Sɛb-sõw yielu 35 - A SƐB-SÕW

Sɛb-sõw yielu 35 (34) sob Nɩ-mɩŋa bɛ na dɔwrɛ a puoru

1 Daviir so ʋ.

¹ Daviir so ʋ. Sore e, tɛr'ɩ ƴɛ̀rʋ a bɛlɩ dem na tɛr'ɩ mɛ̃ ƴɛ̀rʋ a, zɛbr'ɩ a bɛlɩ dem na zɛbr'ɩ mɛ̃ a.

² Zaa a zɛbr-kur-pãgalɩ, a bile nɩ a kpɛ̃ɛ, ɛ́ ìr sõw mɛ̃.

³ Zɛw a kafin nɩ a lɛr, a bɛlɩ dem na diwr mɛ̃ a ƴãw. Ɛ́ yel mɛ̃: «Mãa n'ʋ na faa fʋ.»

⁴ A bɛlɩ dem na bɔbr a ɩ̃ kũu a, bɛ nyɛ̃ vĩ, bʋnɩ àr lɛ! A bɛlɩ dem na tɩɛrɛ a faa a ɩ̃ ƴãw a, bɛ lɛb tɩ̃wnɩ pùor, ɛ́ vĩ nyɔw bɛ!

⁵ A Sore malkɩ wa diwr bɛ a lɛn daar a, bɛ ɩ mɛ̃ sàwr sɛsɛb na maw cere nɩ a.

⁶ A Sore malkɩ wa ta tu bɛ a lɛn daar a, a bɛ sɔ́r, ʋ ɩ lige nɩ sãsaalʋ tɛwr!

⁷ Ɩ̃ bɛ ɩ bom ɛ, ɛ́ bɛ cɔbrɩ bɛra a ɩ̃ ƴãw, bɛ tuw nɩ bɔw k'ɩ̃ɩ wa lo a ʋ pʋɔ.

⁸ Kpɩɛrʋ bɛ na bɛ bãwnɩ a, a páw bɛ, a bɛl mɩŋa bɛra, ʋ lɛb ŋmɛlɩ nyɔw bɛ, bɛ lo a bɔw bɛ na tuw a pʋɔ!

⁹ Ɛcɛ mãa a, nʋ̃ɔ̀ na kpɩɛr mɛ̃ nɩ yaga a Sore ƴãw, ɩ̃ na cɩlɛ nɩ a ʋ faafʋ ɩ̃ na nyɛ̃ a ƴãw.

¹⁰ Ɩ̃ na yel'a nɩ ɩ̃ pʋɔ za: «Sore e, a fʋ tɔ bɛ ka ɩ: fʋ mɩ́ faa nɩ a bãbàal, nɩbɛ na kpɛmɛ zuo ʋ a nuru pʋɔ. Fʋ mɩ́ faa nɩ a nã́w sob nɩ a bãbàal a bɛlɩ dem na farɛ bɛ a nuru pʋɔ.»

¹¹ Dãsɩ-ziri dem ìre na: bɛ sowre mɛ̃ nɩ yele ɩ̃ na bɛ bãw a.

¹² Bɛ mɩ́ maalɩ mɛ̃ nɩ faa yáa a vla san, mãa n'ɩ ŋan ɩ ɩ̃ yõ tẽtẽ.

¹³ Bɛ na mɩ́ tɩ ɩ bàalbɛ a, ɩ̃ mɩ́ tɩ wul'ɩ a ɩ̃ pʋ-sãwna, ɩ̃ mɩ́ tɩ tɛr'ɩ mʋta-tuo dɔwrɛ nɩ ɩ̃ tʋɔra, ɛ́ a ɩ̃ puoru tɩɛrʋ waar a ɩ̃ zie kʋralɛ.

¹⁴ Ɩ̃ mɩ́ tɩ ɩrɛ na mɛ̃ bá bɩɩ yɛb ƴãw a. Ɩ̃ mɩ́ tɩ tɛr'ɩ pʋ-sãwna, ɛ́ ɩ wahala sob, mɛ̃ a ɩ̃ mã-dɔwra n'ʋ kpi a.

¹⁵ Bɛ gbone nɩ taa kɛ́ bɛ la m a ɩ̃ loba pʋɔ, bɛ gbone nɩ taa a ɩ̃ ƴãw. Nɩ-sãanbɛ, nɩbɛ ɩ̃ na bɛ bãw a cɩɩrɛ nɩ a ɩ̃ ƴãw bɛ tɛr nãà bɛr ɛ.

¹⁶ Bɛlɛ wa nyɛ̃ m ɩ̃ lore a, bɛ mɩ́ lɛb'a bãw la, bɛ nyɩr'ɩ a bɛ nyɩmɛ ƴãw mɛ̃.

¹⁷ Sore e, ŋmɩŋmɩn n'a fʋ na tʋ̃ɔ́ sàw jɩ́rɛ à á ŋá? Lɛb faa a ɩ̃ nyɔ-vʋʋrʋ a gben á ŋá na ùore a zie.

¹⁸ Ɩ̃ na danɩ fʋ nɩ a fʋ nɩbɛ na ɓã taa a niŋé, ɩ̃ na ír'ɩ a fʋ yúor a zu-sɛbla ŋa na bɛ dɩ vuo a niŋé.

¹⁹ A nɩbɛ ɩ̃ na bɛ sãw ɛ́ bɛ tɛr'ɩ mɛ̃ dɔ̃ a, bɛ taa wa ɩrɛ mɛ̃ laar ɛ. A bɛlɩ dem na hɩ̃ɛn mɛ̃ zawlalɛ a, bɛ bɛr a mimie kpɩmnʋ.

²⁰ Ƴã-ɓaarʋ ƴɛ̀r-bir bɛ dãw yi a bɛ nʋɔrɩ́ ɛ, gɛgɛ-ɩb tɩɛrʋ n'a bɛ mɩ́ tɛr tuur'ɩ a tẽw nɩbɛ na bɛ damnɛ a.

²¹ Bɛ háa nɩ a nʋɔr gbayala cɔw mɛ̃, ɛ́ yere: «Heheee! tɩ nyɛ b'a.»

²² Ɛcɛ fʋ̃ʋ a, Sore e, fʋ nyɛ̃ nɩ a lɛ a yele na ɩ a, ta ɩ gbili ɛ, ta àr zãá nɩ mɛ̃ ɩ.

²³ Ɩ̃ Naaŋmɩn i, ìr dɩ a ƴɛ̀rʋ kʋ̀ m, Sore e, ìr de a ƴɛ̀rʋ kpɛ m.

²⁴ Sore e, dɩ n mɛ̃ a ƴɛ̀rʋ tu n a fʋ mɩnʋ, bɛ ta cãà ɩrɛ mɛ̃ laar ɛ, ɩ̃ Naaŋmɩn i!

²⁵ Bɛ ta tɩɛrɛ nɩ bɛ pʋɔ yere: «Ãw! À ŋá n'a tɩ tɩ bɔbr!» Bɛ ta yere kɛ́: «Tɩ vɔl ʋ na» ɩ.

²⁶ Bɛlɩ dem a faa na páw mɛ̃ bɛ cɩlɛ a, bɛ za, bɛ lãw nyɛ̃ vĩ, su zuru àr'ɩ. Vĩ nɩ ɩ-lab, a nyɔw a bɛlɩ dem na dɩrɛ gãdaalʋ a ɩ̃ zu a!

²⁷ Ɛcɛ a ɩ nʋ̃ɔ̀, nʋ̃ɔ̀ na bɛ dɩ vuo a, a bɛlɩ dem na nɔnɛ k'aa ɩ̃ yel-mɩŋa sãá a zie! Bɛ yere kʋrakʋralɛ: «A Sore ɩ n kpɛ̃ɛ, ʋl na bɔbr a ʋ tõ-tõ-bie ƴã-ɓaarʋ a.»

²⁸ Mãa mɩŋa na manɛ nɩ a fʋ mɩnʋ, ɛ́ danɛ fʋ bibie za.