Sɛb-sõw yielu 90 - A SƐB-SÕW

SƐBR ANAAR SOB 90—106 Sɛb-sõw yielu 90 (89) sob Nɩsaal bɛ tɛr tʋ́ɔr ɛ

1 A Naaŋmɩn nɩr Moyiir puoru.

¹ A Naaŋmɩn nɩr Moyiir puoru. Sore e, yome yome za, fʋ̃ʋ n'ʋ tɩ ɩ a tɩ sɔwlʋ zie.

² A tan na bɛ tɩ yi sɛr a, a tẽsɔw nɩ a zie na bɛ tɩ be sɛr a, fʋ tɩ ɩ n a Naaŋmɩn dɩta-pɛ-yome za, ɛ́ na ɩ ʋ kʋralɛ.

³ Fʋ mɩ́ ɩ na a nɩsaalbɛ lɛb lɩɛbɩ tanɛ, ɛ́ fʋ yel bɛ: «Nyɩ lɛb cen a be nyɩ na yi wa a.»

⁴ Yome túr a fʋ zie ɩ na mɛ̃ zãa bibir na tɔl a, bɩɩ mɛ̃ tɩ̃ɩsɔw tɛm ɓile blã a.

⁵ Fʋ mɩ́ de nɩ a nɩsaalbɛ nyɔ-vʋʋrʋ tɔl'ɩ, ʋ mɩ́ cɛlɩ na mɛ̃ gʋ̃ɔ fʋ na gúr ŋmãa ŋmãalɛ a. Ʋ ŋmɛ̃ na taa nɩ a mʋ̃ɔ na bule a.

⁶ A biɓaara a, ʋ mɩ́ pure na, ʋ mɩ́ kɛrɛ na. A zaanʋɔra, ʋ vàrɛ, ʋ kò na!

⁷ A fʋ suur baarɩ tɩ na, a fʋ su-yãyaar ƴãw tɩ nɩ pʋl-vʋ̃ɔ.

⁸ Fʋ bin nɩ a tɩ sãwna a fʋ niŋé, ɛ́ a fʋ cãà caalɛ a tɩ yel-sɔwlɩ.

⁹ A fʋ suur zũú n'a a tɩ bibie báarɛ. A tɩ yome mɩ́ baar'a mɛ̃ vʋʋrʋ fʋ na vʋʋrɩ daƴen a!

¹⁰ A tɩ yome nʋɔr mɩ́ ɩ n lɩz'a ata nɩ pie, lɩz'a anaar, nɩr yawra wa vɩɛl a, ɛcɛ a yaga zie mɩ́ ɩ n kpɩɛrʋ nɩ bàlʋ zawla, a mɩ́ zɔ na tɔl fɔ̃w, ɛ́ tɩ tɔl.

¹¹ Ãa n'ʋ bãw a lɛ a fʋ suur na sɛw a? Ʋ ɩ n kpɛ̃ɛ sɛw a lɛ tɩ na ƴãwnɛ fʋ a.

¹² Wul tɩ tɩ bãw a tɩ bibie sɔ́rʋ, lɛ n'a tɩ na tɛr yã-bãwnɛ tɩɛrʋ.

¹³ Sore e, debor'a fʋ na nyɛ̃ a suur tɩ ta? Lɛb wa, zɔ a fʋ tõ-tõ-biir nɩbaalʋ.

¹⁴ A zie mɩ́ wa vɩɛrɛ wa báarɛ a, fʋ̃ʋ mɩ́ paalɩ tɩ nɩ a fʋ nɔ̃wfʋ, ɛ́ tɩ na mɩ́ yiele na ŋmɩɛr'ɩ nʋ̃ɔ̀ cɛlsɩ a tɩ nyɔ-vʋʋrʋ daar za.

¹⁵ Ɩ nʋ̃ɔ̀ kpɛ tɩ man a bibie nʋɔr fʋ na ɩ tɩ nyɛ̃ vĩ a, a yome nʋɔr tɩ na nyɛ̃ a kpɩɛrʋ a.

¹⁶ A fʋ tome, a sãá tɩ nyɛ̃, ɛ́ a tɩ bibiir nyɛ̃ a fʋ vɩɛlʋ!

¹⁷ A Sore tɩ Naaŋmɩn, ʋ tɛr su-nʋ̃ɔ̀ a tɩ ƴãw, ɛ́ ɩ kɛ̀ maalʋ yi a tɩ nuru tome pʋɔ a tɩ ƴãw, ɩ kɛ̀ maalʋ yi a tɩ nuru tome pʋɔ.