Sɛb-sõw yielu 89 - A SƐB-SÕW

Sɛb-sõw yielu 89 (88) sob A lɛ a Sore na yel a Daviir zie, k'ʋʋ na ɩ na a, a ɩ n ŋmɩn?

¹ A Tẽ-bie Etan yielu na wule yã a.

² Sore e, ɩ̃ na yiele nɩ a fʋ nɔ̃wfʋ yele kʋralɛ, a ɩ̃ nʋɔr na manɛ nɩ a fʋ na ŋmɛ̃ fʋ ŋmɛ̃a a yome yome za.

³ Ɩ̃ yere nɩ à ŋá: A fʋ nɔ̃wfʋ be n be kʋralɛ, a fʋ na ŋmɛ̃ fʋ ŋmɛ̃a a kpɛmɛ na gã a salom zu.

⁴ Fʋ yel'ɩ à ŋá: «Ɩ̃ bin nɩ wõ-taa mãa nɩ a ɩ̃ nɩ-kaa-íra cara pʋɔ, a ɩ̃ tõ-tõ-bie Daviir'ʋ, ɩ̃ pɔ na yel ʋ:

⁵ A fʋ pùorí a, a fʋ bʋʋrɛ kãw n'ʋ na mɩ́ dɩ a naalʋ kʋralɛ. À ŋá n'a ɩ̃ na mɛ a fʋ naalʋ-dà-kɔw ʋ gã yome yome za.» Tɛw-àrʋ

⁶ Sore e, a salom zu malkɩ mɩnɛ, bɛ danɛ fʋ, a fʋ nɔ-ɓãa-yele fʋ na maalɛ a ƴãw, a bɛ lãw, ʋ danɛ a fʋ na ŋmɛ̃ fʋ ŋmɛ̃a a.

⁷ Ãa n'ʋ zɛ̃ taa nɩ a Sore a saa-zu? A naaŋmɩmɛ pʋɔ a, ãa n'ʋ na tʋ̃ɔ́ de ʋ tʋɔra manɛ nɩ ʋ?

⁸ A malkɩ mɩnɛ lãw pʋɔ a, a Naaŋmɩn bɛ tɛr dɩ̃ɛnʋ ɛ, ʋ bɛ tɛr dɩ̃ɛnʋ a bɛlɩ dem za na jil koli ʋ a zie ɩ.

⁹ Sore Naaŋmɩn Kpɛnʋ-za-sob i, ãa n'ʋ ŋmɛ̃ mɛ̃ a fʋ̃ʋ a? Fãw nɩ fʋ na ŋmɛ̃ fʋ ŋmɛ̃a a viir'a koli fʋ.

¹⁰ Fʋ̃ʋ n'ʋ mɩ́ tʋ̃ɔ́ a kʋ̃ɔ-kpɛ̃ɛ na mɩ́ ɩrɛ pɔ̀lʋ a, ɛ́ mɩ́ ɩ a ʋ kʋ̃ɔ-mie na ìre dúor a, a lɛb gã zoom.

¹¹ Fʋ̃ʋ n'ʋ cɔ̀r a Arahab kʋ, ɛ́ ƴɛ́r ʋ ŋmɛr, ɛ́ diw a fʋ dɔ̃ dem yaarɩ nɩ kpãkpãw kpɛ̃w.

¹² Fʋ̃ʋ só a salom, ɛ́ mɩ̀ só a tẽw, fʋ̃ʋ n'ʋ maalɩ a tẽ-daa nɩ a bome na paalɩ ʋ a.

¹³ Fʋ̃ʋ n'ʋ ír a saa-pɛrɩ́-gʋba-lowr nɩ a saa-pɛrí-dʋrʋ-lowr. A Tabɔɔr nɩ a Hɛrmɔ̃ tan wa wõ a fʋ yúor a, a mɩ́ ŋmɩɛr'ɩ nʋ̃ɔ̀ cɛlsɩ.

¹⁴ A fʋ kpãkpãw kpɛmɛ nɩ yaga, a fʋ nũu kpɛmɛ na, a fʋ dʋrʋ nũu zɛw na.

¹⁵ A mɩnʋ nɩ a yel-na-tu-sɔr-a, alɛ n'a fʋ dɩrɛ nɩ a naalʋ. Nɔ̃wfʋ nɩ yel-mɩŋa mɩ́ de b'ɩ niwn.

¹⁶ Zu-nʋ̃ɔ̀ dem'ɩ a bɛlɩ dem na bãw a nʋ̃ɔ̀ cáarʋ cáarɛ a fʋ ƴãw a, Sore e, a fʋ niwn cãà caalɛ bɛ na bɛ cere.

¹⁷ Bɛlɛ wa wõ a fʋ yúor a, nʋ̃ɔ̀ mɩ́ ɩrɛ bɛ na bɛ ƴawr bibie za. A fʋ mɩnʋ zũú n'a bɛ mɩ́ zɛwr bɛ tʋɔra.

¹⁸ Fʋ̃ʋ sɩrɩ n'ɩ a bɛ vɩɛlʋ nɩ a bɛ fãw. A fʋ nɔ̃wfʋ zũú n'a tɩ mɩ́ zɛw a zu.

¹⁹ Fʋ̃ʋ só a tɩ gùre, Sore e, Ɩsɩrayɛl Naaŋmɩn na ɩ sõw a, fʋ̃ʋ só a tɩ nãà.

²⁰ Fʋ tɩ wul'ɩ fʋ tʋɔra bibir kãw a fʋ bárɩ zie, ɛ́ ƴɛ̀r à ŋá a bɛ zie: «Ɩ̃ sõw nɩ gãdaa kãw, ɩ̃ dáa nɩ a ɩ̃ nɩ-bʋʋrɛ pɔlbile kãw ƴãw niŋé.

²¹ Ɩ̃ nyɛ̃ nɩ a ɩ̃ tõ-tõ-bie Daviir, ɩ̃ cir'ɩ a ɩ̃ kãá-sõw ƴãw a ʋ zũú.

²² A ɩ̃ nũu na tɩɛ ʋ nɩ kpɛ̃w kpɛ̃w, ɛ́ a ɩ̃ kpãkpãw ɩ k'ʋ kpɛmɛ.

²³ A dɔ̃ sob kʋ̃ tʋ̃ɔ́ bɛlɩ ʋ nyɔw ɛ, a nɩ-faa kʋ̃ tʋ̃ɔ́ ɩ k'ʋ nyɛ̃ vĩ ɛ.

²⁴ Ɩ̃ na kʋ n a ʋ dɔ̃ dem a ʋ niŋé, ɩ̃ na pɔb'ɩ a ʋ bɛ-nɔnbɛ.

²⁵ A ɩ̃ yel-mɩŋa nɩ a ɩ̃ nɔ̃wfʋ na be n a ʋ zie, ɛ́ mãa n'ʋ na so ʋ mɩ́ zɛw a zu.

²⁶ Ɩ̃ na ɩ na ʋ dɩrɛ naalʋ a kʋ̃ɔ-kpɛ̃ɛ zu nɩ a mamɛ zu.

²⁷ Ʋ na mɩ́ yel mɛ̃ na: “Fʋ ɩ n ɩ̃ Sãà, fʋ ɩ n ɩ̃ Naaŋmɩn, a pì-kpɛ̃w na faarɛ mɛ̃ a!”

²⁸ Ɛ́ mãa a, ɩ̃ na ɩ na ʋ ɩ a ɩ̃ bidɛb-kpɛ̃ɛ, a ʋl na do gãw a tẽw zu na-mɩnɛ a.

²⁹ Ɩ̃ na nɔnɛ ʋ nɩ kʋralɛ, ɩ̃ na tu n a ɩ̃ wõ-taa ɩ̃ na maal'ɩ ʋ a pùor vla.

³⁰ Ɩ̃ na ɩ na a ʋ bʋʋrɛ kãw dɩrɛ naalʋ kʋralɛ, ɛ́ a ʋ naalʋ na cɛlɩ na mɛ̃ a salom a.

³¹ A ʋ bibiir wa zawrɩ a ɩ̃ wulu bɛr a, bɛlɛ bɛ mɩ́ wa tu a lɛ ɩ̃ na mɩ́ yel a,

³² bɛlɛ wa gãwnɛ a ɩ̃ nʋɔr a, bɛlɛ bɛ wa sàwr a ɩ̃ nɛ-ƴãwnɩ a,

³³ dabɔl'ʋ ɩ̃ na de kpãa nɩ bɛ a bɛ nʋɔr-zawrʋ ƴãw, ŋmɛb'a ɩ̃ na ŋmɛ bɛ wul a bɛ sãwna.

³⁴ Ɛcɛ ɩ̃ na cãà na tɛr a ɩ̃ nɔ̃wfʋ a bɛ zie, a ɩ̃ na ŋmɛ̃ ɩ̃ ŋmɛ̃a a bɛ ɩrɛ ziri ɛ.

³⁵ Ɩ̃ kʋ̃ sãw a ɩ̃ wõ-taa bɛr ɛ, a lɛ ɩ̃ na yel a, ɩ̃ bɛ lɩɛbɛ bɛrɛ ɩ.

³⁶ Mãa na ɩ sõw a, daƴen n'a ɩ̃ pɔ à ŋá: ɩ̃ kʋ̃ ŋmãa ziri towtow kʋ̀ a Daviir ɛ.

³⁷ A ʋ bʋʋrɛ na be n be kʋralɛ, a ʋ naalʋ-dɩb na cɛlɩ nɩ a ɩ̃ niŋé mɛ̃ a mʋ̃tɔ̃w a.

³⁸ Ʋ na cɛlɩ na mɛ̃ a cuw na be be kʋralɛ, ɩ dãsɩ-dɩrɛ na bɛ ŋmarɛ ziri be a salom zu a.» Tɛw-àrʋ

³⁹ Ɛcɛ fʋ jɛ n a nãà fʋ na kaa ír a bɛr, fʋ bɛ ŋmɛlɩ kaa ʋ ɛ, fʋ nyɛ̃ nɩ ʋ nɩ suur.

⁴⁰ A wõ-taa fʋ na tɩ maal'ɩ a fʋ tõ-tõ-bie a, fʋ zawr'ʋ na bɛr, fʋ lɔb'ɩ a ʋ naalʋ-kpawʋɔ bɛr tẽw, dɛw ʋ bɛr.

⁴¹ Fʋ ŋmɛ n a dacine na viiri koli ʋ a lɔb, fʋ ɩ na a ʋ zɛbr-yir-kpɛn lo.

⁴² A sɔr-tɔlbɛ za fá ʋ na, ɛ́ a ʋ sɩman dem tʋ ʋ zʋmɛ.

⁴³ Fʋ ɩ na a ʋ dɔ̃ dem zɛb tʋ̃ɔ́ ʋ, fʋ ɩ na nʋ̃ɔ̀ kpɛ a ʋ bɛ-nɔnbɛ za.

⁴⁴ Fʋ ɩ n a ʋ zɛbr-sɔ-kpɛ̃ɛ nʋɔr ʋ gbe, ɛ́ fʋ bɛ tɩɛ ʋ tɛr a zɛbr pʋɔ ɩ.

⁴⁵ Fʋ ɩ na a ʋ vɩɛlʋ baarɩ, ɛ́ dáa a ʋ naalʋ-dà-kɔw lɔb.

⁴⁶ Fʋ ɩ na ʋ pʋ̃ɔ kor, fʋ ƴãw ʋ nɩ vĩ. Tɛw-àrʋ

⁴⁷ Debor'a a na tɩ ta, Sore e? Fʋ na sɔwlɛ nɩ fʋ tʋɔra kʋralɛ, ɛ́ a fʋ suur 'lere mɛ̃ vũu a bɩɩ?

⁴⁸ Bãwnɩ a: a ɩ̃ nyɔ-vʋʋrʋ ɩ n ŋmãalɛ, fʋ ír'ɩ a nɩsaalbɛ k'aa bɛ kũu dɛ mɩ́ ɩ a za n'a bɩɩ?

⁴⁹ Ãa n'ʋ na vʋʋrɛ kʋralɛ kʋ̃ kpi? Ãa n'ʋ kʋ̃ cen a nyãakpɩmɛ tẽw? Tɛw-àrʋ

⁵⁰ Sore e, a fʋ koro za yel-maalɩ wa? A al fʋ̃ʋ na ŋmɛ̃ fʋ ŋmɛ̃a a na tɩ pɔ yel a Daviir zie a?

⁵¹ Sore e, bãwnɩ a fʋ tõ-tõ-biir bɛ na tʋʋr a, a nɩ-bʋʋrɛ bɛ ŋa za fʋ na kʋ̀ m k'ɩ̃ɩ kaarɛ a.

⁵² Sore e, a fʋ dɔ̃ dem tʋ n a nãà fʋ na kaa ír a, ʋ cere na ɛ́ bɛ tʋʋr.

⁵³ A Sore so barka puoru kʋralɛ! Amɛn! Lɛb maal Amɛn!