Sɛb-sõw yielu 25 - A SƐB-SÕW

Sɛb-sõw yielu 25 (24) sob Sõwfʋ zɛlʋ puoru

1 Daviir so ʋ.

¹ Daviir so ʋ. Sore e, fʋ̃ʋ n'ʋ ɩ̃ úore,

² ɩ̃ Naaŋmɩn i, fʋ̃ʋ n'ʋ ɩ̃ tɩɛrɛ, taa ƴãwnɛ mɛ̃ vĩ ɛ. Taa sàw a ɩ̃ dɔ̃ dem wa tʋ̃ɔ́nɛ mɛ̃ ɩ.

³ Bɛlɩ dem na tɩɛrɛ fʋ a, a bɛ been bɛ nyɛrɛ vĩ ɛ. Ɛcɛ bɛ na nyɛ̃ nɩ vĩ, a bɛlɩ dem na mɩlɛ zawlalɛ a!

⁴ Sore e, ɩ k'ɩ̃ bãw a fʋ sɛ́ɛ, wul mɛ̃ k'ɩ̃ vʋʋrɛ mɛ̃ a lɛ fʋ na bɔbr a.

⁵ Ɩ k'ɩ̃ tuur a fʋ yel-mɩŋa sɔ́r, wule mɛ̃, fʋ̃ʋ n'ɩ a Naaŋmɩn na faarɛ mɛ̃ a, fʋ̃ʋ n'ʋ ɩ̃ tɩɛrɛ a bibie za.

⁶ Sore e, cãà bãwnɩ a fʋ nɔ̃wfʋ nɩ a fʋ su-ɓaarʋ, koro kãw za n'a fʋ tɛr a.

⁷ Ta cãà tɛr a ɩ̃ pɔ̀lʋ daarɩ́ yel-bebe nɩ sãwna tɩɛrʋ ɛ, nɩ̃ɛ tɩɛrɛ a ɩ̃ yele a fʋ nɔ̃wfʋ ɩb pʋɔ, fʋ̃ʋ na ɩ nɩ-vla a, Sore e.

⁸ A Sore ɩ n nɩ-vla nɩ nɩ-dẽdẽ, alɛ so ʋ mɩ́ wul a sɔ́r a yel-bebe dem.

⁹ Ʋ mɩ́ ɩ n a bãbàalbɛ bɛ lo a mɩnʋ sɔ́r, ʋ mɩ́ wul'ɩ a ʋ sɔ́r a bãbàalbɛ.

¹⁰ A Sore nɛ́ɛ za ɩ n nɔ̃wfʋ nɩ yel-mɩŋa, a bɛlɩ dem na sàwr a ʋ wõ-taa nɛ́ɛ a ƴãw.

¹¹ Sore e, a fʋ yúor ƴãw a, dɩ a ɩ̃ yel-bier suur kʋ̀ m: ʋ ɩ n kpɛ̃ɛ!

¹² Nɩr be n be ƴãwnɛ a Sore e? A Sore mɩ́ wul ʋ nɩ a sɔ́r ʋl a na fɛr k'ʋʋ kaa ír a.

¹³ A nɩr ŋa na wone nɩ nʋ̃ɔ̀, ɛ́ a ʋ bʋʋrɛ na so nɩ a tẽw.

¹⁴ A Sore mɩ́ yel'ɩ a ʋ yel-sɔwla kʋ̀ a bɛlɩ dem na ƴãwnɛ ʋ a, ʋ mɩ́ ɩ na bɛ bãw a ʋ wõ-taa yel-fɛrɩ.

¹⁵ A Sore n'ʋ ɩ̃ mɩ́ jɩ́rɛ kʋralɛ, bʋ̃ʋ n'ʋ vɛ̃, ʋ mɩ́ cɛ̀r'ɩ a ɩ̃ gbɛ́ɛ bɛr a mɩ̃ɛ na mɩl a.

¹⁶ Lɩɛb kaa mɛ̃ ɛ́ zɔ ɩ̃ nɩbaalʋ, Sore e, ɩ̃ yõ daadaa n'ʋ, ɛ́ lɛb ɩ bãbàal.

¹⁷ A kpɩɛrʋ paal'ɩ a ɩ̃ socir, ír a ɩ̃ pʋl-vʋ̃ɔ bɛr mɛ̃.

¹⁸ Jɩ́r a ɩ̃ wʋ̀ʋr nɩ a ɩ̃ kpɩɛrʋ kaa, ɛ́ dɩ a ɩ̃ yel-bebe za suur kʋ̀ m.

¹⁹ Nyɛ̃ a ɩ̃ dɔ̃ dem na yãwmɛ sɛw a, nɩ a hɛb bɛ na hɩ̃ɛn mɛ̃ a.

²⁰ Piw mɛ̃ tɛr ɛ́ faa mɛ̃! Ɩ̃ zɔ na kpɛ a fʋ naayir, k'ɩ̃ɩ taa wa nyɛrɛ vĩ ɛ!

²¹ A faa-bɛ-tɛrʋ nɩ a cen-dẽdẽ, a gùre mɛ̃, ɩ̃ na ƴãw a ɩ̃ tɩɛrʋ a fʋ ƴãw a zũú.

²² Naaŋmɩn i, faa a Ɩsɩrayɛl! Faa ʋ a ʋ kpɩɛrʋ za pʋɔ!