Sɛb-sõw yielu 21 - A SƐB-SÕW

Sɛb-sõw yielu 21 (20) sob A nãà na tʋ̃ɔ́ na ɩrɛ ƴãwn a Sore ƴãw

¹ A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. Daviir yielu kãw n'ʋ.

² Sore e, a fʋ fãw ɩrɛ nɩ a nãà nʋ̃ɔ̀. Nʋ̃ɔ̀ bɛ n'a a fʋ faafʋ mɩ́ ƴãw ʋ ɛ!

³ Fʋ kʋ̀ ʋ nɩ a ʋlɩ bom nɛ ʋ na tɩ bɔbr a, fʋ bɛ sɩb ʋ a ʋlɩ bom nɛ ʋ na tɩ zɛlɛ a fʋ zie a ɩ. Tɛw-àrʋ

⁴ Fʋ tuo nɩ maalʋ waar'ɩ a ʋ zie, fʋ vɔbl'ʋ nɩ salm-zɩɛ nãà-kpawʋɔ.

⁵ Ʋ tɩ zɛlɛ nɩ a nyɔ-vʋʋrʋ a fʋ zie, fʋ kʋ̀ ʋ, ɛ́ ɩ k'ʋ cɛlɩ cɛlɩ.

⁶ A fʋ sõwfʋ zũú a, a ʋ yúor yi na bɛ dɩ vuo ɩ, vɩɛlʋ nɩ dɛpaalʋ n'a fʋ kʋ̀ ʋ.

⁷ Fʋ ɩ na ʋ ɩ nɩr na nyɛ̃ maalʋ, dɩ̃a nɩ bio a. Fʋ ɩ na ʋ nyɛrɛ nʋ̃ɔ̀ a fʋ zie.

⁸ Sɩza n'a, a nãà ɩrɛ na ƴãwn a Sore ƴãw, ɛ́ a Naaŋmɩn-na-do-saa-bɛ-pɩɛl-a nɔ̃wfʋ zũú, ʋ kʋ̃ bãw damnʋ ɛ.

⁹ Nãà a, fʋ na páw nɩ a fʋ dɔ̃ dem za, fʋ bɛ bɔbr a bɛlɩ dem na hɩ̃ɛn fʋ a guur ɛ.

¹⁰ Fʋ̃ʋ wa sãanɛ wa báarɛ a, bɛ na lɩɛb'ɩ vũu-kpɛ̃ɛ. — A Sore na nyɛ̃ nɩ suur ɩ bɛ bɔr, ɛ́ vũu na dɩ bɛ na.

¹¹ Fʋ na ɩ na bɛ bɛ cãà tɛr wɔm a tẽw zu ɛ, ɛ́ a bɛ bʋʋrɛ baarɩ a nɩsaalbɛ pʋɔ.

¹² Bɛlɛ wa bɔbr kɛ́ bɛ maalɩ fʋ faa, ɛ́ bʋ̀rɛ taa a fʋ ƴãw a, bɛ kʋ̃ tʋ̃ɔ́ ɩ bom ɛ.

¹³ Fʋ na tɛ tɛ bɛ na, fʋ na ɩ na bɛ lɩɛb zɔ.

¹⁴ Sore e, ìr wul a fʋ fãw! Tɩɩm ƴãw a, tɩ na yiele na danɛ nɩ a fʋ gãda-tome.