʋ nɔ̃wfʋ mɩ́ tɩɛ mɛ̃ na tɛr.

¹⁹ A tɩɛrʋ na mɩ́ tɩ zuo mɛ̃ a, a fʋ mɔwlʋ mɩ́ ɩ m'ɩ nʋ̃ɔ̀.

²⁰ Fʋ̃ʋ nɩ a ƴɛ̀r-dɩ-faar dem na tʋ̃ɔ́ na wõ taa a? A bɛl na bɛ tuur a nɛ́ɛ, ƴãw a kpɩɛrʋ a nɩbɛ a?

²¹ Bɛ mɩ́ bɔbr'ɩ a nɩ-mɩn nyɔ-vʋʋrʋ íru, ɛ́ a nɩbɛ na bɛ sãw a, bɛ mɩ́ yel kɛ́ bɛ sãw na.

²² Ɛcɛ a Sore n'ʋ lɩɛbɩ a ɩ̃ zɛbr-yir-kpɛ̃w, a ɩ̃ Naaŋmɩn n'ɩ a pì-kpɛ̃w ɩ̃ na taw lanɩ a.

²³ Ʋ na ɩ na a bɛ sãwna lɛb lo a bɛ zu, a bɛ po-tuolu n'a ʋ na kʋ n bɛ pàw pɛr, a Sore tɩ Naaŋmɩn na kʋ bɛ na pàw pɛr.