Sɛb-sõw yielu 76 - A SƐB-SÕW

Sɛb-sõw yielu 76 (75) sob Sɛb-sõw yielu a Naaŋmɩn na bɛ tɛr dɩ̃ɛnʋ a ƴãw

¹ Yiel-yielbɛ nɩ-kpɛ̃ɛ sɛbɛ pʋɔ yielu. Fomie bʋ̃-ŋmɩɛrɩ n'a bɛ mɩ́ ŋmɩɛr'ɩ ƴãwn. Sɛb-sõw yielu Asafʋ na maalɩ a. Yielu.

² A Naaŋmɩn ɩ na bɛ bãw ʋ vla a Zuda tẽw, a ʋ yúor yi n a Ɩsɩrayɛl tẽw pʋɔ.

³ Zerizalɛm'a ʋ maalɩ a ʋ pɛn-sɛw, Sɩyɔ̃ n'a a ʋ yir be.

⁴ Be n'a ʋ kár a zɛbr bome bɛr: a pime, a zɛbr-kur-pãgalɩ nɩ a kafine. Tɛw-àrʋ

⁵ Fʋ nyɩwrɛ na, Naaŋmɩn i, fʋ dɩrɛ nɩ dɛpaalʋ zuo a tã-bɛrɛ na be kʋralɛ a.

⁶ Bɛ fa n a soja-gãdaar bome za, bɛ gúr'ɩ a kũu gʋ̃ɔ. A zɛbr-nɩbɛ bɛ ŋa bɛ tʋ̃ɔ́ ɩ ɩb kãw za ɩ.

⁷ Zakɔb Naaŋmɩn i, fʋ na wa tanɩ a, a wi-zɔmnbɛ nɩ a wie gbini na àr.

⁸ A fʋ̃ʋ a, fʋ bɛ tɛr dɩ̃ɛnʋ ɛ. Fʋ̃ʋ wa nyɛ̃ suur a, ãa n'ʋ na tʋ̃ɔ́ àr a fʋ niŋé?

⁹ Fʋ mɩ́ be n a salom zu ɛ́ yel a lɛ fʋ na dɩ a ƴɛ̀rʋ bin a, a tẽ-daa zɔrɛ dɛ̃bɩ̃ɛ, ɛ́ ɩ gbili,

¹⁰ a lɛn daar fʋ na mɩ́ ìr a ƴɛ̀rʋ-dɩb ƴãw a, fʋ na mɩ́ ìr kɛ́ fʋ faa a tẽw bãbàalbɛ za a. Tɛw-àrʋ

¹¹ A nɩsaalbɛ suur tɛɛ za na ɩ na a fʋ yúor yi, ɛ́ a bɛlɩ dem a fʋ suur nãà wa jɩɩrɩ bɛr a, na su n kuor bome.

¹² Nyɩ kõ nɛ́ɛ kʋ̀ a Sore nyɩ Naaŋmɩn, ɛ́ ír a. Nyɩɩm za na viiri koli ʋ a, nyɩ wa n bome wa kʋ̀ a Naaŋmɩn na bɛ tɛr dɩ̃ɛnʋ a.

¹³ A ten na-mɩnɛ pɔ̀lʋ mɩ́ baar'ɩ a ʋ niŋé, a tẽw zu na-mɩnɛ za zɔrɛ ʋ na.