Sɛb-sõw yielu 24 - A SƐB-SÕW

Sɛb-sõw yielu 24 (23) sob A Sore na waar k'ʋʋ wa kpɛ a ʋ yir pʋɔ a

1 Daviir yielu kãw n'ʋ.

¹ Daviir yielu kãw n'ʋ. A Sore só a tẽ-daa nɩ bom za na be a ʋ zu a, ʋlɛ só a tẽw nɩ a bɛlɩ dem na kpɩɛr a ʋ zu a.

² Ʋlɛ n'ʋ sʋ̃ɔ́ a ʋ pɛr a kʋ̃ɔ-bɛrɛ zu, ɛ́ ɩ k'ʋ kpɛmɛ àr a kʋ̃ɔnɩ zu.

³ — Ãa n'ʋ na tʋ̃ɔ́ do a Sore tãw zu? Ãa n'ʋ na àr a ʋ yir-kpɛ̃ɛ-sõw pʋɔ?

⁴ — Sob nɛ nuru na bɛ tõ tõ-faar ɛ́ a pʋɔ ɩ parpar a n'ʋ, sob nɛ na bɛ tu bʋ̃-zawlɛ pùor ɛ́ bɛ pɔ pɔ-ziri a n'ʋ.

⁵ Ʋ na páw nɩ a maalʋ a Sore zie, a mɩnʋ a Naaŋmɩn ʋ faarɛ zie.

⁶ A nɩbɛ bɛl bʋʋrɛ na bɔbr a Sore a n'ɩ a bɛ ŋa, a bɛl na bɔbr a Naaŋmɩn niwn a, bɛlɛ sɩrɩ n'ɩ a Zakɔb bʋʋrɛ. Tɛw-àrʋ

⁷ Nyɩ yuori a dɩ̃dɛɛ 'he'hee! Nyɩ yuori a dɩ̃dɛ-kore kore, a na-kpɛ̃ɛ tʋ̃ɔ́ kpɛ!

⁸ — Ãa n'ɩ a na-kpɛ̃ɛ ŋa? — A Sore n'ʋ, a fãw sob nɩ a gãdaa, a Sore na ɩ a zɛbr gãdaa a.

⁹ Nyɩ yuori a dɩ̃dɛɛ 'he'hee! nyɩ yuori a dɩ̃dɛ-kore kore, a na-kpɛ̃ɛ tʋ̃ɔ́ kpɛ!

¹⁰ — Ãa n'ɩ a na-kpɛ̃ɛ ŋa? — A Sore Kpɛnʋ-za-sob'ʋ, ʋlɛ n'ɩ a na-kpɛ̃ɛ. Tɛw-àrʋ