Sɛb-sõw yielu 40 - A SƐB-SÕW

Sɛb-sõw yielu 40 (39) Ɩ̃ Naaŋmɩn i, ɩ̃ nɔnɛ nɩ a fʋ nʋɔr-sàwfʋ

¹ Yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Sɛb-sõw yielu Daviir na maalɩ a.

² Ɩ̃ tɩ sɩrɩ na ƴãw a ɩ̃ tɩɛrʋ a Sore ƴãw, ʋ jɩ́r'a kaa mɛ̃, ʋ wõ n a cɛl ɩ̃ na lɔb a.

³ Ʋ ír mɛ̃ nɩ a kũu bɔw pʋɔ bɛr, a mɛ̃mɛrɛ bɔw pʋɔ. Ʋ nyɔw mɛ̃ na ɩ̃ ìr àr, a gbɛ́ɛ a za ayi be pìir zu, ʋ ɩ n a ɩ̃ gbɛ́ɛ a kpɛmɛ.

⁴ Ʋ ƴãw nɩ yiel-paala a ɩ̃ nʋɔrɩ́, a tɩ Naaŋmɩn danʋ yielu. Nɩ-yaga na nyɛ̃ na, bɛ na zɔrɛ nɩ a Sore, ɛ́ bɛ na ƴãw nɩ a bɛ tɩɛrʋ a ʋ ƴãw.

⁵ Zu-nʋ̃ɔ̀ sob'ɩ a nɩr ʋl na ƴãw a ʋ tɩɛrʋ a Sore ƴãw, ɛ́ bɛ ŋmɛlɛ kaar a pɔ̀lʋ dem a, nɩ a bɛlɩ dem na nɔnɛ a ziri ŋmab a!

⁶ Sore ɩ̃ Naaŋmɩn i, a fʋ nɔ-ɓãa-yele tɛr'ɩ tɛwr ɩ? Fʋ bɛ tɛr fʋ tɔ ɩ! A yele fʋ na tɩɛrɩ ɛ́ maalɩ a tɩ ƴãw a, tɛr'ɩ tɛwr ɩ? A yãwmɛ na zuo ɩ̃ na na tʋ̃ɔ́ manɩ a za a, ɩ̃ na na tʋ̃ɔ́ yel a za a!

⁷ Fʋ ɩ na ɩ̃ bãw a pɛr vla, kɛ́ bàwr nɩ de-kʋ̀b bome bɛ n'a fʋ tɩ bɔbr ɛ, nyɩw-a-za-bàwr nɩ sãwna bàwr bɛ n'a fʋ tɩ bɔbr ɛ.

⁸ Lɛ n'a ɩ̃ tɩ yel: «Mãa n'ɩ ŋan waar. Bɛ sɛb'ɩ a Wulu sɛbɛ pʋɔ a ʋlɩ bom nɛ a na fɛr k'ɩ̃ɩ ɩ a.»

⁹ Ɩ̃ Naaŋmɩn i, ɩ̃ nɔnɛ nɩ a fʋ pʋ-tɩɛrʋ maalʋ, ɛ́ a fʋ Wulu be a ɩ̃ socir pʋɔ.

¹⁰ Ɩ̃ hier'a yel a faafʋ yel-nʋ̃ɔ̀ a lãw-kpɛ̃ɛ pʋɔ. Nyɛ̃, ɩ̃ bɛ pàw a nʋɔr ɛ, Sore e, fʋ bãwnɩ a na.

¹¹ A faafʋ fʋ na faa mɛ̃ a, ɩ̃ bɛ sɔwlɩ bɛr ɛ, ɛcɛ ɩ̃ yel kɛ́ fʋ ɩ n faarɛ tɔr za. Ɩ̃ bɛ sɔwlɩ a fʋ nɔ̃wfʋ nɩ a fʋ yel-mɩŋa a lãw-kpɛ̃ɛ zie ɩ.

¹² Fʋ̃ʋ a, Sore e, fʋ bɛ sɩbr mɛ̃ a fʋ su-ɓaarʋ ɛ, a fʋ nɔ̃wfʋ nɩ a fʋ yel-mɩŋa na gùre mɛ̃ nɩ kʋralɛ.

*

¹³ Yel-faar na bɛ tɛr nʋɔr a jil a pàw mɛ̃. A ɩ̃ sãwna bɛ bɛrɛ mɛ̃ ɩ, ɩ̃ bɛ cãà tʋ́ɔr jɩ́rɛ a ɩ, a yãwmɛ na zuo a ɩ̃ zukɔbɛ, a ɩ̃ kanyir za baar'a.

¹⁴ Sore e, sàw faa mɛ̃, Sore e, wa fɔ̃w wa sõw mɛ̃!

¹⁵ A bɛlɩ dem na bɔbr a ɩ̃ kũu a, bɛ nyɛ̃ vĩ bɛ za! A bɛlɩ dem na bɔbr k'aa nãá ɩ m faa a, bɛ nyɛ̃ vĩ lɛb'ɩ pùor!

¹⁶ A bɛlɩ dem na mɩ́ la m a «'Ha! 'Ha!» a, a vĩ, a dĩ bɛ bɛ mɩ́ dam gù!

¹⁷ Bɛlɩ dem za na bɔbr fʋ a, nʋ̃ɔ̀ nɩ cɩlʋ, a tɛr bɛ a fʋ ƴãw, ɛ́ a bɛlɩ dem za na nɔnɛ fʋ, fʋ̃ʋ na ɩ a Faarɛ a, bɛ yere kʋralɛ: «A Sore ɩ n kpɛ̃ɛ!»

¹⁸ Mãa ɩ n bãbàal nɩ nã́w sob, ɛcɛ a Sore tɛr'ɩ a ɩ̃ tɩɛrʋ. Fʋ̃ʋ n'ɩ a ɩ̃ sõwne nɩ a ɩ̃ faarɛ, ɩ̃ Naaŋmɩn i, taa cɛlɛ ɩ!