Sɛb-sõw yielu 54 - A SƐB-SÕW

Sɛb-sõw yielu 54 (53) sob Naaŋmɩn i, wõ a ɩ̃ puoru

¹ Yiel-yielbɛ nɩ-kpɛ̃ɛ sɛbɛ pʋɔ yielu kãw. Bʋ̃-ŋmɩɛrɩ bɛ na maal'ɩ fomie a n'a bɛ mɩ́ ŋmɩɛr ƴãwn. Daviir yielu kãw na wule yã a.

² A Zifɩ tẽw dem na tɩ cen tɩ páw a Sawul yel ʋ k'aa Daviir sɔwl'ɩ a bɛ zie a yele n'a.

³ Naaŋmɩn i, faa mɛ̃ a fʋ yúor zũú, ɩ a fʋ fãw ɩb wul a ɩ̃ yel-mɩŋa.

⁴ Naaŋmɩn i, wõ a ɩ̃ puoru, ƴãw tobr bɛr wõ a ɩ̃ nʋɔr ƴɛ̀rʋ.

⁵ Pɔ̀lʋ dem ìr'ɩ a ɩ̃ ƴãw, po-to-dem bɔbr'ɩ a ɩ̃ kʋb. Bɛ tobr bɛ ka Naaŋmɩn ƴãw ɛ. Tɛw-àrʋ

⁶ Ɛcɛ Naaŋmɩn na sõw mɛ̃ na, a Sore na tɩɛ mɛ̃ na.

⁷ A faa, ʋ́ lɛb lo a ɩ̃ dɔ̃ dem zu! Kʋ bɛ pàw pɛr a fʋ nɔ̃wfʋ ƴãw.

⁸ Ɩ̃ na pɛlɩ nɩ pʋɔ maalɩ bàwr kʋ̀ b. Ɩ̃ na danɩ nɩ a fʋ yúor, Sore e, fʋ na vɩɛl a ƴãw.

⁹ Fʋ faa mɛ̃ nɩ kpɩɛrʋ za pʋɔ, ɛ́ ɩ̃ nyɛ̃ nɩ a ɩ̃ dɔ̃ dem loba.