Sɛb-sõw yielu 63 - A SƐB-SÕW

Sɛb-sõw yielu 63 (62) sob Naaŋmɩn i, a fʋ vʋla kpɩɛr mɛ̃ na

¹ Sɛb-sõw yielu Daviir na maalɩ a. A lɛn daar a Daviir na tɩ be a Zuda tẽw wɛja-kpalɛ pʋɔ a n'a.

² Naaŋmɩn i, fʋ̃ʋ n'ɩ a ɩ̃ Naaŋmɩn, ɩ̃ bɔbr fʋ na, a fʋ vʋla kpɩɛr mɛ̃ na. Ɩ̃ kʋɔlɛ nɩ ɩ̃ za bɔbr'ɩ fʋ, mɛ̃ tẽsɔw na bɛ páw kʋ̃ɔ ko a, ko welwel a.

³ Ɩ̃ jɩ́r fʋ nɩ a zi-sõw pʋɔ, k'ɩ̃ɩ nyɛ̃ a fʋ kpɛnʋ nɩ a fʋ yúor-vɩɛlʋ-danʋ,

⁴ a fʋ nɔ̃wfʋ sɩrɩ na sa a nyɔ-vʋʋrʋ. Ɩ̃ na danɛ fʋ na.

⁵ Ɩ̃ na puore fʋ nɩ yãanɩ a ɩ̃ cãafʋ daar za, ɛ́ bɛlɛ wa por a fʋ yúor a, ɩ̃ na mɩ́ zɛw nɩ a nuru.

⁶ Ɩ̃ na nyɛ̃ nɩ maalʋ, mɛ̃ nɩr na 'wɔb nɛn-kãánɩ nɩ nɛn-buge tɩw a. Nʋ̃ɔ̀ za na luw nɩ a ɩ̃ kɔrɛ, ɩ̃ íre a fʋ yúor.

⁷ Mãa wa gã a, ɩ̃ mɩ́ lɛb'a tɩɛrɛ a fʋ yele, ɩ̃ mɩ́ tɛr fʋ na tɩɛrɛ a tɩ̃ɩsɔw tɛm gbele pʋɔ:

⁸ fʋ wa na wa sõw mɛ̃. Ɩ̃ ŋmɩɛr'ɩ nʋ̃ɔ̀ cɛlsɩ a fʋ pɩgɛ ɓaarʋ́.

⁹ Ɩ̃ tu b'a nɩ ɩ̃ pʋɔ za, ɛ́ a fʋ dʋrʋ nũu tɩɛ mɛ̃ tɛr.

¹⁰ Ɛcɛ a bɛlɩ dem na bɔbr a ɩ̃ kʋb a, bɛ tɔl siw a kpɩmɛ tẽw!

¹¹ A zɛbr-sɔ-kpɛ̃ɛ, ʋ baarɩ bɛ, bɛ lɩɛbɩ gbõgbo-cili dɩb!

¹² A nãà ʋl na cɩlɛ nɩ a Naaŋmɩn ƴãw! Sob nɛ za na pɔrɛ ƴãwn a Naaŋmɩn ƴãw a na nyɛ̃ nɩ danʋ, bʋ̃ʋ n'ʋ vɛ̃, a zir-ŋmarbɛ nɛ́ɛ na pàw na.