Sɛb-sõw yielu 92 - A SƐB-SÕW

Sɛb-sõw yielu 92 (91) sob Nyɛ̃ a Sore danʋ na tɛr nʋ̃ɔ̀ a

¹ Sɛb-sõw yielu. Yielu a pɩ̃ɛnʋ-bibir ƴãw.

² Sore e, nyɛ̃ a fʋ danʋ na tɛr nʋ̃ɔ̀ a, nɩ bɛ na na yiele íre nɩ a fʋ yúor a, fʋ̃ʋ Naaŋmɩn-na-do-saa-bɛ-pɩɛl-a!

³ Nyɛ̃ a fʋ nɔ̃wfʋ manʋ a biɓaara, nɩ a fʋ na ŋmɛ̃ fʋ ŋmɛ̃a a manʋ a tɩ̃ɩsɔw na tɛr nʋ̃ɔ̀ a,

⁴ bɛ na na mɩ́ ŋmɩɛr a korijom, a pɛ̀nɛ́, nɩ a kãkaara manɛ nɩ a!

⁵ Sore e, a fʋ tome ɩrɛ mɛ̃ nɩ nʋ̃ɔ̀, ɩ̃ mɩ́ nyɛ̃ nɩ a fʋ nuru tome ŋmɩɛr nʋ̃ɔ̀ cɛlsɩ.

⁶ Sore e, a fʋ tome sɩrɩ na ɩ tõ-bɛrɛ, ɛ́ a fʋ tɩɛrʋ zulme!

⁷ A dãbol sob bɛ bãw bom za a pʋɔ ɩ, a gẽgemi sob bɛ bãw a pɛr towtow ɛ.

⁸ A nɩ-faar mɩ́ búle na mɛ̃ a mʋ̃ɔ a, a yel-fa-maalbɛ mɩ́ ɩ n nɩbɛ, ɛcɛ wɛb'a bɛ nãà wɛ a baarɩ.

⁹ Ɛcɛ fʋ̃ʋ a, Sore e, fʋ ɩ n kpɛ̃ɛ kʋralɛ.

¹⁰ A fʋ dɔ̃ dem ƴãw a, Sore e, a fʋ dɔ̃ dem na wɛ na, ɛ́ a yel-fa-maalbɛ zɔ yaarɩ kpele!

¹¹ Fʋ kʋ̀ m'ɩ wɛ-náab fãw, fʋ cir'ɩ kãa-nyũu ƴãw mɛ̃.

¹² Ɩ̃ nyɛ̃ nɩ a ɩ̃ dɔ̃ dem bɛ na zɛb tʋ̃ɔ́ a, ɩ̃ wone nɩ a nɩ-faar na ìr'ɩ mɛ̃ a zɛbr a.

¹³ A nɩ-mɩŋa kɛrɛ na mɛ̃ kpãkparmɛ tɩɛ a, ʋ ìre na dúor mɛ̃ Libã tẽw sɛɛdɩr tɩɛ a.

¹⁴ Bɛ sɛl ʋ na mɛ̃ tɩɛ a, a Sore Ŋmɩn-yir-kpɛ̃ɛ pʋɔ, ʋ kɛrɛ nɩ a tɩ Naaŋmɩn davʋrɩ pʋɔ.

¹⁵ Ʋ tɛr'a tɩ kor, ɛ́ cãà wɔnɛ, ʋ cãà na ɩ ɓaarɓaar, ɛ́ a váar ɩ va-sɛbl,

¹⁶ k'ʋʋ wul k'aa Sore ɩ n nɩ-dẽdẽ, ʋ ɩ n a ɩ̃ pì-kpɛ̃w, ziri za bɛ ka a ʋ zie ɩ.