Sɛb-sõw yielu 77 - A SƐB-SÕW

Sɛb-sõw yielu 77 (76) sob A kpɩɛrʋ daar, ɩ̃ mɩ́ lɛb'a tɩɛrɛ a fʋ gãda-tome

¹ Yiel-yielbɛ nɩ-kpɛ̃ɛ sɛbɛ pʋɔ yielu. Yedutun yielu. Sɛb-sõw yielu Asafʋ na maalɩ a.

² A Naaŋmɩn n'ʋ ɩ̃ bʋɔlɛ, ɩ̃ lɔbr'ɩ cɛlsɩ cɔwr ʋ, a Naaŋmɩn n'ʋ ɩ̃ bʋɔlɛ, ʋ na bɛr'a wõ m.

³ A ɩ̃ kpɩɛrʋ daar a, ɩ̃ mɩ́ bɔbr'ɩ a Sore, ɩ̃ mɩ́ ture nɩ a nuru cɔwr ʋ a tɩ̃ɩsɔw, ɛ́ kʋ̃ʋ bàl ɛ, ɛ́ bɛ sàwr bɛ na mɔwlɩ mɛ̃ ɩ.

⁴ Ɩ̃ mɩ́ tɩɛrɛ nɩ a Naaŋmɩn, ɛ́ kone a 'woi, 'woi! A tɩɛrʋ wa nyɔw mɛ̃ a, a ɩ̃ kanyir mɩ́ baar'a. Tɛw-àrʋ

⁵ Fʋ bɛ mɩ́ sàw ɩ̃ na ũù mimir ɛ, a ɩ̃ tɩɛrʋ dam'a, ɩ̃ bɛ bãw ʋlɩ bom nɛ ɩ̃ na na yel a ɩ.

⁶ Ɩ̃ tɩɛrɛ nɩ a koro kãw za bibie yele, ɩ̃ lɛb'a tɩɛrɛ a yome na tɔl a yele.

⁷ A tɩ̃ɩsɔw a, ɩ̃ mɩ́ lɛb'a tɩɛrɛ a ɩ̃ yielu, ɩ̃ mɩ́ tɩɛrɛ nɩ a ɩ̃ socir pʋɔ, ɛ́ sowre ɩ̃ tʋɔra:

⁸ A Sore nɔ̃w jɛ tɩ na bɛr a baarɩ bɩɩ? Ʋ bɛ lɛb cãà bɔbr tɩ towtow bɩɩ?

⁹ A ʋ nɔ̃wfʋ bɛ cãà be, ɛ́ gù a baarʋ daar bɩɩ? Dɩ̃a na ta a, ʋ bɛ cãà tɛr ƴɛ̀rʋ ƴɛ̀rɛ kʋ̀rɛ tɩ bɩɩ?

¹⁰ A Naaŋmɩn yiir'ɩ a tɩ nɩbaalʋ zɔba bɩɩ? Bɩɩ ʋ taa nyɛ̃ suur a ʋ su-ɓaarʋ baarɩ ʋ? Tɛw-àrʋ

¹¹ Ɩ̃ yere na: «A ʋlɩ bom nɛ na ɩ m kpɩɛrʋ a, ʋlɛ n'ɩ a Naaŋmɩn-na-do-saa-bɛ-pɩɛl-a na bɛ cãà ɩrɛ mɛ̃ a koro za a.»

¹² Sore e, ɩ̃ bɛ yiiri a fʋ gãda-tome ɩ, ɩ̃ cãà na bãwnɩ a fʋ koro za nɔ-ɓãa-yele.

¹³ Ɩ̃ tɩɛrɛ nɩ a tome al za fʋ na tõ a, ɩ̃ su n zu tɩɛrɛ a fʋ gãda-tome.

¹⁴ Naaŋmɩn i, sonu sɔr'ɩ a fʋ sɔ́r, naaŋmɩn buor'ʋ ɩ kpɛ̃ɛ man fʋ?

¹⁵ Fʋ yõ tẽtẽ n'ʋ maalɛ nɔ-ɓãa-yele, fʋ wul'ɩ a nɩ-bʋʋr-yoru a fʋ kpɛnʋ.

¹⁶ A fʋ fãw n'a fʋ faa nɩ a fʋ nɩ-bʋʋrɛ, a Zakɔb nɩ a Zuzɛb bibiir. Tɛw-àrʋ

¹⁷ A kʋ̃ɔnɩ nyɛ b'a, Naaŋmɩn i, a nyɛ b'a ɛ́ zɔ dɛ̃bɩ̃ɛ, a kʋ̃ɔ-kpɛ̃ɛ pɛr mɩ̀ dam'a.

¹⁸ A zũzuge tɩ ɩ na a kʋ̃ɔ cuure, ɛ́ a saa tanɛ a zũzuge pʋɔ, ɛ́ fʋ tɩ tɛbr a fʋ pime.

¹⁹ A fʋ saa na mɩ́ tɩ tanɛ wabapapa a, a saa-nyɩwrʋ mɩ́ tɩ caal'ɩ a tẽ-daa, a tẽw damnɛ ɛ́ màwr.

²⁰ Fʋ tu na tɔl a kʋ̃ɔ-kpɛ̃ɛ sɔgɔ, fʋ puo nɩ a fʋ sɔ́r a kʋ̃ɔ-zulu pʋɔ, ɛ́ nɩr za bɛ nyɛ̃ a fʋ gbɛ́ɛ bɔwrɩ ɛ.

²¹ Moyiir nɩ Aarɔ̃ nɛbɛ fʋ ɩ bɛ kaa a fʋ nɩ-bʋʋrɛ zie mɛ̃ pi-cɩ̃ɩnbɛ a.