Sɛb-sõw yielu 50 - A SƐB-SÕW

Sɛb-sõw yielu 50 (49) sob Naaŋmɩn sãá nɩ a ʋ ƴɛ̀rʋ-dɩb ƴãw

1 Yielu Asafʋ na maalɩ a.

¹ Yielu Asafʋ na maalɩ a. A Naaŋmɩn, a Sore Naaŋmɩn ƴɛ̀rɛ na, ʋ bʋɔlɛ nɩ a tẽw za, a mʋ̃tɔ̃w puru zie tɩ tɔ a kpɛb zie.

² Naaŋmɩn nyɩwrɛ nɩ a Sɩyɔ̃ tẽw na vɩɛl ʋ za a pʋɔ.

³ «A tɩ Naaŋmɩn, ʋ́ wa, ɛ́ taa ɩrɛ gbili ɛ!» Vũu de ʋ nɩ niwn dɩrɛ, ɛ́ saa sɛsɛb-kpɛ̃ɛ pili pàw ʋ.

⁴ Naaŋmɩn bʋɔlɛ nɩ a salom, a saa-zu nɩ a tẽw, k'aa wa bɛr wõ a ƴɛ̀rʋ ʋ na dɩrɛ nɩ a ʋ nɩbɛ a.

⁵ Ʋ yere na: «Bɛ bʋɔlɩ a nɩbɛ na sàw de m a ɓã taa, bɛl na maalɩ bàwr bin nɩ wõ-taa mãa nɩ a bɛl cara pʋɔ a.»

⁶ A salom hiere na yere a ʋ mɩnʋ, bʋ̃ʋ n'ʋ vɛ̃, a Naaŋmɩn n'ɩ a ƴɛ̀r-dɩrɛ. Tɛw-àrʋ

⁷ — Ɩ̃ nɩbɛ ɛ, nyɩ bɛrɛ wone, ɩ̃ na ƴɛ̀r'a, Ɩsɩrayɛl i, ɩ̃ na dɩ n a fʋ sãwna dãsɩɛ, mãa n'ɩ a Naaŋmɩn, a fʋ Naaŋmɩn.

⁸ Ɩ̃ bɛ yere fʋ a fʋ bagɛ ƴãw ɛ, fʋ maalɛ nɩ a fʋ nyɩw-a-za-bagɛ kʋ̀rɛ mɛ̃ kʋralɛ.

⁹ Ɩ̃ bɛ nyɔwr nadɛr a fʋ zie ɩ, mɩ̀ bɛ nyɔwr bʋrale a fʋ zawr pʋɔ ɩ,

¹⁰ bʋ̃ʋ n'ʋ vɛ̃, mãa so a kar pʋɔ wɛ-dʋn za, a dʋn túre túre na be a tan pʋɔ a.

¹¹ Ɩ̃ bãw nɩ a saa-zu lili za, ɛ́ só wɛ-dʋ̃w za.

¹² Kɔ̃ tɩ kpɩɛr mɛ̃ a, ɩ̃ kʋ̃ʋ tɩ yel kʋ̀ b ɛ, mãa na n'ʋ so a tẽ-daa nɩ a bome za na paalɩ ʋ a.

¹³ Ɩ̃ 'wɔbr'ɩ nadɛɛ nɛnɛ, bɩɩ nyúur bʋrali zɩ̃ɩ bɩɩ?

¹⁴ Nɩ̃ɛ ɩ a fʋ barka puoru ɩ bàwr fʋ maalɩ kʋ̀ m, a mãa fʋ Naaŋmɩn, ír a nɛ́ɛ fʋ na kõ a ɩ̃ zie a, mãa na ɩ Naaŋmɩn-na-do-saa-bɛ-pɩɛl-a.

¹⁵ Ɛ́ alɛ wa wone fʋ a ʋlɩ bibir nɛ a, fʋ̃ʋ bʋɔlɩ mɛ̃, ɩ̃ na faa fʋ na, ɛ́ fʋ na danɩ mɛ̃ na.

¹⁶ Ɛcɛ Naaŋmɩn yere nɩ à ŋá kʋ̀rɛ a nɩ-faa: — Bʋnʋ ƴãw n'a fʋ dɩ tuo suole a ɩ̃ nɛ-ƴãwnɩ, ɛ́ ƴãw a ɩ̃ wõ-taa a fʋ nʋɔrɩ́,

¹⁷ fʋ̃ʋ na bɛ bɔbr kɛ́ bɛ wule fʋ, ɛ́ mɩ́ de a ɩ̃ ƴɛ̀rʋ sɔ kpaar a?

¹⁸ Fʋ̃ʋ wa nyɛ̃ nyãnyuge a, fʋ̃ʋ nɩ ʋl mɩ́ kpɛ n taa, ɛ́ fʋ̃ʋ nɩ a pɩ̃ɔ-yel-maalbɛ n'ɩ a tu-ta-dem.

¹⁹ Ƴɛ̀r-faar tɛwr'a yire a fʋ nʋɔrɩ́, ɛ́ a fʋ ƴɛ̀rʋ za mɩ́ ɩ zir-pla.

²⁰ Fʋ mɩ́ zɩ̃ na nyɔw a fʋ yɛb yere, fʋ mɩ́ sãwnɛ nɩ a fʋ yɛb nyɩ na lãw sãà nɩ mã a yúor.

²¹ À ŋá n'a fʋ ɩrɛ, ɩ̃ɩ na ɩ gbili i? Fʋ tɩ́ɛrɛ k'ɩ̃ɩ ŋmɛ̃ na mɛ̃ a fʋ̃ʋ a bɩɩ? Ɩ̃ na yere fʋ na, ɛ́ manɩ a fʋ sãwna za a fʋ niŋé.

²² Nyɩ bãw a pɛr vla, nyɩɩm na yiire mɛ̃ bɛrɛ a, alɛ bɛ ɩ lɛ, ɩ̃ na ŋma nyɩ nɩ pʋrpʋr, ɛ́ nɩr bɛ ka be na yel k'ɩ̃ɩ ta ɩ a lɛ ɩ.

²³ Sob nɛ barka puoru na ɩ bàwr ʋ maalɛ kʋ̀rɛ mɛ̃ a, ʋlɛ n'ʋ ƴãwnɛ mɛ̃. Sob nɛ ɩb na vɩɛl a, ɩ̃ na ɩ na k'ʋ nyɛ̃ mãa na n'ɩ a Faarɛ a.