Sɛb-sõw yielu 9 - A SƐB-SÕW

Sɛb-sõw yielu 9 sob A Sore n'ɩ a nan dem nɩ a bɛlɩ dem bɛ na dɔwrɛ a faarɛ

¹ A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Bɛ mɩ́ ŋmɩɛr'ɩ bʋ̃-ŋmɩɛrɩ ƴãwn. Daviir yielu kãw n'ʋ.

² Sore e, ɩ̃ na puore fʋ nɩ barka nɩ ɩ̃ pʋɔ za, ɩ̃ na lɛb'a manɛ a fʋ nɔ-ɓãa-yele za.

³ Nʋ̃ɔ̀ na ɩrɛ mɛ̃ na, ɩ̃ɩ cɩlɛ a fʋ ƴãw, ɩ̃ na yiele na íre nɩ a fʋ yúor, fʋ̃ʋ Naaŋmɩn-na-do-saa-bɛ-pɩɛl-a.

⁴ A ɩ̃ dɔ̃ dem lɩɛb'a zɔ, bɛ kaw na tɩ lo kpi a fʋ niŋé.

⁵ Fʋ kpɛ m'a, fʋ dɩ n a ƴɛ̀rʋ vla kʋ̀ m. Fʋ zɩ̃ n a fʋ naalʋ-dà-kɔw zu, ɩ ƴɛ̀r-dɩrɛ na tuur yel-mɩŋa a.

⁶ Fʋ dɔwr'ɩ a nɩ-bʋʋr-yoru, fʋ ɩ na a nɩ-faar kpi, a bɛ yúor bɛ cãà pore dɩ̃a nɩ bio ɛ.

⁷ A dɔ̃ sob yele baar'a, ʋ bɛ lɛb tɛr ɩb za towtow ɛ. Fʋ ŋmɛr'ɩ tẽ-bɛrɛ bɛr, bɛ yiir'ɩ a yele.

⁸ Ɛcɛ a Sore dɩrɛ nɩ naalʋ kʋralɛ, ʋ bà n a ʋ naalʋ-dà-kɔw a ƴɛ̀rʋ-dɩb ƴãw.

⁹ Ʋlɛ n'ʋ dɩrɛ nɩ a tẽ-daa a ƴɛ̀rʋ nɩ mɩnʋ, ɛ́ mɩ́ bãw a nɩ-bʋʋrɛ yele kʋ̀ bɛ a tu sɔ́r.

¹⁰ A Sore n'ɩ a sob nɛ bɛ na dɔwrɛ a sɔwlʋ zie, a sɔwlʋ zie a kpɩɛrʋ daar.

¹¹ A bɛlɩ dem na bãw fʋ a, bɛ́ ɩrɛ ƴãwn a fʋ ƴãw! Sore e, fʋ bɛ zawrɛ a bɛlɩ dem na bɔbr fʋ a bɛrɛ ɩ.

¹² Nyɩ yiele danɛ nɩ a Sore na kpɩɛr a Sɩyɔ̃ tẽw pʋɔ a, nyɩ manɛ a ʋ tõ-bɛrɛ a nɩ-bʋʋrɛ sɔgɔ,

¹³ bʋ̃ʋ n'ʋ vɛ̃, ʋ mɩ́ sowr'ɩ a nɩ-kʋrbɛ a san, ʋ mɩ́ tɛr'ɩ a nɩbɛ bɛ na kʋ a tɩɛrʋ, ʋ bɛ yiire a kpɩɛrʋ dem na kone cɔwr ʋ a bɛrɛ ɩ.

¹⁴ Sore e, zɔ ɩ̃ nɩbaalʋ! Nyɛ̃ a kpɩɛrʋ a ɩ̃ dɔ̃ dem na ɩ k'ɩ̃ nyɛrɛ a, fʋ̃ʋ na na tʋ̃ɔ́ faa mɛ̃ a kũu nuru pʋɔ a.

¹⁵ Lɛ n'a ɩ̃ na danɩ fʋ a dan-bʋʋrɛ za, a Sɩyɔ̃ tẽw pʋɔ, ɛ́ cɩlɛ ƴawr'ɩ, fʋ na faa mɛ̃ a ƴãw.

¹⁶ A nɩ-bʋʋr-yoru lo n a bɔw-zulu bɛ na tuw a pʋɔ, a bɛ gbɛ́ɛ mɩl'ɩ a mɩ̃ɛ bɛ na sɔwlɩ a.

¹⁷ A Sore ɩ na bɛ bãw ʋ, ʋ dɩ n a ƴɛ̀rʋ, a nɩ-faa lɛb'a kpɛ a ʋ mɩŋa bɛra pʋɔ. bàalʋ bàalʋ ŋmɛb Tɛw-àrʋ

¹⁸ A nɩ-faar, bɛ lɛb cen a kpɩmɛ tẽw, a nɩ-bʋʋr-yoru bɛ ŋa za na yiiri a Naaŋmɩn bɛr a.

¹⁹ Ɛcɛ Naaŋmɩn bɛ yiire a nã́w sob bɛrɛ ɩ, a su-siwri dem tɩɛrʋ bɛ be nãà wɛ ɩ.

²⁰ Sore e, ìr! Ta sàw a nɩsaal tʋ̃ɔ́ ɩ! A nɩ-bʋʋr-yoru ƴɛ̀rʋ, ʋ dɩ a fʋ niŋé!

²¹ Ɩ kɛ́ dɛ̃bɩ̃ɛ ɩrɛ a nɩ-bʋʋr-yoru, Sore e, bɛ bãwnɩ a bɛ na ɩ nɩsaalbɛ tɛwr a.