Sɛb-sõw yielu 60 - A SƐB-SÕW

Sɛb-sõw yielu 60 (59) sob A Naaŋmɩn nɩ-bʋʋrɛ bɛ na zɛb tʋ̃ɔ́ a puoru

¹ Yiel-yielbɛ nɩ-kpɛ̃ɛ sɛbɛ pʋɔ yielu. Dãsɩɛ dɩb. Daviir danʋ yielu. Yielu na wule yã a.

² A tɩ ɩ n a lɛn daar a Daviir na tɩ zɛb'ɩ a Siiri tẽw dem na be a Mezopotami nɩ a Sova a, ɛ́ a Zowab tɩ lɛbr waar wa zɛb tʋ̃ɔ́ nɩbɛ tùr-pie nɩ ayi (12 000) a Edɔm a Nyaarʋ bà-fʋɔla pʋɔ a.

³ Naaŋmɩn i, fʋ jɛ tɩ na bɛr, fʋ dam tɩ na nyaw taa. Fʋ tɩ nyɛ̃ nɩ suur, ɛcɛ lɛb maalɩ tɩ ƴãw!

⁴ Fʋ dam'ɩ a tẽw, fʋ ɩ na k'ʋ pur pur, sanɩ a ʋ natɩɛ, ʋ bɛ cãà laar ɛ.

⁵ Fʋ ɩ na a fʋ nɩ-bʋʋrɛ nyɛ̃ kpɩɛrʋ na ta al a, fʋ fɛr tɩ na ƴãw tɩ nyũ dãa na mɩ́ kuoli a.

⁶ Fʋ kʋ̀ n a bɛlɩ dem na zɔrɛ fʋ a, a zɔ-yaarʋ bãwfʋ, kɛ́ bɛ tʋ̃ɔ́ zɔ a tã-tɛbrɛ niŋé. Tɛw-àrʋ

⁷ Sɔw tɩ ɛ́ faa tɩ, a tɩɩm, fʋ nɩ-nɔnɩ sɩrɩ nyɛ̃ a faafʋ.

⁸ Naaŋmɩn ƴɛ̀r'ɩ a ʋ yir-sõw pʋɔ yel: «Ɩ̃ cɩlɛ na, ɩ̃ póne nɩ a Sɩsɛm tẽw! Ɩ̃ manɛ nɩ a Sukotɩ bà-fʋɔla.

⁹ Mãa só a Galaadɩ tẽw nɩ a Manase tẽw za. Efarayim'ɩ a ɩ̃ kpawɔ-kpow, ɛ́ Zuda ɩ a ɩ̃ naalʋ-dabɔl.

¹⁰ Mowab n'ɩ a ɩ̃ kʋ̃ɔ-so-laa, ɩ̃ lɔb'ɩ a ɩ̃ nafaga dɔwlɩ a Edɔm tẽw zu. Ɩ̃ ŋmɩɛr'ɩ a zɛbr cɛl a Filisɩtɛ̃ tẽw ƴãw.»

¹¹ Ãa n'ʋ na tɛr mɛ̃ tɩ sãá nɩ a Edɔm tẽw? Ãa n'ʋ na tɛr mɛ̃ cen nɩ a tẽw bɛ na cɔbrɩ a zɛbr ƴãw a pʋɔ,

¹² a bɛ ɩ a fʋ̃ʋ, Naaŋmɩn! Ɛcɛ fʋ jɛ tɩ na bɛr, fʋ bɛ cãà bɩɛlɛ a tɩ zɛbr-nɩbɛ ɩ.

¹³ Wa sõw tɩ a dɔ̃ sob ƴãw, bʋ̃ʋ n'ʋ vɛ̃, nɩsaal sõwfʋ ɩ n bɛ̀lʋ.

¹⁴ Tɩ na tõ n gãda-tome lãwnɩ a Naaŋmɩn, ʋl mɩŋa na nɛb'ɩ a tɩ dɔ̃ dem nɩ gbɛ́ɛ.