Sɛb-sõw yielu 34 - A SƐB-SÕW

Sɛb-sõw yielu 34 (33) sob Bãbàal lɔb'ɩ cɛl a Sore bɛr wõ

¹ Daviir so ʋ. A Daviir tɩ bãw na kɛ́ yarɛ a Abimelɛkɩ niŋé, ʋ diw ʋ bɛr, ʋ tɔl cen.

² Ɩ̃ na puore nɩ a Sore barka kʋralɛ, a ʋ danʋ na be n a ɩ̃ nʋɔrɩ́ kʋrakʋralɛ.

³ A Sore so a ɩ̃ pɔ̀lʋ. A su-siwri dem bɛ bɛrɛ wone ɛ́ cɩlɛ.

⁴ Nyɩ lãw nɩ mɛ̃ tɩ manɛ a Sore na ɩ kpɛ̃ɛ a, nyɩ ɩ tɩ lãw taa íre a ʋ yúor.

⁵ Ɩ̃ ƴɛ̀r'ɩ a Sore zie, ʋ sɔw mɛ̃, ʋ ɩ na a ɩ̃ dɛ̃bɩ̃ɛ za baarɩ.

⁶ A bɛlɩ dem na jɩ́rɛ ʋ a na laar'ɩ yɔwyɔw, a vĩ kʋ̃ sãá a bɛ niŋe ƴãw ɛ.

⁷ Bãbàal'ɩ ŋan lɔb cɛl a Sore wõ, ɛ́ faa ʋ bɛr a ʋ kpɩɛrʋ za pʋɔ.

⁸ A Sore malkɩ mɩ́ àr'a gù a bɛlɩ dem na zɔrɛ a Sore a, ɛ́ mɩ́ faa bɛ.

⁹ Nyɩ ɩ kaa nyɛ̃ a lɛ a Sore na vɩɛl a. Zu-nʋ̃ɔ̀ sob'ɩ a nɩr ʋl na zɔrɛ kpɩɛr a ʋ naayir a.

¹⁰ Nyɩ zɔrɛ a Sore, nyɩɩm ʋ nɩ-son i, bɛlɩ dem na zɔrɛ ʋ a, bɛ bɛ bɔbr bom guur ɛ.

¹¹ A nũ-kpɛn dem bãw nɩ a nã́w nɩ a kɔ̃, ɛcɛ bom za tuo bɛ kpɩɛr a bɛlɩ dem na bɔbr a Sore a ɩ.

¹² Ɩ̃ bibiir i, nyɩ wa bɛrɛ wone a ɩ̃ ƴɛ̀rʋ! Ɩ̃ na wul nyɩ na nyɩ zɔrɛ a Sore.

¹³ Nɩ-buor'ʋ nɔnɛ a nyɔ-vʋʋrʋ ɛ́ bɔbr k'ʋʋ nãá nyɛrɛ nʋ̃ɔ̀ a ʋ beba pʋɔ?

¹⁴ Ʋ gùre ʋ tʋɔra a ƴɛ̀r-faar ƴãw, nɩ a ziri ƴãw.

¹⁵ Ʋ dɛrɛ a faa, ɛ́ maalɛ a vla, ʋ su zu bɔbr a ƴã-ɓaarʋ.

¹⁶ A Sore jɩ́rɛ nɩ a nɩ-mɩn, ʋ mɩ́ ƴãw nɩ tobr a bɛ cɛlsɩ ƴãw.

¹⁷ A Sore mɩ́ ír'ɩ mimir ƴãw a yel-fa-maalbɛ, k'ʋʋ ɩ bɛ yiiri a bɛ yele a tẽw zu.

¹⁸ A nɩ-mɩn mɩ́ kõ na, a Sore wõ a, ɛ́ mɩ́ faa bɛ bɛr a bɛ kpɩɛrʋ za pʋɔ.

¹⁹ A Sore pɩɛl'ɩ a su-sãwnɩ dem, ɛ́ mɩ́ faa a bɛlɩ dem a tɩɛrʋ na sãw a.

²⁰ Kpɩɛrʋ yaga páwr'ɩ a nɩ-mɩŋa, ɛcɛ a Sore mɩ́ faa ʋ nɩ a za pʋɔ.

²¹ Ʋ kaarɛ nɩ a ʋ ƴã-gan ɓɛrmɛ za zie, a ʋ kɔbr been bɛ kàrɛ ɩ.

²² A faalʋ n'a na kʋ a nɩ-faa, a nɩ-mɩŋa dɔ̃ dem na nyɛ̃ nɩ dɔwrʋ.

²³ A Sore mɩ́ faa nɩ a ʋ tõ-tõ-biir nyɔ-vʋʋrʋ, bɛlɩ dem na zɔ kpɛ a ʋ naayir a bɛ nyɛrɛ dɔwrʋ ɛ.