Sɛb-sõw yielu 52 - A SƐB-SÕW

Sɛb-sõw yielu 52 (51) sob A nɩr na ɩrɛ ƴãwn a ʋ tɛra ƴãw a

¹ Yiel-yielbɛ nɩ-kpɛ̃ɛ sɛbɛ pʋɔ yielu. Daviir yielu kãw na wule yã a.

² A Edɔm tẽw Dowɛgɩ na tɩ cen tɩ yel kʋ̀ a Sawul, k'aa Daviir cen nɩ a Ahimelɛkɩ zie a yele n'a.

³ Gãda-faa a, bʋnʋ ƴãw n'a fʋ pɔrɛ a ɩ-faar fʋ na ɩrɛ a ƴãw? Bibie za n'a a Naaŋmɩn nɔ̃wfʋ ɩb be be.

⁴ Fʋ mɩ́ bɔbr'ɩ yã a ɩ-faar maalʋ ƴãw bibie za, a fʋ zɛl dɩrɛ na man bʋra,

⁵ ɛ́ fʋ tone gɛgɛ-tome, ɛ́ nɔnɛ a ziri gãw a yel-mɩŋa. Tɛw-àrʋ

⁶ Fʋ nɔnɛ na kɛ́ fʋ mɩ́ ƴɛ̀r sãw yel za bɛr, a fʋ ƴɛ̀rʋ za mɩ́ ɩ n bɛ̀lʋ.

⁷ Ɛcɛ Naaŋmɩn na ŋmɛ b'a bin a baarɩ, ʋ na nyɔw fʋ na fɩɩrɩ gẽgẽ, vɩr yi n a fʋ yir pʋɔ, ʋ na ír fʋ nɩ a nɩ-vʋʋrɩ tẽw pʋɔ! Tɛw-àrʋ

⁸ A nɩ-mɩn na nyɛ̃ na, zɔrɛ dɛ̃bɩ̃ɛ, bɛ na laar ʋ na yere nɩ:

⁹ «Nyɛ̃ a nɩr ŋa na bɛ tɩ de a Naaŋmɩn ʋ ɩ a ʋ taw-lanʋ zie a, ɛ́ tɩ ƴãw a ʋ tɩɛrʋ a ʋ na-bʋ̃-yaga ƴãw a, ɛ́ ɩrɛ ƴãwn a ʋ tɛra ƴãw a!»

¹⁰ Ɛcɛ mãa ɩ na mɛ̃ olivʋ tɩɛ na tɛr váar a Naaŋmɩn yir pʋɔ a. a Naaŋmɩn nɔ̃wfʋ n'ʋ ɩ̃ tɩɛrɛ kʋralɛ.

¹¹ Ɩ̃ na puore fʋ nɩ yãanɩ kʋralɛ a fʋ yel-maalɩ za ƴãw. Ɩ̃ na pore nɩ a fʋ yúor yo-vla a fʋ nɩbɛ niŋé.