Sɛb-sõw yielu 74 - A SƐB-SÕW

Sɛb-sõw yielu 74 (73) sob A kon bɛ na kone a Naaŋmɩn yir na sãw a

1 Asafʋ yielu na wule yã a.

¹ Asafʋ yielu na wule yã a. Naaŋmɩn i, bʋ̃ʋ n'ʋ so fʋ zawrɩ tɩ bɛr a baarɩ? Bʋ̃ʋ n'ʋ so fʋ cãà nyɛ̃ nɩ tɩ suur, tɩɩm na ɩ a fʋ zaw píir a?

² Cãà bãwnɩ a fʋ nɩ-bʋʋrɛ fʋ na páw koro za a. Cãà bãwnɩ a dɔwlʋ á ŋá fʋ na ya de só a, nɩ a Sɩyɔ̃ tãw fʋ na kpɩɛr a.

³ Cen ta a deboru á ŋá na àr a koro za a pɛr: a dɔ̃ sob sãw nɩ bom za bɛr a zi-sõw pʋɔ.

⁴ A be tɔr za fʋ na mɩ́ tɩ tuori tɩ a, a fʋ bɛ-nɔnbɛ ŋmɛ n a zɛb-tʋ̃ɔ́fʋ cɛlsɩ, ɛ́ ƴãw a bɛ dɩrapo a ɩ bãwfʋ.

⁵ Bɛ tɩ ɩ na mɛ̃ nɩbɛ na cɩɛr tɩɩr lɔbr nɩ lɛ́ɛ a tuw pʋɔ a.

⁶ Bɛ cɛ na ɛ́ ŋmɛ a bʋ̃-pɛnɩ kar nɩ lɛ́ɛ nɩ 'hama.

⁷ Bɛ nyɩw nɩ a fʋ zi-sõw bɛr, bɛ da n a fʋ kpɛb zie lɔb ɛ́ dɛw ʋ bɛr.

⁸ Bɛ yel'ɩ bɛ tʋɔra: «Tɩ na tʋ̃ɔ́ bɛ nɩ pẽlẽpẽlẽ.» Bɛ nyɩw nɩ a Naaŋmɩn puoru ziir za bɛr a tẽw pʋɔ.

⁹ Tɩ bɛ mɩ́ cãà nyɛ̃ a bãwfʋ na wul kɛ́ fʋ be n ka a ɩ, ƴɛ̀r-manbɛ bɛ cãà be ɩ, ɛ́ nɩr za a tɩ pʋɔ bɛ bãw debor'a a na cɛlɩ tɩ ta a ɩ.

¹⁰ Naaŋmɩn i, debor'a a bɛ-nɔnɛ na tʋ b a zʋmɛ tɩ ta? Debor'a a dɔ̃ sob na ɩrɛ fʋ kʋralɛ laar tɩ ta?

¹¹ Bʋ̃ʋ n'ʋ so fʋ bɛ dam damnʋ za, ɛ́ cʋɔbɩ a nuru zɩ̃ nɩ?

¹² Naaŋmɩn i, fʋ̃ʋ n'ɩ a ɩ̃ Nãà a dɩta-pɛ-yome za, fʋ̃ʋ n'ʋ faa tɩ gb'a a ŋmɩn za a tẽw ŋa pʋɔ.

¹³ Fʋ̃ʋ n'ʋ ɓar a man nɩ a fʋ fãw, ɛ́ ŋmɛr a wa-bɩɩr zuru a kʋ̃ɔ pʋɔ.

¹⁴ Fʋ̃ʋ n'ʋ ŋmɛr a Levɩatã zuru, ƴãw zʋm-bɛrɛ 'wɔb ʋ.

¹⁵ Fʋ̃ʋ n'ʋ yuo a bul-nɛ́ɛ, ɛ́ ɩ a bàrʋ zɔrɛ kʋ̃ɔ, fʋ̃ʋ n'ʋ ɩ mamɛ na bɛ sɩrɛ a, a sɩr.

¹⁶ Fʋ̃ʋ só a mʋ̃tɔ̃w, ɛ́ mɩ̀ só a tɩ̃ɩsɔw, fʋ̃ʋ na ír a cuw nɩ a mʋ̃tɔ̃w a.

¹⁷ Fʋ̃ʋ n'ʋ ƴãw a tẽw tʋr-bɔwrɩ za, fʋ̃ʋ n'ʋ maalɩ a ũon nɩ a sɩ̃ɔ.

¹⁸ Sore e, cãà bãwnɩ a yel ŋa: a fʋ dɔ̃ dem tʋʋr fʋ na, ɛ́ nɩ-bʋʋrɛ na gem a ɩrɛ fʋ laar.

¹⁹ Ta bɛr a fʋ nɩ-bʋʋr-nɔna kʋ̀ a wɛ-dʋn ɛ, ta yiiri a fʋ nɩ-bʋʋrɛ nɩ-kɔmɛ bɛr kʋralɛ ɩ.

²⁰ Cɛlɛ a fʋ wõ-taa zie! Bʋ̃ʋ n'ʋ vɛ̃, nɩbɛ paal'ɩ a tẽw ziir al na liw a, kɛ́ bɛ tʋ̃ɔ́ tone po-to-fãw tome.

²¹ A bɛlɩ dem bɛ na dɔwrɛ a, bɛ ta lɛb'ɩ vĩ ɛ. A nan dem nɩ a nɩ-kɔmɛ, bɛ nɩ̃ɛ danɛ fʋ.

²² Naaŋmɩn i, ìr, kaa a fʋ yele zie. Bãwnɩ a zʋmɛ a dãbole bɛ ŋa na mɩ́ tʋʋr fʋ a bibie za a.

²³ Taa yiire a fʋ dɔ̃ dem cɛlsɩ, nɩ a nɩbɛ na ŋmãa nɩ fʋ zɛbr a gɔmɛ na ìre dúor kʋralɛ a ɩ.