Sɛb-sõw yielu 32 - A SƐB-SÕW

Sɛb-sõw yielu 32 (31) sob A nʋ̃ɔ̀ na mɩ́ ɩrɛ a nɩr Naaŋmɩn na dɩ suur kʋ̀ a

1 Daviir so ʋ. Yielu na wule yã a.

¹ Daviir so ʋ. Yielu na wule yã a. Zu-nʋ̃ɔ̀ sob'ɩ sob nɛ Naaŋmɩn na mɩ́ tow a sãwna tuor bɛr a, ɛ́ mɩ́ dɩ a faa ʋ na maalɩ a suur kʋ̀ a!

² Zu-nʋ̃ɔ̀ sob'ɩ a nɩr ʋl a Sore na mɩ́ de a sãwna bɛr a baar'a, ɛ́ ʋ bɛ tɛr nyãnyu-yã a!

³ A lɛn daar za ɩ̃ na bɛ tɩ sàw a ɩ̃ sãwna a, a fãw na cɛ m'a tɩ báarɛ nɩ a ɩ̃ bibi-vɩɛrɩ za kon pʋɔ.

⁴ Sore e, mʋ̃tɔ̃w nɩ tɩ̃ɩsɔw, a fʋ ŋmɩɛrʋ tɩ siwr'ɩ a ɩ̃ zu, ɛ́ ɩ̃ tɩ bàl ɩ̃ za mɛ̃ váar a tʋl-kpãkpã daar a. Tɛw-àrʋ

⁵ Ɛcɛ ɩ̃ yel'ɩ a ɩ̃ yel-bier kʋ̀ b, ɩ̃ bɛ sɔwlɩ a ɩ̃ sãwna ɩ. Ɩ̃ yel a: «Ɩ̃ na wo n a ɩ̃ sãwna a Sore zie.» Ɛ́ fʋ̃ʋ a, fʋ tow nɩ a ɩ̃ sãwna tuor bɛr mɛ̃. Tɛw-àrʋ

⁶ À ŋá n'a a nɩr za na sàw de fʋ a, na mɩ́ puore fʋ a kpɩɛrʋ daar. A kʋ̃ɔnɩ saa mɩ́ wa paalɩ paalɩ a, a kʋ̃ páw ʋ towtow ɛ.

⁷ Fʋ ɩ n sɔwlʋ zie a ɩ̃ ƴãw, fʋ gùre mɛ̃ na k'aa kpɩɛrʋ ta páw mɛ̃ ɩ. Ɩ̃ na cɩɩrɛ nɩ a ɩ̃ nʋ̃ɔ̀, a gub fʋ na gùre mɛ̃ a lõboge za a ƴãw. Tɛw-àrʋ

⁸ A Sore yere na, ɩ̃ na wule fʋ na, ɛ́ wule fʋ a sɔ́r fʋ na na tuur a. Ɩ̃ na wule fʋ nɩ yã ɛ́ jɩ́rɛ fʋ.

⁹ Ta ɩ mɛ̃ a wur bɩɩ a mílɛ̀ na bɛ bãw yã a ɩ, ɛ́ bom bɛ ɩrɛ fʋ ɛ. Al a, a mɩ́ fɛr'a bɛ ƴãw a nɔ-bamɛ nɩ nɔ-bamɛ mie mɩ́ tʋ̃ɔ́ nyɔw a tɛr.

¹⁰ 'Wɔbrʋ yaga gùre nɩ a nɩ-faa, ɛcɛ sob nɛ na ƴãw a ʋ tɩɛrʋ a Sore ƴãw a, a Sore nɔ̃wfʋ mɩ́ gùre ʋ nɩ kʋralɛ.

¹¹ Nyɩ cɩlɛ a Sore ƴãw, nyɩ cɩlɛ, nyɩɩm nɩ-mɩn i, nyɩ ŋmɩɛr nʋ̃ɔ̀ cɛlsɩ, nyɩɩm soci-dẽdẽ dem za a!