Sɛb-sõw yielu 22 - A SƐB-SÕW

Sɛb-sõw yielu 22 (21) sob Ɩ̃ Naaŋmɩn i, ɩ̃ Naaŋmɩn i, bʋ̃ʋ n'ʋ so fʋ zawrɩ mɛ̃ bɛr?

¹ A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. A «Zi-wɛl-paala wala» yielu kɔkɔr'ʋ bɛ mɩ́ yiel'ɩ. Daviir yielu kãw n'ʋ.

² Ɩ̃ Naaŋmɩn i, ɩ̃ Naaŋmɩn i, bʋ̃ʋ n'ʋ so fʋ zawrɩ mɛ̃ bɛr? Bʋ̃ʋ n'ʋ so fʋ zãá nɩ mɛ̃ à ŋá, bɛ faarɛ mɛ̃, bɛ bɛrɛ wone a ɩ̃ cɛlsɩ?

³ Ɩ̃ Naaŋmɩn i, ɩ̃ mɩ́ bʋɔlɩ fʋ nɩ a mʋ̃tɔ̃w, fʋ bɛ sɔw ɛ, a tɩ̃ɩsɔw mɩ̀, ɩ̃ɩ kʋ̃ bãw pɩ̃ɛnʋ ɛ.

⁴ Ɛcɛ fʋ zɩ̃ n a fʋ naalʋ-dà-kɔw zu, fʋ̃ʋ Naaŋmɩn na ɩ sõw a Ɩsɩrayɛl danɛ kʋralɛ a.

⁵ A tɩ sãàkʋm-kore mɩ́ tɩ ƴãw nɩ a bɛ tɩɛrʋ a fʋ ƴãw, bɛ mɩ́ tɩ ƴãw nɩ a bɛ tɩɛrʋ a fʋ ƴãw, ɛ́ fʋ mɩ́ tɩ faa bɛ na.

⁶ Bɛ mɩ́ tɩ lɔbr'ɩ cɛlsɩ cɔwr fʋ, ɛ́ bɛ mɩ́ tɩ cɩ̃ɛ na. Bɛ mɩ́ tɩ ƴãw nɩ a bɛ tɩɛrʋ a fʋ ƴãw, ɛ́ bɛ bɛ mɩ́ tɩ nyɛ̃ vĩ ɛ.

⁷ Mãa a, zãzul nɛ m, ɩ̃ bɛ cãà ɩ nɩr ɛ, a nɩbɛ tʋʋr mɛ̃ na, nɩbɛ za jewre mɛ̃ na.

⁸ Bɛlɩ dem za na mɩ́ nyɛ̃ m a, bɛ mɩ́ kpɔwrɛ mɛ̃ na, bɛ mɩ́ mem'ɩ nʋɔr ɛ́ viire zuru.

⁹ Bɛ mɩ́ yere nɩ a ɩ̃ ƴãw: «Ʋ de nɩ a ʋ yele kʋ̀ a Sore, ãa, a Sore ʋ faa ʋ! Mɛ̃ a Sore taa nɔnɛ ʋ, ʋ faa ʋ!»

¹⁰ Sore e, fʋ̃ʋ n'ʋ ír mɛ̃ a ɩ̃ mã púorí, ƴãw ɩ̃ zɩ̃ a ʋ gbɛ́ɛ zu bom bɛ ɩrɛ mɛ̃ ɩ.

¹¹ Ɩ̃ na tɩ yire a vʋr pʋɔ wa báarɛ a, fʋ̃ʋ n'ʋ bɛ de m kʋ̀. Ɩ̃ na tɩ yire a ɩ̃ mã púorí wa báarɛ a, fʋ̃ʋ n'ɩ a ɩ̃ Naaŋmɩn.

¹² Ƴɛrɛŋa a yel-faa na pɩɛlɩ, ɛ́ sõwfʋ bɛ ka be a, ta zãá nɩ mɛ̃ ɩ.

¹³ A ɩ̃ dɔ̃ dem ɩ na mɛ̃ nadɛɛ yaga na ŋmãa jil mɛ̃ a. Bɛ jile na kole mɛ̃, mɛ̃ Basan tẽw dʋ̃-bɛrɛ bɛrɛ a.

¹⁴ Bɛ ɩ na mɛ̃ gben na háa a nɛ́ɛ a ɩ̃ ƴãw a, gben na ùore ɛ́ tawr cɩɛrɛ a.

¹⁵ A ɩ̃ fãw za báarɛ na mɛ̃ kʋ̃ɔ na zɔrɛ a, ɛ́ a ɩ̃ kɔbɛ yɔwrɛ a za. A ɩ̃ socir ɩ na mɛ̃ sɩ-suur a, ʋ nyɩlɛ nɩ a ɩ̃ pʋsabɛ pʋɔ.

¹⁶ A ɩ̃ kɔkɔr ko n ʋ za, a ɩ̃ zɛl mɛr'ɩ a lán. Fʋ bin mɛ̃ nɩ a yàa-bɔw nʋɔr.

¹⁷ Yel-fa-maalbɛ ŋmãa na jil mɛ̃, a baar bɛ ŋa piw mɛ̃ nɩ a ziir za, bɛ cɔr'ɩ a ɩ̃ nuru nɩ a gbɛ́ɛ puo.

¹⁸ Ɩ̃ na tʋ̃ɔ́ na sɔ́r a ɩ̃ kɔbɛ za. Nɩbɛ nyɛ̃ m'a, bɛ jɩ́rɛ mɛ̃ nɩ gbẽgbẽ,

¹⁹ bɛ pone nɩ a ɩ̃ kparɩ, ɛ́ ŋmɩɛr gbãw dier a ɩ̃ bʋ̃-suuri.

²⁰ Ɛcɛ fʋ̃ʋ a, Sore e, ta maal àr zãá a lɛ ɩ, fʋ̃ʋ na ɩ a ɩ̃ fãw a, wa fɔ̃w wa faa mɛ̃.

²¹ Ta sàw a zɛbr-sɔ-kpɛ̃ɛ kʋ m ɛ, piw mɛ̃ tɛr a baar bɛ ŋa nyɩ́mɛ ƴãw!

²² Taw faa mɛ̃ a bɛ nʋɔrɩ́, na ɩ mɛ̃ gbẽw nʋɔr a, faa mɛ̃ a bɛ ɩ́lɛ́ ƴãw, na ɩ mɛ̃ wɛ-náab ɩ́lɛ́ a! Fʋ sàw nɩ a ɩ̃ bʋɔlʋ!

²³ Ɩ̃ na pore nɩ a fʋ yúor a ɩ̃ yɛbr sɔgɔ, ɛ́ danɛ fʋ a lãw nɩbɛ sɔgɔ yere:

²⁴ «Nyɩɩm na zɔrɛ a Sore a, nyɩ danɛ ʋ, nyɩ íre a ʋ yúor, nyɩɩm Zakɔb bʋʋrɛ za a, nyɩ màwr a ʋ niŋé, nyɩɩm Ɩsɩrayɛl bʋʋrɛ za a!

²⁵ Ʋ bɛ jewri a bãbàal a na wone a ɩ, ʋ bɛ jɛ ʋ bɛr ɛ, ʋ bɛ lɩɛbɩ zikur cɔw ʋ ɛ, ʋ bɛr'a wõ ʋ a lɛn daar ʋ na tɩ kone bʋɔlɛ ʋ a.»

²⁶ Sore e, a fʋ̃ʋ zũú n'a ɩ̃ na tʋ̃ɔ́ danɛ fʋ a lãw-kpɛ̃ɛ nɩbɛ pʋɔ. A nɛ́ɛ ɩ̃ na kõ kʋ̀ b a, ɩ̃ na ír a nɩ a bɛlɩ dem na ƴãwnɛ fʋ a niŋé.

²⁷ A bãbàalbɛ na dɩ na tɩw. Bɛlɩ dem na bɔbr a Sore a, bɛ danɛ ʋ ɛ́ tɛr nyɔ-vʋʋr-wogo!

²⁸ A ta-tẽw dem za na lɛb'a bãwnɩ a, ɛ́ bɛ na lɛb'a wa a Sore zie. A nɩ-bʋʋr-yoru yie za na wa na wa gbĩ dume a ʋ niŋé.

²⁹ Bʋ̃ʋ n'ʋ vɛ̃, a Sore ɩ n nãà, ʋlɛ n'ʋ dɩrɛ naalʋ a nɩ-bʋʋr-yoru zu.

³⁰ A tẽw nũ-kpɛn dem za na dɩ na ɛ́ gbĩ dume gũu tɩ tɔ tẽw a ʋ niŋé. Bɛlɩ dem za na lɛb lɩɛbɛ uuru a, na gbĩ n dume gũu tɩ tɔ tẽw a ʋ niŋé — a bɛlɩ dem na kpiir a.

³¹ A bɛ bʋʋrɛ na tone ʋ na, bɛ na ƴɛ̀rɛ nɩ a Sore ƴɛ̀rʋ kʋ̀rɛ a nɩbɛ na dɔwr lɩɛrɛ taa a.

³² Bɛ na man na kʋ̀ a bɛlɩ dem na na dɔw a, a ʋlɩ bom nɛ ʋ na ɩ faa a ʋ nɩbɛ a.