Sɛb-sõw yielu 148 - A SƐB-SÕW

Sɛb-sõw yielu 148 (147) sob A Sore so danʋ a salom zu nɩ a tẽw zu

¹ Aleluya! Nyɩ be a salom zu ɛ́ danɛ a Sore, nyɩ danɛ ʋ, nyɩɩm za na be a saa-zu be a.

² Nyɩɩm ʋ malkɩ mɩnɛ za, nyɩ danɛ ʋ, nyɩɩm ʋ zɛbr-nɩbɛ za, nyɩ danɛ ʋ.

³ Mʋ̃tɔ̃w nɩ cuw, nyɩ danɛ ʋ, nyɩɩm ŋmar-bie za na nyɩwrɛ a, nyɩ danɛ ʋ.

⁴ Nyɩɩm salom zi-zãánɩ za, nyɩ danɛ ʋ, nɩ nyɩɩm, kʋ̃ɔnɩ na be a salom zu-sɔw a.

⁵ A za, a íre a Sore yúor, bʋ̃ʋ n'ʋ vɛ̃, ʋ ƴɛ̀r'a, ɛ́ a be.

⁶ Ʋ ƴãw a na a be, a nʋɔr kʋ, ʋ bin nɩ nʋɔr na na gã kʋralɛ a.

⁷ Nyɩ be a tẽw zu ɛ́ danɛ a Sore, nyɩ danɛ ʋ, nyɩɩm kʋ̃ɔ-bɛrɛ, nɩ a nyɩ dʋ̃-bɩɩr bɩɩr,

⁸ nɩ nyɩɩm mɩ̀, vũu nɩ sa-bi-kube, sa-pupure nɩ ulu, saa-sɛsɛb na sàwr a ʋ ƴɛ̀rʋ a.

⁹ Nyɩ danɛ ʋ, nyɩɩm tã-bɛrɛ nɩ tãli, tɩ-wɔnɩ nɩ sɛɛdɩr tɩɩr za,

¹⁰ wɛ-dʋn nɩ yir dʋn, bʋ̃-vuri nɩ bʋ̃-pɩgɛ.

¹¹ Nyɩ danɛ ʋ, tẽw zu na-mɩnɛ ɛ, nɩ nyɩɩm, nɩ-bʋʋrɛ za, a nɩ-bɛrɛ nɩ a tẽw kaarbɛ za.

¹² Dɛbli nɩ powli, pɔ́lɛ́ nɩ dɛb-nyamɛ, nyɩ danɛ ʋ.

¹³ Nyɩ danɛ a Sore, ʋl yõ yúor'ʋ yi, a ʋ vɩɛlʋ paal'ɩ a tẽw nɩ a salom.

¹⁴ Ʋ lɛb'a kʋ̀ a ʋ nɩ-bʋʋrɛ fãw na bɛrmɛ a. Yúor'ʋ a ʋ nɩbɛ zie, a Ɩsɩrayɛl bibiir za zie, a nɩ-bʋʋrɛ na pɩɛl'ʋ a. Aleluya!