Sɛb-sõw yielu 46 - A SƐB-SÕW

Sɛb-sõw yielu 46 (45) sob Naaŋmɩn be n a tɩ zie

¹ Yiel-yielbɛ nɩ-kpɛ̃ɛ sɛbɛ pʋɔ yielu. Koore bibiir yielu. Bɛ ŋmɩɛr'ɩ bʋ̃-ŋmɩɛrɩ ƴãwn. Yielu.

² A Naaŋmɩn n'ɩ a tɩ sɔwlʋ zie nɩ a tɩ fãw, a sõwfʋ tɩ na mɩ́ nyɛ̃ kʋralɛ a kpɩɛrʋ daar a.

³ Alɛ so tɩ bɛ zɔrɛ bom za ɩ, a tẽsɔw-kɔbr saa na damnɛ, ɛ́ a tan 'lawrɛ lore a kʋ̃ɔ-kpɛ̃ɛ pʋɔ a.

⁴ A kʋ̃ɔnɩ saa na ɩrɛ gɔmɛ pure nɩ puuru, ɛ́ ìre damnɛ a tan a. Tɛw-àrʋ

⁵ Man-gbɛ́r ɩrɛ nɩ a Naaŋmɩn tẽ-kpɛ̃ɛ nʋ̃ɔ̀, a zi-sõw a Naaŋmɩn-na-do-saa-bɛ-pɩɛl-a na kpɩɛr a.

⁶ Naaŋmɩn be n a ʋ pʋɔ, ʋ bɛ damnɛ damnʋ ɛ: a zie wa vɩɛrɛ wa báarɛ a, Naaŋmɩn mɩ́ sõw ʋ na.

⁷ Nɩ-bʋʋrɛ ɩrɛ nɩ gɔmɛ, naalʋ-ten lore, ɛcɛ Naaŋmɩn ƴɛ̀r'a, a kɔkɔr yi, a tẽw nyɩl.

⁸ A Sore Kpɛnʋ-za-sob lãw nɩ tɩ na, a Zakɔb Naaŋmɩn n'ɩ a tɩ zɛbr-yir-kpɛ̃w. Tɛw-àrʋ

⁹ Nyɩ wa bɛl a Sore tome ʋ na tõ a kaa, a pʋl-vʋ̃ɔ yele ʋ na maalɩ a tẽw zu a:

¹⁰ ʋ ɩ na a zɛbr baarɩ tɩ tɔ a tẽw ziir za, ʋ kár'ɩ a tam nɩ a kafin bɛr, ʋ nyɩw nɩ a zɛbr-kur-pãgalɩ bɛr.

¹¹ Ʋ cɩɩrɛ na yere: «Nyɩ zɩ̃ zoom, ɛ́ bãw kɛ́ ɩ̃ ɩ n Naaŋmɩn! Ɩ̃ tʋ̃ɔ́ nɩ a nɩ-bʋʋrɛ za, ɩ̃ tʋ̃ɔ́ nɩ a tẽw za.»

¹² A Sore Kpɛnʋ-za-sob lãw nɩ tɩ na, a Zakɔb Naaŋmɩn n'ɩ a tɩ zɛbr-yir-kpɛ̃w. Tɛw-àrʋ