Sɛb-sõw yielu 85 - A SƐB-SÕW

Sɛb-sõw yielu 85 (84) sob A Sore ƴɛ̀rɛ nɩ ƴã-ɓaarʋ ƴɛ̀rʋ

¹ Yiel-yielbɛ nɩ-kpɛ̃ɛ sɛbɛ pʋɔ yielu. Koore bibiir yielu. Sɛb-sõw yielu.

² Sore e, fʋ ɩ na a nɔ̃wfʋ fʋ na nɔnɛ a fʋ tẽw a, ʋ sãá, fʋ ɩ na a Zakɔb bʋʋrɛ yi a gbãgbaalʋ pʋɔ lɛb wa.

³ Fʋ de nɩ a fʋ nɩbɛ sãwna bɛr a baarɩ, fʋ dɩ n a bɛ yel-bebe za suur kʋ̀ bɛ. Tɛw-àrʋ

⁴ Fʋ nyɔw nɩ a fʋ suur, fʋ bɛr'ɩ a fʋ su-tʋlʋ kpãkpã.

⁵ Naaŋmɩn tɩ faarɛ ɛ, ɩ tɩ lɛb wa, ta cãà tɛr'ɩ tɩ a mɩnɛ kãw ɛ.

⁶ A na ŋmɛ̃ lɛ a, fʋ na nyɛ̃ nɩ tɩ nɩ suur kʋralɛ bɩɩ? A fʋ suur na be n be yome yome za bɩɩ?

⁷ Fʋ kʋ̃ lɛb wa wa kʋ̀ tɩ a nyɔ-vʋʋrʋ, a fʋ nɩ-bʋʋrɛ tʋ̃ɔ́ cɩlɛ a fʋ ƴãw ɛ?

⁸ Sore e, ɩ tɩ nyɛ̃ a fʋ nɔ̃wfʋ, kʋ̀ tɩ a fʋ faafʋ!

⁹ Ɩ̃ bɛrɛ na wone a ʋlɩ bom nɛ a Naaŋmɩn na yere a: a Sore ƴɛ̀rɛ nɩ ƴã-ɓaarʋ ƴɛ̀rʋ a ʋ nɩ-bʋʋrɛ ƴãw, a ʋ nɩbɛ ƴãw, a bɛlɩ dem na lɛb tu ʋ nɩ bɛ pʋɔ za a ƴãw.

¹⁰ A Sore kʋ̃ yaa kɛ́ faa a bɛlɩ dem na zɔrɛ ʋ a ɩ, ɛ́ a ʋ yúor-vɩɛlʋ-danʋ na kpɩɛr'ɩ a tɩ tẽw.

¹¹ Nɔ̃wfʋ nɩ yel-mɩŋa tuor'ɩ taa, mɩnʋ nɩ ƴã-ɓaarʋ nyɔw nɩ taa weri.

¹² A yel-mɩŋa na bul'a yi a tẽw, ɛ́ a mɩnʋ yi a salom zu siw.

¹³ A Sore mɩŋa na tɩr'ɩ a nʋ̃ɔ̀, ɛ́ a tɩ tẽsɔw wɔ̃ a ʋ wɔmɛ.

¹⁴ A mɩnʋ de nɩ a Sore niwn, ɛ́ cɔbrɛ a sɔ́r a ʋ niŋé.