Sɛb-sõw yielu 29 - A SƐB-SÕW

Sɛb-sõw yielu 29 (28) sob A Sore kɔkɔr kpɛmɛ na

1 Daviir yielu kãw n'ʋ.

¹ Daviir yielu kãw n'ʋ. Nyɩɩm ŋmɩmɛ ɛ, nyɩ wa ƴãwnɛ a Sore, nyɩ íre a ʋ yúor nɩ a ʋ fãw.

² Nyɩ wa íre a Sore yúor, nyɩ mɩ́ gbĩ dume gũu tɩ tɔ tẽw a ʋ niŋé, a lɛn daar ʋ na mɩ́ wul a ʋ sonu a.

³ A Naaŋmɩn na tɛr yúor a ɩ na a saa tanɛ wabapapa! A Sore kɔkɔr tanɛ nɩ a kʋ̃ɔnɩ zu, a Sore do na gãw kʋ̃ɔnɩ yaga yaga.

⁴ A Sore kɔkɔr yire nɩ kpɛ̃w za, a Sore kɔkɔr yire na nɩ dɛpaalʋ.

⁵ A Sore kɔkɔr kárɛ nɩ a sɛɛdɩr tɩrʋ, a Sore pʋrwʋrɛ nɩ a Libã tẽw sɛɛdɩr tɩrʋ.

⁶ Ʋ mɩ́ ɩ na a Libã tẽw tan ƴaw cɩrkar mɛ̃ nadeli a, ɛ́ a Siriyon gbil mɛ̃ wɛ-náli-pɔl a.

⁷ A Sore kɔkɔr mɩ́ ɩ na saa nyɩwrɩ pàw a zie.

⁸ A Sore kɔkɔr mɩ́ dam'ɩ a wɛja-kpalɛ, a Sore kɔkɔr mɩ́ dam'ɩ a Kadɛsɩ tẽw wɛja-kpalɛ.

⁹ A Sore kɔkɔr mɩ́ fɛr'ɩ a walɩ ƴãw a dɔw, ʋ mɩ́ vɔ̃ n a tuwr tɩrʋ bɛr. A Sore yir pʋɔ a, bɛ za yere na: «Naaŋmɩn so yúor-vɩɛlʋ-danʋ!»

¹⁰ A Sore zɩ̃ n a ʋ naalʋ-dà-kɔw zu, a kʋ̃ɔnɩ na cere bɛ tɛr tɛwfʋ zie a zu, ʋ na ɩ n nãà na be kʋralɛ a.

¹¹ A Sore na kʋ̀ n fãw a ʋ nɩbɛ, ʋ na kʋ̀ bɛ nɩ a ƴã-ɓaarʋ maalʋ.