Sɛb-sõw yielu 139 - A SƐB-SÕW

Sɛb-sõw yielu 139 (138) sob Sore e, fʋ bãw mɛ̃ na pɩɩrɩ

1 Yiel-yielbɛ nɩ-kpɛ̃ɛ sɛbɛ pʋɔ yielu. Daviir so ʋ. Sɛb-sõw yielu.

¹ Yiel-yielbɛ nɩ-kpɛ̃ɛ sɛbɛ pʋɔ yielu. Daviir so ʋ. Sɛb-sõw yielu. Sore e, fʋ mɩ́ jɛl'ɩ a ɩ̃ pʋɔ bãw mɛ̃.

² Fʋ mɩ́ bãw nɩ a ɩ̃ zɩma daar nɩ a ɩ̃ ìru daar, fʋ mɩ́ de nɩ niwn bãw a ɩ̃ pʋ-tɩɛrʋ a cɛlɩ.

³ Ɩ̃ cere na bɩɩ ɩ̃ gã na a, fʋ mɩ́ bãwnɩ a na, ɛ́ fʋ mili nɩ a ɩ̃ sɛ́ɛ za.

⁴ Ɩ̃ bɛ mɩ́ háa a nʋɔr sɛr ɛ, ɛ́ fʋ de niwn bãw a lɛ za ɩ̃ na na yel a.

⁵ Fʋ be n a ɩ̃ pùorí ɛ́ be a ɩ̃ nidaa, fʋ mɩ́ dɔwl'ɩ a fʋ nũu a ɩ̃ zu.

⁶ Mãa zie a, a bãwfʋ ŋa tɔ fʋ na bãw mɛ̃ a, ʋ vɩɛl'a tɩ zuo, ɛ́ gãw bom za ɩ̃ na na tʋ̃ɔ́ bãw a.

⁷ Nyɩnɛ n'a ɩ̃ na cen zãá nɩ fʋ? Nyɩnɛ n'a ɩ̃ na zɔ cen zãá, fʋ ta nyɛrɛ mɛ̃?

⁸ Mãa do a salom zu a, fʋ be n a be, mãa gã a kpɩmɛ tẽw a, fʋ̃ʋ n'ɩ ŋan a be.

⁹ Mãa ƴaw tɩ ta a mʋ̃tɔ̃w puru zie, bɩɩ cen tɩ kpɩɛr a mʋ̃tɔ̃w kpɛb zie a,

¹⁰ a be mɩ̀ a, a fʋ nũu na kaarɛ mɛ̃ na, a fʋ dʋrʋ nũu na nyɔw mɛ̃ na tɛr.

¹¹ Mãa yel: «A lige, a pàw mɛ̃, a cãà na jil mɛ̃ a, a lɩɛbɩ tɩ̃ɩsɔw a»,

¹² fʋ̃ʋ zie a, a lige mɩ́ lɩɛb'ɩ cãà, ɛ́ a tɩ̃ɩsɔw caalɩ mɛ̃ mʋ̃tɔ̃w a. Lige bɩɩ cãà a, fʋ̃ʋ zie a, a za been.

¹³ Fʋ̃ʋ n'ʋ ír mɛ̃ ɩ̃ za, fʋ̃ʋ n'ʋ wob mɛ̃ mɛ̃ pɛn a, a ɩ̃ mã púorí.

¹⁴ Ɩ̃ puore fʋ nɩ yãanɩ Sore e, fʋ na maalɩ mɛ̃, ɩ̃ ɩ vɩɛlʋ nɩ nɔ-ɓãan a. A fʋ tome mɩ́ ɩ n vɩɛlʋ tɛwr, ɩ̃ bãwnɩ a na.

¹⁵ A ɩ̃ ƴã-gan bɛ tɩ sɔwlɩ a fʋ zie a lɛn daar fʋ na tɩ sɔwlɩ maalɛ mɛ̃ a ɩ, fʋ na tɩ wóbr mɛ̃ a ɩ̃ mã púorí a ɩ.

¹⁶ Ɩ̃ na bɛ tɩ tɛr ŋmɛ̃a sɛr a, fʋ tɩ nyɛ̃ m'a. Fʋ tɩ sɛb'ɩ a bibie nʋɔr fʋ na na kʋ̀ m a ƴãw a fʋ sɛbɛ pʋɔ baarɩ, ɛ́ been kãw za bɛ tɩ tĩ sɛr ɛ.

¹⁷ Naaŋmɩn i, kpɛ̃w bɛ n'a a fʋ pʋ-tɩɛrʋ kpɛmɛ a ɩ̃ zie ɩ, a ɓã n taa yãwmɛ yaga!

¹⁸ Ŋmɩŋmɩn n'a ɩ̃ na tʋ̃ɔ́ sɔ́r a? A yãwmɛ na zuo a biire. Mãa mɩ́ saa tʋ̃ɔ́ sɔ́r a za bãw a, ɩ̃ cãà kʋ̃ bãw a fʋ tɩɛrʋ ɛ.

¹⁹ Naaŋmɩn i, fʋ nãá ɩ a nɩ-faar bɛ kpi, fʋ nãá diw a nɩ-kʋrbɛ zãá nɩ mɛ̃.

²⁰ Bɛ mɩ́ de nɩ a fʋ yúor tule nɩ a bɛ taabɛ, bɛ mɩ́ pore ʋ na maalɛ nɩ a faa.

²¹ Sore e, ŋmɩŋmɩn n'a ɩ̃ kʋ̃ hɩ̃ɛn a bɛlɩ dem na hɩ̃ɛn fʋ a? Ŋmɩŋmɩn n'a a bɛlɩ dem na zɛbr'ɩ fʋ a, kʋ̃ ɩrɛ mɛ̃ kɔkɔrʋ?

²² Ɩ̃ hɩ̃ɛn bɛ nɩ tʋ̃tʋba, bɛ lɩɛb'ɩ a mãa mɩŋa dɔ̃ dem.

²³ Naaŋmɩn i, jɛl a ɩ̃ pʋɔ bãw mɛ̃, ɩ m kaa, bãw a bom nɛ na ƴãwnɛ mɛ̃ tɩɛrʋ a.

²⁴ Bɛl nyɛ̃, ɩ̃ taa ɩrɛ wa lo sɔr-faa, ɛ́ tɛr mɛ̃ tu n a sɔ́r na ɩ a fʋ sɔ́r kʋralɛ a.