Sɛb-sõw yielu 33 - A SƐB-SÕW

Sɛb-sõw yielu 33 (32) sob Danʋ a Naaŋmɩn ƴãw, ʋl na ír bom za, ɛ́ kaarɛ bom za zie a

¹ Nyɩɩm nɩ-mɩn i, nyɩ ŋmɩɛr nʋ̃ɔ̀ cɛlsɩ a Sore ƴãw, a ʋ danʋ sɛw taa nɩ nɩ a nɩ-dẽdẽ mɩnɛ.

² Nyɩ ŋmɩɛr a korijom puore nɩ ʋ barka, nyɩ ŋmɩɛr a fomie pie pɛ̀nɛ́ íre nɩ a ʋ yúor.

³ Nyɩ yiele yiel-paala danɛ nɩ ʋ, nyɩ ŋmɩɛr a nyɩ bʋ̃-ŋmɩɛrɩ vla lãw cáarɛ nɩ ʋ.

⁴ A Sore ƴɛ̀rʋ ɩ n dẽdẽ, ɛ́ a ʋ tome za bɛ tɛr nɔkpɛn ɛ.

⁵ Ʋ nɔnɛ nɩ a mɩnʋ, nɩ a yel-na-tu-sɔr-a. A Sore nɔ̃wfʋ paal'ɩ a tẽw za.

⁶ A Sore ƴɛ̀r-bir'ʋ ʋ ír'ɩ a salom, a ʋ nʋɔr pɩɛlʋ n'a ɩ a saa ŋmar-bi-yaga yaga a be.

⁷ Ʋ mɩ́ kʋɔl'ɩ a kʋ̃ɔ-kpɛ̃ɛ kʋ̃ɔ ɓã taa ɛ́ bɩw, ʋ mɩ́ tɛr'ɩ ziir ƴãw a pʋʋ-kʋ̃ɔ.

⁸ A tẽw za, ʋ zɔrɛ a Sore, a tẽ-daa zu dem za, bɛ màwr a ʋ niŋé.

⁹ Bʋ̃ʋ n'ʋ vɛ̃, ʋ mɩ́ ƴɛ̀r'a, ɛ́ a lɛ ʋ na yel a tu, ʋ mɩ́ yel'a, ɛ́ a bom be.

¹⁰ A Sore mɩ́ ŋmɛ n a lɛ a ten na bɔbr k'aa ɩ a lɔb, ʋ bɛ mɩ́ sàw a nɩ-bʋʋrɛ pʋ-tɩɛrʋ maalɩ ɛ.

¹¹ Ɛcɛ a lɛ a Sore na bɔbr a gã nɩ kʋralɛ, ɛ́ a lɛ ʋ na tɩɛr k'ʋʋ ɩ a, be n be yome yome za.

¹² Zu-nʋ̃ɔ̀ dem'ɩ a tẽw ʋl dem a Sore na ɩ a Naaŋmɩn a, zu-nʋ̃ɔ̀ dem'ɩ a nɩ-bʋʋrɛ bɛl ʋ na kaa ír so a.

¹³ A Sore be n a salom zu ɛ́ jɩ́rɛ, ʋ nyɛrɛ nɩ a nɩsaalbɛ za.

¹⁴ A be ʋ na zɩ̃ a ʋ naalʋ-dà-kɔw zu a, ʋ jɩ́rɛ nɩ a nɩbɛ za na kpɩɛr a tẽw zu a.

¹⁵ Ʋlɛ na n'ʋ mɩ́ maalɩ a bɛ been been socir a, ʋ cɛlɛ nɩ a bɛ ɩ-ɩrɩ za zie.

¹⁶ Zɛbr-nɩbɛ yaga bɛ nɛbɛ mɩ́ faa a nãà ɩ, ɛ́ a gãdaa fãw yaga bɛ n'a mɩ́ faa ʋ ɛ.

¹⁷ A wur na na ɩ fʋ zɛb tʋ̃ɔ́ a, bɛ̀lʋ n'a, a ʋ fãw za kʋ̃ tʋ̃ɔ́ ɩ a ʋ zɔmnɛ zɔ cɩ̃ɛ ɩ.

¹⁸ Ɛcɛ a Sore jɩ́rɛ nɩ a bɛlɩ dem na zɔrɛ ʋ a, a bɛlɩ dem na ƴãw a bɛ tɩɛrʋ a ʋ nɔ̃wfʋ ƴãw a,

¹⁹ k'ʋʋ faa bɛ a kũu pʋɔ, ɛ́ guoli bɛ a kɔ̃ daar.

²⁰ Tɩɩm ƴãw a, a Sore n'ʋ tɩ gùre, ʋlɛ n'ɩ a tɩ sõwne nɩ a tɩ zɛbr-kur-pãgala.

²¹ Ʋl ƴãw n'a tɩ tɛr su-nʋ̃ɔ̀, a ʋ yo-sõw ƴãw n'a tɩ ƴãw a tɩ tɩɛrʋ.

²² Sore e, a fʋ nɔ̃wfʋ, ʋ tuur tɩ, mɛ̃ a lɛ tɩ na ƴãw a tɩ tɩɛrʋ a fʋ ƴãw a.