Sɛb-sõw yielu 44 - A SƐB-SÕW

Sɛb-sõw yielu 44 (43) sob Ìr sõw tɩ, Naaŋmɩn i!

¹ Yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Koore bibiir yielu na wule yã a.

² Naaŋmɩn i, tɩ wõ n nɩ tobr, a tɩ sãà mɩnɛ manɩ kʋ̀ tɩ a tome fʋ na tõ a bɛ daar a koro koro za a.

³ Fʋ ír'ɩ nɩ-bʋʋrɛ a bɛ ten pʋɔ, ɛ́ ƴãw a tɩ bʋʋrɛ zɩ̃. Fʋ dɔwr'ɩ nɩbɛ k'aa fʋ nɩbɛ tʋ̃ɔ́ nyɛ̃ zie zɩ̃.

⁴ A bɛ zɛbr-sɔ-kpɛ̃ɛ bɛ n'ʋ bɛ de nɩ a tẽw ɛ, a bɛ kpãkpamɛ fãw bɛ n'a so bɛ tʋ̃ɔ́ ɩ. A fʋ gãda-nũu n'ʋ so, nɩ a fʋ niw-vla a bɛ ƴãw, fʋ na tɩ nɔnɛ bɛ a zũú.

⁵ Naaŋmɩn i, fʋ̃ʋ na ɩ a ɩ̃ nãà a, yel, ɛ́ a fʋ nɩ-bʋʋrɛ na zɛb'a tʋ̃ɔ́.

⁶ A fʋ̃ʋ zũú n'a tɩ pɔb a tɩ dɔ̃ dem, a fʋ yúor zũú n'a tɩ nɛb a tɩ fɛr-fɛrbɛ nɩ gbɛ́ɛ.

⁷ Ɩ̃ bɛ ɩrɛ ƴãwn a ɩ̃ tam ƴãw ɛ, ɛ́ a ɩ̃ zɛbr-sɔ-kpɛ̃ɛ bɛ n'ʋ na faa mɛ̃ ɩ,

⁸ fʋ̃ʋ n'ʋ faarɛ tɩ a bɛlɩ dem na ɩrɛ a kpɩɛr tɩ a nuru pʋɔ, ɛ́ mɩ́ ɩ a bɛlɩ dem na hɩ̃ɛn tɩ a nyɛ̃ vĩ.

⁹ Bibie za, tɩ danɛ fʋ na, Sore e, tɩ íre nɩ a fʋ yúor bɛ tɛr bɛ́rʋ daar ɛ. Tɛw-àrʋ

¹⁰ Ɛ́ fʋ cãà zawrɩ tɩ bɛr, ɛ́ ɩ tɩ nyɛ̃ vĩ, fʋ bɛ cãà bɩɛlɛ a tɩ zɛbr-nɩbɛ ɩ.

¹¹ Fʋ mɩ́ ɩ na tɩ lɩɛb zɔ a dɔ̃ sob niŋé, ɛ́ a tɩ bɛ-nɔnbɛ za a tɩ bome.

¹² Fʋ mɩ́ bɛr tɩ na kʋ̀ bɛ, mɛ̃ peli-kʋrɩ a. Fʋ diw tɩ na yaarɩ a nɩ-bʋʋr-yoru sɔgɔ.

¹³ Fʋ kʋɔr'ɩ a fʋ nɩbɛ lo, fʋ bɛ páw bom za a bɛ kʋɔrʋ pʋɔ ɩ.

¹⁴ Fʋ bɛr'ɩ a tɩ sɩman dem bɛ tʋʋr tɩ, ɛ́ a nɩbɛ na kpɩɛr viiri koli tɩ a ɩrɛ tɩ laar.

¹⁵ Fʋ ɩ na tɩ ɩ nɩ-ɩ-laarɩ a nɩ-bʋʋr-yoru zie, ɛ́ a nɩ-bʋʋr-yoru mɩ́ viire a zuru ɩrɛ nɩ tɩ laar.

¹⁶ Kʋralɛ n'a ɩ̃ mɩ́ nyɛ̃ a ɩ̃ yúor na sãw, ɛ́ a vĩ bɛ sàw ɩ̃ na dʋɔ a zu a,

¹⁷ a lɛn daar ɩ̃ na mɩ́ wa wõ a dɔ̃ sob, a nɩr na bɔbr k'ʋʋ yáa a san ʋ bɔbr tɩ a nɔhaarʋ ɛ́ tʋʋr fʋ a, Sore e.

¹⁸ Tɩ bɛ tɩ yiiri fʋ bɛr ɛ, ɛ́ à á ŋá za ta tɩ, tɩ bɛ tɩ sãw a fʋ wõ-taa bɛr ɛ.

¹⁹ Tɩ bɛ lɛb pùor ɛ, mɩ̀ bɛ bɛr a sɔ́r fʋ na puo kʋ̀ tɩ a ɩ.

²⁰ Ɛcɛ fʋ dĩ tɩ na nɩ a kpɩɛrʋ a gbõgbo-cili kpɛb zie. Fʋ ɩ na lige na ɩ lige a pili pàw tɩ.

²¹ Tɩmɛ tɩ yiiri a tɩ Naaŋmɩn yúor bɛr a, tɩmɛ tɩ zɛw a nuru cɔw ŋmɩn-yũo a,

²² fʋ kʋ̃ʋ tɩ bãwnɩ a bɩɩ, fʋ̃ʋ na bãw a pʋ-tɩɛr-sɔwlɩ a?

²³ Ɛcɛ a fʋ̃ʋ ƴãw n'a bɛ kʋrɛ tɩ bibie za, bɛ ɩrɛ tɩ mɛ̃ peli-kʋrɩ a.

²⁴ Sore e, ìr! Bʋ̃ʋ n'ʋ so fʋ gúre? Ìr lɛ, ɛ́ ta jɛ tɩ bɛr a baarɩ ɛ!

²⁵ Bʋ̃ʋ n'ʋ so fʋ bɛ bɔbr a tɩ nyɛ́b, ɛ́ yiiri a tɩ wʋ̀ʋr nɩ a tɩ kpɩɛrʋ bɛr?

²⁶ Bʋ̃ʋ n'ʋ vɛ̃, tɩ lo na ɓiile a tanɛ pʋɔ, tɩ vɔbl'a gã a tẽw.

²⁷ Ìr sõw tɩ wɛ! Faa tɩ a fʋ nɔ̃wfʋ zũú.