Sɛb-sõw yielu 28 - A SƐB-SÕW

Sɛb-sõw yielu 28 (27) sob Yãayãa zɛlʋ nɩ barka puoru

1 Daviir so ʋ.

¹ Daviir so ʋ. Sore e, fʋ̃ʋ n'ʋ ɩ̃ kone bʋɔlɛ. Fʋ̃ʋ, ɩ̃ pìir i, ta ɩ gbili ɛ! Fʋ̃ʋ wa ɩ gbili a ɩ̃ kon ƴãw a, ɩ̃ na ŋmɛ̃ na mɛ̃ a bɛlɩ dem na lɛb lɩɛbɛ uuru a.

² Mɩ́ bɛr wõ m a lɛn daar ɩ̃ na mɩ́ zɛlɛ fʋ yãayãa a, a lɛn daar ɩ̃ na mɩ́ kone bʋɔlɛ fʋ a, a lɛn daar ɩ̃ na mɩ́ zɛw a nuru cɔw a fʋ zi-sõw-za-zi-sõw a.

³ Ta sɔ́r mɛ̃ ƴãw a nɩ-faar pʋɔ nɩ a yel-fa-maalbɛ pʋɔ ɩ. Bɛ mɩ́ ƴɛ̀rɛ nɩ ƴã-ɓaarʋ ƴɛ̀rʋ a bɛ tɔ zie, ɛ́ a bɛ pʋɔ kpɛ faa.

⁴ Ya bɛ man nɩ a bɛ ɩb, man nɩ a ɩ-faar bɛ na ɩ a. Ya bɛ man nɩ a bɛ tome, kʋ̀ bɛ a al na sɛw taa nɩ bɛ a.

⁵ Bɛ bɛ ŋmɛlɛ kaar a Sore ɩ-ɩrɩ ɛ, bɛ bɛ ŋmɛlɛ kaar a ʋ tome ɩ. A Sore, ʋ ɩ bɛ lo ɛ́ taa lɛb ɩrɛ bɛ ìre ɩ!

⁶ A Sore tɛr'ɩ puoru, ʋ na bɛr wõ a ɩ̃ yãayãa zɛlʋ a ƴãw.

⁷ A Sore gùre mɛ̃ na, ʋlɛ n'ɩ a ɩ̃ zɛbr-kur-pãgala. Ʋlɛ n'ʋ ɩ̃ tɩ tɩɛrɛ nɩ ɩ̃ pʋɔ za, ʋʋ faa mɛ̃ na. Ɩ̃ cɩlɛ nɩ ɩ̃ za, ɛ́ yiele danɛ nɩ ʋ.

⁸ A Sore n'ɩ a ʋ nɩbɛ fãw, ʋlɛ n'ɩ a zɛbr-yir-kpɛ̃w na ɩ a ʋ nɩ-kabra faafʋ zie a.

⁹ Sore e, faa a fʋ nɩbɛ, maalɩ a fʋ nɩ-sori, ɩ a bɛ cɩ̃ɩnɛ, ɛ́ kaarɛ a bɛ zie kʋralɛ!