Sɛb-sõw yielu 45 - A SƐB-SÕW

Sɛb-sõw yielu 45 (44) sob Yielu a nãà kul-taa ƴãw

¹ Yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Yielu bɛ na mɩ́ yiele ŋmɩɛr'ɩ korijom ƴãwn a. Koore bibiir yielu na wule yã a. Yielu na yiele a nɔ̃wfʋ vɩɛlʋ a.

² A ɩ̃ suur ɩ n su-nʋ̃ɔ̀ tɛwr, a ƴɛ̀r-vɩɛlɩ vɩɛlɩ ɩ̃ na na ƴɛ̀r a ƴãw. Ɩ̃ na yel'ɩ a ɩ̃ nɔ̃wfʋ yielu ƴɛ̀r-bie a nãà ƴãw. A ɩ̃ zɛl, ʋ lɩɛbɛ mɛ̃ sɛ-sɛbrɛ na bãw a a, sɛb-dale a!

³ Fʋ pɔ̀l'a zuo a nɩbɛ za, a ƴɛ̀rʋ a, fʋ bãw a na. A sãá na, a Naaŋmɩn na maalɩ fʋ dɩ̃a nɩ bio a.

⁴ Gãdaa a, sɛ a fʋ zɛbr-sɔ-kpɛ̃ɛ a fʋ sɩɛmɩ́, a fʋ vɩɛlʋ nɩ a fʋ dɛpaalʋ bãwfʋ n'ʋ,

⁵ a fʋ dɛpaalʋ yel-mɩŋa! Cere, gárɛ nɩ a fʋ wur, a yel-mɩŋa, a tʋɔra-siwru nɩ a yel-mɩnʋ zɛb-faafʋ ƴãw! A fʋ dʋrʋ nũu na wul fʋ nɩ yel-bɛrɛ fʋ maalɩ.

⁶ A fʋ pime nɛ́ɛ ɩ n ɓɩlɓɩl, a kpɩɛr'ɩ a nãà dɔ̃ dem nyarʋ pʋɔ. — Nɩ-bʋʋrɛ lore nɩ a fʋ pile.

⁷ A fʋ naalʋ-dà-kɔw ɩ na mɛ̃ a Naaŋmɩn naalʋ-dà-kɔw a, ʋ be n be kʋralɛ, mɩnʋ na n'a fʋ dɩrɛ nɩ a naalʋ a.

⁸ Fʋ nɔnɛ nɩ a yel-na-tu-sɔr-a, ɛ́ hɩ̃ɛn a faalʋ. Alɛ n'a so a Naaŋmɩn, a fʋ Naaŋmɩn, cir a pʋ-pɩɛlʋ kãá ƴãw fʋ a zũú, kaa ír fʋ ɛ́ bɛr a fʋ taabɛ.

⁹ A mɩ́ɩ̀r, a kanɛl, nɩ a alowɛsɩ nyũu, pàw nɩ a fʋ bʋ̃-suuri za. Korijom ŋmɩɛrʋ na ɩrɛ fʋ nʋ̃ɔ̀ a, ŋmɩɛr'a yire a fʋ diru bɛ na maalɩ, ɛ́ ƴãw wɔb nyɩmɛ bʋ̃-vɩɛlɩ a pʋɔ.

¹⁰ Na-mɩnɛ pɔwyaar'ɩ bɛ ŋan ƴãw a pɩ̃ɛmɛ fʋ na kʋ̀ bɛ a, ɛ́ a nãà-pɔw àr a fʋ dʋrʋ lowr, pɩ̃ɛ ʋ za nɩ Ofɩɩr tẽw salm-zɩɛ pɩ̃ɛmɛ.

¹¹ Ɩ̃ pɔwyaa a, bɛrɛ wone, jɩ́rɛ ɛ́ cɛlɛ be. Ta cãà tɩɛrɛ a fʋ bʋʋrɛ nɩ a fʋ sãà yir ɛ.

¹² Ɛ́ a nãà na nɔ̃w nɩ a fʋ vɩɛlʋ. Ʋ na ɩ a fʋ sore a, gbĩ dume gũu tɩ tɔ tẽw a ʋ niŋé.

¹³ A Tɩ́ɩ̀r tẽw dem, a nɩ-bʋʋrɛ bɛl na tɛr a zuo a nɩbɛ za a na waar'ɩ nɩ bome a fʋ kʋ̀b, kɛ́ bɛ ɩ lɛ fʋ nɔnɛ bɛ.

¹⁴ A nãà pɔwyaa vɩɛl'a nyɩwrɛ a dĩó, salm-zɩɛ fomie n'a bɛ wób'ɩ a ʋ kparʋ pɛn.

¹⁵ Ʋ su n kparʋ na 'leni 'leni a, ɛ́ bɛ tɛr ʋ cere nɩ a nãà zie. A ʋ pùor a, a ʋ pɔwsɩrali-taabɛ bɩɛlɛ ʋ na kpɩɛr'ɩ a fʋ zie.

¹⁶ Bɛ tɛr bɛ na cere nɩ, bɛ cáarɛ nɩ nʋ̃ɔ̀, bɛ kpɩɛr'ɩ a nãà yir pʋɔ.

¹⁷ A fʋ bidɛbr na lɩɛr'ɩ a fʋ sãà mɩnɛ, fʋ na ɩ na bɛ ɩ na-mɩnɛ a tẽ-daa za zu.

¹⁸ Mãa ƴãw a, ɩ̃ na mɩ́ lɛb'a manɩ a fʋ yúor na yi a, kʋ̀ a nɩbɛ na dɔwr lɩɛrɛ taa a. Lɛ n'a a nɩbɛ za na danɛ fʋ yome yome za.