Sɛb-sõw yielu 79 - A SƐB-SÕW

Sɛb-sõw yielu 79 (78) sob A Zerizalɛm yie lɩɛb'ɩ deboru

1 Sɛb-sõw yielu Asafʋ na maalɩ a.

¹ Sɛb-sõw yielu Asafʋ na maalɩ a. Naaŋmɩn i, a nɩ-bʋʋr-yoru wa na wa yɛ́r pàw a zie fʋ na só a, bɛ dɛw nɩ a fʋ yir-sõw bɛr, bɛ ɩ na a Zerizalɛm yie lɩɛbɩ deboru.

² Bɛ kʋ n a fʋ tõ-tõ-biir ƴãw sidume a dɩ, bɛ kʋ n a fʋ nɩbɛ ƴãw wɛ-dʋn a 'wɔb.

³ A fʋ nɩbɛ zɩ̃ɩ gbɔl'a viiri koli a Zerizalɛm mɛ̃ kʋ̃ɔ a, ɛ́ nɩr bɛ tɩ ka be na ũù a kũuni ɛ.

⁴ A tɩ sɩman dem tʋʋr tɩ na, a bɛlɩ dem na kpɩɛr viiri koli tɩ a kpɔwrɛ tɩ na ɛ́ ɩrɛ tɩ laar.

⁵ Sore e, debor'a fʋ na nyɛ̃ a suur tɩ ta? Kʋralɛ n'a a fʋ suur na 'lere mɛ̃ vũu a bɩɩ?

⁶ Nɩ̃ɛ nyɛ̃ nɩ a nɩ-buʋrɛ na bɛ bãw fʋ a suur, a na-mɩnɛ ten al na bɛ bʋɔlɛ a fʋ yúor a.

⁷ Bʋ̃ʋ n'ʋ vɛ̃, bɛ 'wɔb'ɩ a Zakɔb bʋʋrɛ, bɛ sãw nɩ a bɛ tẽw bɛr.

⁸ Ta de a tɩ sãàkʋm-kore sãwna dɔwlɩ a tɩ zu ɛ, ɛcɛ zɔ tɩ nɩbaalʋ, wa fɔ̃w, tɩ bɛ cãà laar ɛ!

⁹ Naaŋmɩn tɩ faarɛ ɛ, wa sõw tɩ, a fʋ yúor-vɩɛlʋ-danʋ zũú. Faa tɩ ɛ́ dɩ a tɩ yel-bebe suur kʋ̀ tɩ, a fʋ yúor zũú.

¹⁰ Bʋnʋ ƴãw n'a a nɩ-bʋʋr-yoru na yere: «Nyɩnɛ n'a a bɛ Naaŋmɩn be?» Nɩ̃ɛ ɩ kɛ̀ bɛ bãw, ɛ́ tɩ mɩ̀ nyɛ̃ a lɛ fʋ na yaarɛ a fʋ tõ-tõ-biir kũu san a!

¹¹ A gbãgbaar 'woi 'woi bɛ na kone a, a ta fʋ. Fʋ̃ʋ na tɛr fãw a, faa a nɩbɛ na kpi baar'a.

¹² Sore e, a nɩ-bʋʋrɛ bɛl na ɩ a tɩ sɩman dem a, bɛ tʋ b'ɩ zʋmɛ, yáa a bɛ zʋmɛ á ŋá san a bɛ zu gb'a ayopõi.

¹³ Ɛcɛ a tɩɩm na ɩ a fʋ nɩ-bʋʋrɛ a, a píir fʋ na cɩ̃ɩnɛ a, tɩ na yiele na danɛ nɩ fʋ kʋralɛ, tɩ na íre nɩ a fʋ yúor yome yome za.