Sɛb-sõw yielu 147 - A SƐB-SÕW

Sɛb-sõw yielu 147 (146) sob A tɩ Sore ɩ n kpɛ̃ɛ ɛ́ tɛr fãw yaga za

¹ Aleluya! À yiele danɛ nɩ a tɩ Naaŋmɩn ɩ n bʋ̃-vla, lɛ n'a, a ʋ danʋ vɩɛl'a ɛ́ nʋmɛ.

² A Sore lɛb'a mɩɛr a Zerizalɛm, a Ɩsɩrayɛl nɩbɛ bɛ na diw yaarɩ a, ʋ lɛb'a kaalɛ bɛ ɓanɛ taa.

³ Ʋ mɔwlɛ nɩ a pʋ-sãwnɩ dem, ɛ́ 'lene a bɛ natɩɛ.

⁴ Ʋ mɩ́ sɔr'ɩ a ŋmar-bie bãw a nʋɔr, ɛ́ por ŋa za a ʋ yúor.

⁵ A tɩ Sore ɩ n kpɛ̃ɛ ɛ́ tɛr fãw yaga za, a ʋ yã bɛ tɛr tɛwfʋ zie ɩ.

⁶ A Sore mɩ́ nyɔw nɩ a bãbàalbɛ bɛ lɛb ìr, ɛ́ siwri a nɩ-faar tɩ tɔ n a tẽw.

⁷ Nyɩ yiele puore nɩ a Sore yãanɩ, nyɩ ŋmɩɛr korijom danɛ nɩ a tɩ Naaŋmɩn.

⁸ Ʋlɛ n'ʋ mɩ́ ɩ a zũzuge yi pàw a salom. À ŋá n'a ʋ mɩ́ cɔbrɩ a saa a tẽsɔw ƴãw. Ʋ mɩ́ ɩ na a mʋ̃ɔ bul a tan zu.

⁹ Ʋ mɩ́ kʋ̀ n a dʋn a bʋ̃-dɩrɩ, ɛ́ kʋ̀ a a gbagba bili na mɩ́ kone a ƴãw a.

¹⁰ A wur fãw bɛ n'a ɩrɛ a Sore nʋ̃ɔ̀ ɩ, nɩ a nɩsaal gbɛ-kpɛn ɛ,

¹¹ a Sore pʋɔ mɩ́ pɛlɩ nɩ a bɛlɩ dem na zɔrɛ ʋ a ƴãw, a bɛlɩ dem na mɩ́ tɩɛrɛ a ʋ nɔ̃wfʋ a.

*

¹² Zerizalɛm i, íre a Sore yúor, Sɩyɔ̃ tẽw i, danɛ a fʋ Naaŋmɩn.

¹³ Bʋ̃ʋ n'ʋ vɛ̃, ʋ ɩ n a fʋ pamɛ bʋ̃-kparɩ a kpɛmɛ, ɛ́ maalɩ a fʋ nɩbɛ na kpɩɛr a fʋ pʋɔ a.

¹⁴ Ʋ mɩ́ gù n a fʋ tẽw tʋr-bɔwrɩ, fʋ tɛr ƴã-ɓaarʋ, a ble na vɩɛl vɩɛl a n'a ʋ mɩ́ kʋ̀ b a man.

¹⁵ Ʋ mɩ́ tɩr'ɩ a ʋ nɛ́ɛ bɛr a tẽw zu, ɛ́ daadaalɛ a ʋ ƴɛ̀rʋ zɔrɛ.

¹⁶ Lɛ n'a ʋ mɩ́ ɩ a sa-pupure a lore ɩ mɛ̃ gon-pɛlɛ na gbil gbil a. Ʋ mɩ́ ɩ n a sa-bi-mɩrmɩr na gúr a, a lo pàw a tẽw mɛ̃ tãpɛl-baalʋ a.

¹⁷ Ʋ mɩ́ ɩ n a kʋ̃ɔ na gúr kpawlɩ a, ŋmarɛ lore ɩ sa-bi-kube. Ãa n'ʋ na tʋ̃ɔ́ a ƴawr a na mɩ́ wa n a?

¹⁸ Ʋlɛ wa tɩrɛ a nʋɔr wa báarɛ a a mɩ́ nyɩl a. Ʋlɛ wa ɩ a sɛsɛb fure a, a kʋ̃ɔnɩ mɩ́ gbɔlɛ na.

¹⁹ Ʋ ƴɛ̀r'ɩ a ʋ ƴɛ̀rʋ kʋ̀ a ʋ nɩ-bʋʋrɛ, ʋ kʋ̀ n a ʋ tub nɩ a ʋ nɛ-ƴãwnɩ a Ɩsɩrayɛl.

²⁰ Ʋ bɛ ɩ à à ŋá nɩ-bʋʋrɛ kãw za ƴãw ɛ, a kãw za bɛ bãw a ʋ nɛ-ƴãwnɩ ɛ. Aleluya!