Sɛb-sõw yielu 135 - A SƐB-SÕW

Sɛb-sõw yielu 135 (134) sob Ɩ̃ bãwnɩ a na, a Sore ɩ n kpɛ̃ɛ

¹ Aleluya! Nyɩ sʋ̃ɔ̀nɛ a Sore yúor, nyɩ sʋ̃ɔ̀nɛ ʋ, nyɩɩm Sore tõ-tõ-biir i,

² nyɩɩm na mɩ́ be a Sore Ŋmɩn-yir-kpɛ̃ɛ pʋɔ a, a tɩ Naaŋmɩn yir davʋrɩ pʋɔ a.

³ Nyɩ danɛ a Sore, ʋ na vɩɛl a ƴãw, nyɩ ŋmɩɛr korijom sʋ̃ɔ̀nɛ nɩ a ʋ yúor, ʋ na vɩɛl a ƴãw.

⁴ A Sore kaa na ír a Zakɔb a ʋl mɩŋa ƴãw, ʋ ɩ na a Ɩsɩrayɛl lɩɛbɩ a ʋ bʋ̃-sora mɩŋa.

⁵ Mãa ƴãw a, ɩ̃ bãwnɩ a na, a Sore ɩ n kpɛ̃ɛ: a tɩ Sore gãw nɩ a ŋmɩmɛ za.

⁶ A Sore maalɛ nɩ bom nɛ za ʋ na bɔbr a, a salom zu nɩ a tẽw zu, a kʋ̃ɔ-bɛrɛ pʋɔ nɩ a kʋ̃ɔ-zulsɩ pʋɔ.

⁷ Ʋlɛ n'ʋ mɩ́ ɩ a zũzuge yi a tẽw-tʋra ƴãw do, ɛ́ maalɩ a saa-nyɩwrʋ k'aa saa tʋ̃ɔ́ wa, ʋ mɩ́ ɩ n a sɛsɛb ʋ cɛ̀r.

⁸ Ʋlɛ n'ʋ ɩ bʋ̃-dãw-dɔwrɩ za kpi, a Eziptɩ tẽw pʋɔ, a nɩsaalbɛ tɩ lãwnɩ a dʋn.

⁹ Ʋ maal'ɩ yele na ɩ bãwfʋ sãá a, nɩ yel-bãw-guuri, — a fʋ pʋɔ, Eziptɩ tẽw i! — a Faarawɔ̃ nɩ a ʋ tõ-tõ-biir ƴãw.

¹⁰ Ʋ zɛb'a tʋ̃ɔ́ nɩ-bʋʋr-yaga, ɛ́ kʋ na-kpɛn kpɛn:

¹¹ Amoritɩ mɩnɛ nãà Sihon, nɩ Basan tẽw nãà Ɔgɩ, nɩ a Kanãa tẽw na-mɩnɛ za.

¹² Ʋ de nɩ a bɛ tẽw tɩr, ʋ de ʋ na kʋ̀ a ʋ nɩ-bʋʋrɛ Ɩsɩrayɛl, ʋ so ʋ.

¹³ Sore e, bɛ na pore nɩ a fʋ yúor kʋralɛ, Sore e, bɛ bɛ yiire a fʋ yele a yome yome za ɩ.

¹⁴ Bʋ̃ʋ n'ʋ vɛ̃, a Sore mɩ́ bãw nɩ a ʋ nɩbɛ yele kʋ̀ bɛ, ʋ zɔrɛ nɩ a ʋ tõ-tõ-biir nɩbaalʋ.

¹⁵ A nɩ-bʋʋr-yoru tɩbɛ, salm-pla nɩ salm-zɩɛ n'a bɛ mɩ́ maal'ɩ a, nɩsaalbɛ nuru bʋ̃-maalɩ n'a.

¹⁶ A tɛr'ɩ nʋɔr, ɛ́ bɛ ƴɛ̀rɛ ɩ, tɛr mimie, ɛ́ bɛ nyɛrɛ ɩ,

¹⁷ tɛr tobe, ɛ́ bɛ wone ɩ. Pɩɛlʋ kãw za bɛ be a nʋɔrɩ́ ɛ.

¹⁸ A bɛlɩ dem na maalɩ a a, bɛ ŋmɛ̃ taa nɩ a, nɩ a bɛlɩ dem za na ƴãw a bɛ tɩɛrʋ a ƴãw a.

¹⁹ Nyɩɩm, Ɩsɩrayɛl dɔwlʋ nɩbɛ ɛ, nyɩ puore a Sore yãanɩ. Aarɔ̃ yir dem i, nyɩ puore a Sore yãanɩ.

²⁰ Levi yir dem i, nyɩ puore a Sore yãanɩ. Nyɩɩm za na zɔrɛ a Sore a, nyɩ puore ʋ yãanɩ.

²¹ Yãanɩ puoru, a yi a Sɩyɔ̃ a Sore ƴãw, ʋl na kpɩɛr a Zerizalɛm a. Aleluya!