Sɛb-sõw yielu 81 - A SƐB-SÕW

Sɛb-sõw yielu 81 (80) sob A ɩ̃ nɩbɛ bɛ bɛr wõ a ɩ̃ ƴɛ̀rʋ ɛ

¹ Yiel-yielbɛ nɩ-kpɛ̃ɛ sɛbɛ pʋɔ yielu. Asafʋ Sɛb-sõw yielu. Gatɩ tẽw korijom'ʋ bɛ mɩ́ ŋmɩɛr yiele nɩ.

² Nyɩ lɔbr nʋ̃ɔ̀ cɛlsɩ a Naaŋmɩn ƴãw, ʋl na ɩ a tɩ fãw a, nyɩ cáarɛ a Zakɔb Naaŋmɩn ƴãw.

³ Nyɩ ŋmɛ a bʋ̃-ŋmɩɛrɩ ƴãw, nyɩ dibri a kʋɔr, nyɩ ŋmɛ a korijom bàalʋbàalʋ, lãwnɩ a pɛ̀nɛ́.

⁴ Nyɩ pɛblɩ wɩ́ɛ a cuw-paala yib daar, a cuw-pla daar, a tɩ cuw bibir.

⁵ Bʋ̃ʋ n'ʋ vɛ̃, nʋɔr'ʋ ƴãw a Ɩsɩrayɛl nɩbɛ ƴãw, yel a Zakɔb Naaŋmɩn na yel a n'ʋ.

⁶ Nʋɔr'ʋ ʋ ƴãw kʋ̀ a Zuzɛb yir dem, a lɛn daar ʋ na tɩ ŋmãa nɩ a Eziptɩ tẽw zɛbr a. — Ɩ̃ wone nɩ kɔkɔr, ɩ̃ na bɛ bãw a, ʋ yere a ɩ̃ zie:

⁷ Ɩ̃ tow nɩ a fʋ tuor bɛr fʋ, ɩ̃ ír fʋ na bɛr a pɔ̃tɔrɩ tome pʋɔ.

⁸ Fʋ na tɩ be a kpɩɛrʋ pʋɔ ŋmɩɛr cɛlsɩ a, ɩ̃ faa fʋ na. Ɩ̃ tɩ sɔwl'a be a saa pʋɔ ɛ́ sɔw fʋ. Ɩ̃ tɩ ɩ b'a kaa a Meriba kʋ̃ɔnɩ pɛr. Tɛw-àrʋ

⁹ Ɩ̃ nɩbɛ ɛ, nyɩ bɛrɛ wone, a fɛr'a k'ɩ̃ɩ kpaalɩ nyɩ, Ɩsɩrayɛl i, fʋ̃ʋ tɩ sàw bɛrɛ wone a ɩ̃ ƴɛ̀rʋ a!

¹⁰ Ŋmɩn-yũo bɛ bere a fʋ zie ɩ, fʋ bɛ gbine dume naaŋmɩn-sãan niŋé ɩ.

¹¹ Mãa n'ɩ a Sore fʋ Naaŋmɩn na tɛr fʋ yi n a Eziptɩ tẽw pʋɔ a. Háa a fʋ nʋɔr gbayala, ɩ̃ɩ na paal'ʋ na.

¹² Ɛcɛ a ɩ̃ nɩbɛ bɛ bɛr wõ a ɩ̃ ƴɛ̀rʋ ɛ, a Ɩsɩrayɛl bɛ bɔbr mɛ̃ ɩ.

¹³ Lɛ n'a ɩ̃ tɩ bɛr bɛ, bɛ ɩrɛ a bɛ zu-kpɛ̃w ɩb. Bɛ ɩrɛ a lɛ bɛ na bɔbr a!

¹⁴ Aa! a ɩ̃ nɩbɛ tɩ bɛrɛ wone a ɩ̃ ƴɛ̀rʋ a, a Ɩsɩrayɛl tɩ sàw tuur a ɩ̃ sɔ́r a,

¹⁵ pɛtɛlʋlɛ, ɩ̃ nãá siwr'ɩ a bɛ dɔ̃ dem, ɩ̃ nãá lɩɛb'a lo a bɛlɩ dem na dɔwrɛ bɛ a zu!

¹⁶ Lɛ n'a a Sore dɔ̃ dem nãá mʋʋrɛ ʋ, a bɛ daar nãá tɔl'a a nʋɔr kʋ.

¹⁷ A Sore nãá guol'ɩ a ʋ nɩbɛ nɩ ble bʋʋrɛ kãw na vɩɛl za a, ʋ nãá kʋ̀ bɛ nɩ pìir bɔw pʋɔ sɩwr bɛ dɩ sɛw.