Sɛb-sõw yielu 80 - A SƐB-SÕW

Sɛb-sõw yielu 80 (79) sob Ɩsɩrayɛl cɩ̃ɩnɛ ɛ, bɛrɛ wone

¹ Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu Asafʋ na maalɩ a. Fomie bʋ̃-ŋmɩɛrɩ n'a bɛ mɩ́ ŋmɩɛr ƴãwn.

² Ɩsɩrayɛl cɩ̃ɩnɛ ɛ, bɛrɛ wone. Fʋ̃ʋ na kparɛ a fʋ nɩ-bʋʋrɛ cere nɩ mɛ̃ dʋn a, fʋ̃ʋ a naalʋ-dà-kɔw na be a seribɛ̃ mɩnɛ zu-sɔw a, sãá nyɩwrɛ.

³ Wul a fʋ kpɛnʋ ɛ́ wa faa tɩ, a Efarayim, Bɛ̃zamɛ nɩ Manase dɔwlʋ nɩbɛ niŋé.

⁴ Naaŋmɩn i, ɩ tɩ lɛb wa, tɛr nĩw-vla a tɩ ƴãw, ɛ́ tɩ na nyɛ̃ nɩ a faafʋ.

⁵ Sore Naaŋmɩn kpɛnʋ-za-sob i, debor daar'a a fʋ nɩbɛ na puore fʋ, ɛ́ fʋ nyɛ̃ nɩ bɛ suur tɩ ta?

⁶ Mʋta-kʋ̃ɔ dɩb'a fʋ mɩ́ kʋ̀ bɛ, ɛ́ ƴãw bɛ nyũ mʋta-kʋ̃ɔ yaga yaga za.

⁷ Fʋ mɩ́ ɩ na a tɩ sɩman dem zɛbr'ɩ tɩ taa, ɛ́ a tɩ dɔ̃ dem so tɩ ɩrɛ laar.

⁸ Naaŋmɩn-kpɛnʋ-za-sob i, ɩ tɩ lɛb wa, tɛr nĩw-vla a tɩ ƴãw, ɛ́ tɩ na nyɛ̃ nɩ a faafʋ.

⁹ Divɛ̃ tɩɛ kãw tɩ be n Eziptɩ tẽw, fʋ tɩ vʋ̃ɔ ʋ nɩ a be, wa diw nɩ-bʋʋr-yoru bɛ ìr ɛ́ fʋ sɛl ʋ.

¹⁰ Fʋ maal'ɩ a zie bɛr a ʋ niŋé, ʋ tɛ n nyɩgɛ, ɛ́ tɔm pàw a tẽw za.

¹¹ A ʋ ɓaarʋ pàw nɩ a tan, ɛ́ a wuli pàw a sɛɛdɩr tɩ-bɛrɛ bɛrɛ.

¹² Ʋ zɔ n gbɛ́ɛ bɛr a tɩ tɔ a kʋ̃ɔ-kpɛ̃ɛ, ɛ́ a wuli-tɔm-paalɛ tɩ tɔ a Efaratɩ man.

¹³ Bʋ̃ʋ n'ʋ so fʋ sãw a ʋ dàbáw bɛr, a sɔr-tɔlbɛ za pɔrɛ a ʋ wɔmɛ?

¹⁴ A tuw pʋɔ duo sãwnɛ ʋ na bɛrɛ, ɛ́ a mʋ̃ɔ pʋɔ dʋn 'wɔbr ʋ báarɛ.

¹⁵ Naaŋmɩn kpɛnʋ-za-sob i, lɛb wa! Be a salom zu ɛ́ bɛl nyɛ̃ a, kaa a divɛ̃ tɩɛ ŋa zie.

¹⁶ Gùre a bom fʋ̃ʋ mɩŋa na sɛl a, a nɩ-bʋʋrɛ bɛ ŋa fʋ na ɩ bɛ kpɛmɛ a.

¹⁷ A divɛ̃ tɩɛ ŋa a, bɛ nyɩw ʋ na bɛr, ɛ́ cɛ̀ ʋ bɛr, sãw niwn ƴãw bɛ bɛ bɔr!

¹⁸ Ír a fʋ nũu dɔwlɩ a nãà na zɩ̃ a fʋ dʋrʋ lowr a zu, a nɩr ŋa fʋ na ɩ k'ʋ kpɛmɛ a.

¹⁹ Lɛ n'a tɩ kʋ̃ cãà pɩlɛ fʋ ɛ, fʋ na lɛb'a kʋ̀ tɩ a nyɔ-vʋʋrʋ, ɛ́ a fʋ yúor'ʋ tɩ na bʋɔlɛ.

²⁰ Sore Naaŋmɩn kpɛnʋ-za-sob i, ɩ tɩ lɛb wa, tɛr nĩw-vla a tɩ ƴãw, ɛ́ tɩ na nyɛ̃ nɩ a faafʋ.