Sɛb-sõw yielu 88 - A SƐB-SÕW

Sɛb-sõw yielu 88 (87) sob A ɩ̃ kũu cɛ nɩ kerkerlɛ

1 Yielu. Sɛb-sõw yielu Koore bibiir na maalɩ a. Yiel-yielbɛ nɩ-kpɛ̃ɛ sɛbɛ pʋɔ yielu. Ʋ yiele na mɛ̃ nɩbaal-yielu a. Tẽ-bie Heman yielu na wule yã a.

¹ Yielu. Sɛb-sõw yielu Koore bibiir na maalɩ a. Yiel-yielbɛ nɩ-kpɛ̃ɛ sɛbɛ pʋɔ yielu. Ʋ yiele na mɛ̃ nɩbaal-yielu a. Tẽ-bie Heman yielu na wule yã a.

² Sore Naaŋmɩn, ɩ̃ faarɛ ɛ, ɩ̃ mɩ́ kone na bʋɔlɛ fʋ a mʋ̃tɔ̃w, ɛ́ lɔbr cɛlsɩ cɔwr fʋ a tɩ̃ɩsɔw.

³ A ɩ̃ puoru, a ta fʋ, ƴãw tobr a ɩ̃ kon ƴãw.

⁴ A ɩ̃ nyɔ-vʋʋrʋ ɩ n kpɩɛrʋ tɛwr, ɛ́ a ɩ̃ kũu cɛ kerkerlɛ.

⁵ Bɛ sɔ́r mɛ̃ na ƴãw a nɩbɛ na kpi baar'a pʋɔ, ɩ̃ bɛ cãà ŋmɛ̃ nɩr ɛ.

⁶ A kũuni sɔgɔ n'a a ɩ̃ zie be, mɛ̃ a nɩbɛ bɛ na kʋ bɛ gã a yaa pʋɔ a. Fʋ yiir'ɩ a bɛ yele, fʋ bɛ cãà kaarɛ bɛ zie ɩ.

⁷ Fʋ ƴãw mɛ̃ nɩ a bɔw-zulu pɛrɩ́, ziir na liw ɛ́ zulme a pʋɔ.

⁸ A fʋ su-yãyaar ìr'ɩ a ɩ̃ ƴãw, fʋ mɩ́ dĩ nɩ mɛ̃ mɛ̃ kʋ̃ɔ-mie a. Tɛw-àrʋ

⁹ Fʋ ɩ na a ɩ̃ bárɩ cen kɛ́ bɛr mɛ̃, fʋ ɩ na ɩ̃ ɩrɛ bɛ kɔkɔrʋ. Mãa n'ɩ ŋan pàw gã ɛ́ kʋ̃ tʋ̃ɔ́ yi ɛ.

¹⁰ A kpɩɛrʋ zɔ̃wnɛ mɛ̃ nɩ a mimie. Sore e, ɩ̃ mɩ́ bʋɔlɛ fʋ nɩ bibir za, ɩ̃ mɩ́ zɛw nɩ a nuru cɔw fʋ.

¹¹ Fʋ na maal'ɩ nɔ-ɓãa-yele a kũuni ƴãw bɩɩ? A nyãakpɩmɛ na ír'a danɛ fʋ bɩɩ? Tɛw-àrʋ

¹² Ãa n'ʋ na pore a fʋ nɔ̃wfʋ yúor a yàa-bɔw pʋɔ? Ãa n'ʋ na manɛ a fʋ pùor-bɛ-lɛbrʋ a kpɩmɛ tẽw?

¹³ Bɛ bãw nɩ a fʋ nɔ-ɓãa-yele a lige tẽw i? nɩ a fʋ mɩnʋ a yiiru tẽw pʋɔ ɔ?

¹⁴ Mãa a, ɩ̃ kone na bʋɔlɛ fʋ, Sore e, a biɓaara a, a ɩ̃ puoru mɩ́ ta b'a.

¹⁵ Sore e, bʋ̃ʋ n'ʋ so fʋ zawrɛ mɛ̃ bɛrɛ? Bʋ̃ʋ n'ʋ so fʋ bɛ bɔbr k'ɩ̃ɩ nyɛ̃ a fʋ niwn?

¹⁶ A ɩ̃ bibile daarɩ́ za n'a ɩ̃ ɩ a kpɩɛrʋ nɩr, ɛ́ a ɩ̃ kũu cɛ a kerkerlɛ. A pʋl-vʋ̃ɔ fʋ na ƴãw mɛ̃ a bɛ bɛrɛ mɛ̃ ɩ, ɩ̃ bɛ cãà bãw ŋmɩŋmɩn za n'a ɩ.

¹⁷ A fʋ suur ìr'ɩ a ɩ̃ ƴãw, ɛ́ a pʋl-vʋ̃ɔ fʋ na ƴãw mɛ̃ a gbini mɛ̃.

¹⁸ A fʋ suur mɩ́ pili na pàw mɛ̃ bibie za, mɛ̃ kʋ̃ɔ a, a mɩ́ jil'a koli mɛ̃ ziir za.

¹⁹ Fʋ ɩ na a ɩ̃ nɩbɛ nɩ a ɩ̃ bárɩ cen kɛ́ bɛr mɛ̃. Mãa nɩ a lige tɛwr pãa nɛbɛ.