Sɛb-sõw yielu 138 - A SƐB-SÕW

Sɛb-sõw yielu 138 (137) sob Sore e, fʋ yãanɩ!

1 Daviir so ʋ.

¹ Daviir so ʋ. Sore e, ɩ̃ puore fʋ nɩ yãanɩ nɩ ɩ̃ pʋɔ za, ɩ̃ yiele na danɛ nɩ fʋ a ŋmɩmɛ niŋé.

² Ɩ̃ lo na gbĩ dume gũu tɩ tɔ tẽw tori a fʋ yir-sõw, ɩ̃ puore fʋ nɩ yãanɩ a fʋ nɔ̃wfʋ nɩ a fʋ na ŋmɛ̃ fʋ ŋmɛ̃a a ƴãw. Bʋ̃ʋ n'ʋ vɛ̃, fʋ maal'ɩ a lɛ fʋ na yel a, tɩ zuo nɩ a lɛ tɩ na gùre a fʋ zie a bɛr.

³ A lɛn daar ɩ̃ na tɩ bʋɔlɩ fʋ a, fʋ sɔw mɛ̃ na, fʋ tɩ ɩ na ɩ̃ kpɛmɛ socir ɛ́ tɛr fãw.

⁴ Sore e, a tẽw zu na-mɩnɛ za na puore fʋ nɩ yãanɩ, bɛ na na wone a fʋ nʋɔr ƴɛ̀rʋ a ƴãw.

⁵ Bɛ na yiele na danɛ nɩ a fʋ ɩb yere: «A Sore yúor-vɩɛlʋ-danʋ yi n yaga!

⁶ A Sore na saa be a saa-zu a, ʋ nyɛrɛ nɩ a bãbàalbɛ, ɛ́ a pɔ̀lʋ dem mɩ́ zãá, ʋʋ nyɛ̃ bɛ bãw.»

⁷ Kpɩɛrʋ wa tɛr mɛ̃ yaga za a, fʋ mɩ́ ɩ na k'ɩ̃ vʋʋrɛ, a ɩ̃ dɔ̃ dem saa mɩ́ nyɛ̃ suur a. Fʋ mɩ́ dɔl'ɩ a fʋ nũu faa mɛ̃ nɩ a fʋ fãw.

⁸ Sore e, a bom nɛ fʋ na tĩ a ɩ̃ ƴãw a, fʋ na maal'ʋ na tɩ baarɩ. Sore e, a fʋ nɔ̃wfʋ be n kʋralɛ, taa zawrɛ a fʋ nuru tome bɛrɛ ɩ.