Sɛb-sõw yielu 72 - A SƐB-SÕW

Sɛb-sõw yielu 72 (71) Naaŋmɩn i, kʋ̀ a fʋ ƴɛ̀rʋ-dɩb fãw a nãà

1 Salomɔ̃ so ʋ.

¹ Salomɔ̃ so ʋ. Naaŋmɩn i, ɩ a nãà mɩ́ dɩ a ƴɛ̀rʋ mɛ̃ a fʋ̃ʋ a! Kʋ̀ a nãà bidɛb a fʋ ƴɛ̀rʋ-dɩb yã.

² Ʋ mɩ́ dɩ a ƴɛ̀rʋ nɩ mɩnʋ kʋ̀ a fʋ nɩ-bʋʋrɛ, ʋ mɩ́ dɩ a ƴɛ̀rʋ kʋ̀ a fʋ bãbàalbɛ a tu sɔ́r.

³ Tan i, nyɩ wa n a ƴã-ɓaarʋ wa kʋ̀ a nɩbɛ, tãli i, nyɩ wa n a mɩnʋ wa kʋ̀ bɛ!

⁴ A nãà, ʋ mɩ́ kpɛ a nɩ-bʋʋrɛ bãbàalbɛ, ʋ mɩ́ ɩ a nan dem faarɛ, ɛ́ mɩ́ ƴɛ́r a sob nɛ na dɔwrɛ bɛ a ŋmɛr!

⁵ Ʋ be be, mɛ̃ a mʋ̃tɔ̃w nɩ a cuw a, tɩ ta a tẽw baarʋ daar.

⁶ Ʋ ɩ mɛ̃ a saa na mɩ́ wa ƴãw a mʋ̃ɔ na lɛb tɔmnɛ a, mɛ̃ a sa-pla na mɩ́ wa bur a tẽw a!

⁷ A ʋ daar a, mɩnʋ na be n be yaga, ɛ́ a ƴã-ɓaarʋ ʋr, lɛn daar za a cuw na na be be a!

⁸ Ʋ na mɩ́ dɩ n naalʋ kʋ̃ɔ-kpɛ̃ɛ ƴãw tɩ tɔ n kʋ̃ɔ-kpɛ̃ɛ, a Efaratɩ man ƴãw tɩ tɔ n a tẽw baarʋ zie.

⁹ A wɛja-kpalɛ pʋɔ dem na gbĩ n dume a ʋ niŋé, a ʋ dɔ̃ dem na mɔw nɩ a tanɛ.

¹⁰ Tarsisɩ tẽw nɩ a kʋ̃ɔ-kpɛ̃ɛ-sɔgɔ-ten na zãá a na-mɩnɛ na wa n nɩ bome wa kʋ̀ ʋ, Saba nɩ Seva ten na-mɩnɛ na ya n a zuru yar kʋ̀ ʋ.

¹¹ A na-mɩnɛ za na gbĩ n dume a ʋ niŋé, a nɩ-bʋʋrɛ za na tone nɩ a ʋ tome.

¹² Ʋ na faa nɩ a nã́w sob na kone bʋɔlɛ a, nɩ a bãbàal na bɛ tɛr kpa-tɩɛrɛ a.

¹³ Ʋ na zɔ n a bãbàal nɩ a nã́w sob nɩbaalʋ, ʋ na faa bɛ na.

¹⁴ Ʋ na faa bɛ nɩ a nɩbɛ na dɔwrɛ bɛ a zie, ɛ́ ɩrɛ po-to-fãw-ɩb a bɛ zie a, a bɛ nyɔ-vʋʋrʋ na ɩ bʋ̃-sɩza a ʋ zie a ƴãw.

¹⁵ A nãà, ʋ vʋʋrɛ! Bɛ na kʋ̀ ʋ nɩ a Saba tẽw salm-zɩɛ, bɛ na puore na kʋ̀rɛ ʋ kʋralɛ. A Naaŋmɩn, ʋ maalɛ ʋ bibi-vɩɛrɩ za!

¹⁶ Ble na ʋr'ɩ a tẽw pʋɔ, a bʋ̃-kʋ́ɔrɩ zuru na zaalɛ a tan zu a na ɩ na mɛ̃ a Libã tẽw tãw tɩɩr na zaalɛ a, ɛ́ a tẽ-bɛrɛ pʋɔ a, a nɩbɛ na vɩɛl'a mɛ̃ a póru pʋɔ mʋ̃ɔ a.

¹⁷ A nãà yúor, ʋ be be kʋralɛ, bɛ pore a ʋ yúor lɛn daar za a mʋ̃tɔ̃w na na pure a. A nɩsaalbɛ, bɛ mɩ́ por a ʋ yúor ƴɛ̀r'ɩ a nɔ-vla kʋ̀ taa, ɛ́ a nɩ-bʋʋrɛ za yere k'aa nãà ɩ n zu-nʋ̃ɔ̀ sob.

¹⁸ A Sore, a Ɩsɩrayɛl Naaŋmɩn tɛr'ɩ puoru, ʋl yõ na n'ʋ maalɛ nɔ-ɓãa-yele a!

¹⁹ A ʋ yúor-vɩɛlʋ-danʋ, ʋ paalɩ a tẽw za! Amɛn! Lɛb maal Amɛn!

*

20 A Zese bidɛb Daviir puoru baarʋ zie n'ɩ a ka.

²⁰ A Zese bidɛb Daviir puoru baarʋ zie n'ɩ a ka.