Sɛb-sõw yielu 30 - A SƐB-SÕW

Sɛb-sõw yielu 30 (29) sob Sore e, fʋ lɛb'a kʋ̀ m a nyɔ-vʋʋrʋ

¹ Sɛb-sõw yielu. Ŋmɩn-yir-kpɛ̃ɛ maalʋ yielu na ɩ a Daviir yielu pʋɔ yielu kãw a.

² Ɩ̃ danɛ fʋ nɩ yaga za, Sore e, fʋ ír mɛ̃ nɩ a bɔw-zulu pʋɔ, fʋ bɛ bɛr a ɩ̃ dɔ̃ dem bɛ ɩ m la ɩ.

³ Sore ɩ̃ Naaŋmɩn i, ɩ̃ kõ na bʋɔlɩ fʋ, ɛ́ fʋ sanɩ mɛ̃.

⁴ Fʋ ɩ na ɩ̃ yi a kpɩmɛ tẽw lɛb do wa. A ɩ̃ gbɛ́r kãw tɩ be n a bɔw-zɩɛ pʋɔ, ɛcɛ fʋ lɛb'a kʋ̀ m a nyɔ-vʋʋrʋ, Sore e.

⁵ Nyɩ danɛ a Sore nɩ a nyɩ yielu, nyɩɩm ʋ nɩbɛ na sàw de ʋ a. Nyɩ danɛ ʋ, ɛ́ hiere yere a ʋ sonu.

⁶ A ʋ suur bɛ mɩ́ ta zie ɩ, ɛ́ a ʋ pʋ-pɩɛlʋ mɩ́ cɛlɩ a nyɔ-vʋʋrʋ daar za. A zaanʋɔra a, a mɩ́ cãà na ɩ a mʋta-kʋ̃ɔ, ɛ́ a biɓaara a ɩ nʋ̃ɔ̀ cɛlsɩ.

⁷ A na tɩ ɩ m ƴã-ɓaarʋ a, ɩ̃ tɩ yere na: «Bom za bɛ be na dam mɛ̃ ɩ.»

⁸ Sore e, a fʋ pʋ-pɩɛlʋ zũú a, fʋ cɔbr'ɩ a ɩ̃ tãw ʋ kpɛmɛ. Ɛcɛ fʋ ŋmɛlɩ nɩ kpaar cɔw mɛ̃, pʋl-vʋ̃ɔ dɛ nyɔw mɛ̃.

⁹ Sore e, fʋ̃ʋ n'ʋ ɩ̃ kõ bʋɔlɩ, ɩ̃ zɛlɩ nɩ a Sore yãayãa:

¹⁰ Bʋnʋ tɔnɛ n'a fʋ na nyɛ̃, mãa ɩ mɛ̃ ɩ̃ kpi na a, mãa ɩ mɛ̃ ɩ̃ siw nɩ a bɔw-zɩɛ pʋɔ a? Sob nɛ na lɛb ɩ tanɛ tɛwr a, na tʋ̃ɔ́ na danɩ fʋ ʋ? Ʋ na tʋ̃ɔ́ na hiere a fʋ yel-mɩŋa a?

¹¹ Bɛr wõ, Sore e, zɔ ɩ̃ nɩbaalʋ, Sore e, wa faa mɛ̃.

¹² Fʋ ɩ na a ɩ̃ kuor ɩ̃ na kone a, a lɩɛbɩ nʋ̃ɔ̀ bɩnɛ, fʋ yaa nɩ a ɩ̃ kuor bʋ̃-dɛgɛ bɛr, ɛ́ su m cuw kparɩ.

¹³ Lɛ n'a ɩ̃ na yiele danɛ nɩ fʋ nɩ ɩ̃ pʋɔ za, bɛ tɛr bɛ́rʋ daar ɛ. Sore ɩ̃ Naaŋmɩn i, ɩ̃ na puore fʋ nɩ barka kʋralɛ.